4 ¹ ኣኪ ውር ፓይላ ካኮሜ ኡዋው ከውርካ ዋድማካ ክርስቶሴ ኬካ ውር ጊታይ ጌልቅምሺኔ ኦካ ድኬንካ ባሪዮጝ ሁሉኩሼ ኡዋባ። ² ውር ጊታይ ጌልቅምሺኖጝ ማቲ ውር ሹቃዬ ካጌይኖጝ ኣኔባ። ³ ኣይኒን ኬታይ ጉዩጝ ኮምሺኒን ኣን ከኦካ ካራምካ ኮምሼንካ ውሩጝ ከታጝ ናኒ ኣኔኬን ኦኬ ክየምጵንዻ፤ ኣይን ኣኑጝ ሃኮምሼኬን ኣን ኤምኑ። ⁴ ኅሊና ናኒ ሃጫንካቃ፤ ዬ ይጝ ሃማሬ ሴሶ ኣኔኑጝ ሻምኬን ጃ፤ እንካ ኮምሼ ኣኑጝ ሃታቺ እን። ⁵ ዬ ዋዳ ኔኒ ካኒ ሄክሽኬኔ ኦይድኬ ኦኬ ክየምጵንዻ ኮምሺኔን፤ ካሊባ ሌይ ሃም ታቺ እን ካኩዋዎጝ። እን ድኬ ኦድሙጉ ክያኑጝ እሺ ቡልሼባ ሃም ኣይ ሜሌሉጝ፤ ዹዋልሼንባ ቃቦ እን ኣኔን ኦካ ሻንካ ውር ቱዎጙጝ። ከሹ እን ውር ክየም ክየም ጎሺ እንካ ሁሉኩሾጝ ቦባ ከኦካ ባሪዮ። ⁶ ኣኪ ጪኒጌን ናኒ ዮ፤ ሃሺጝ ናንዳካ ጥቅም ጉዩዬ ኣን ኤምኑዬ ኣጵሎሴ ሃሻምኬ ሄክንሶዬ ሃቦሼ እየውባ፤ ሃሻሜ ይንዻጝ ከእርር እን ሺጜ ኦይኬ ኦይን ቶኬ ሳጊዬ ከኦጉዋዩዬ ጊያ። ዬ ውር ክየም ኦይድኬ ኦካ ኑዋ ሳስክዬ ቃይቴን። ⁷ ኣይባዬ፣ ከሳጊዬ ከኦካ ኑዋውጝ ሃኒን ሻሚ እኑጝ? ኦይን ኑኑ የማሬ ቦወን ኣና ኦ? ሃኦኬና የቦወያጝ ኣኪ፣ ሃናንዳካ ኦ የቃይዬ ከኦኮኑጝ የማሬ ቦወኑጝ? ⁸ ኤጋንካ የጌያያ ኦይንካ ዎሺሽ እየው ፓይላ/ የማቲያያ ሆድሞዻ/ የጌያኬ ኦጉዋዩ ዋናዻዬ የጌጳዽያያ/ ከኣኩሉክ ዋቲ ሃኦኬና የጌጳዽቴያጝ ኡዋዻ ሃጌጳዽያያ ከእየው፤ ⁹ ናንዳካ ኦ ባሪዮ ሻሜ ኡዋው ሐዋርያጝ፣ ካኮምሼ እንግን ኣርሼኑጝ ሃዋሽኬ ኦኮኑጝ ውር ከኦካ ውር ፓይላ ካሳስክዬ ቱንሱጝ፤ ናንዳካ ፔን ፓይላ፣ ናንዳካ ውርካ ኤርጎዻ ናንዳካ ውርዻ ሃማቲያያ [ትርኢት]። ¹⁰ ኡዋው ሃሺጛ ናንዳካ ክርስቶሴ ሃኣያ ሞኛን፤ ዬ እየው ከክርስቶስ የኣያ ፓካላን፤ ኡዋው ሃኣያ ዻቹጉ፤ ዬ እየው የኣያ ቁዋቃን፤ እየው የኣያ ጊታይ ጎቢዮጝ፤ ዬ ኡዋው ሃኣያ ጊታይ ቦውዮጝ። ¹¹ ሌይ ኣይ ዋዳጝ ካሽ ቃው ኡዋባ፤ ኮርጉ ቃው ኡዋባ፤ ሃቆባባ ቡንዱርቆ፤ ሙር ኡዋባ፤ ሃኣንቴኬን ቶኦዬ ሃጋሊናባ፤ ¹² ሃኣሽክያ ከቡዋ ጉዋዩዬ ሃዻቻባ፤ ጋሺ ኡዋውያጝ ሃኡዋና እንግንባ፤ ዋኬያ ኡዋውያጝ ሃዶንሺያባ፤ ¹³ ካይሲያ ሮጝ ጉዋዩያጝ ሃዋሺቴ እንግንባ ሹቃ፤ ላይ ኣይ ጋኑጝ ዳካካ ፔን ሃማቲያያ ጊታኬናካ ይግ ¹⁴ ሃቶክሼ እየው ይጝ ካሻም እየው ከሃንታ ጊታይ ናኒ ሃናሺዬዬ ካክሊባዬ ጊያ ዬ ሃሺጚ ካቦኩንሲ እየውባዬን። ¹⁵ ኣይኒን ኦጝ ውር ጊታይ ካኮሜኬ ሺ ታጱጝ ዬ ጋያኬ ክርስቶስያጝ ጋኔኬን ሹቡጌን ጁዋኑ፣ ከታካ ክያጃ ሹቃ ሃጅሽያ እንግን ከኢየሱስ ክርስቶሴ። ¹⁶ ዬ ከሙኒንቴ ኣኑጝ ሃይወን እየውባ። ¹⁷ ኣኪ ሃይዕሲሼ እየው ውዋ ናኒ ጢሞቴዎስ እን ናሺዬዬ እን ጌርሚኔዬ ሃናንዳካ ክያጃ እኑጝ፤ እሺዻ ከኦካ ቶኦካ ይሁኔን ጊታይ ጌዬን ኦጉዋይካ ራቁጝ ፓይላ ከእርርሲዬን እን እርርሲዮጝ ከእን ጉሙጝ፣ ከዴንታካ ዻቆ እን ኣይኬ ኢየሱስ ክርስቶሱጝ ሜይሼባ እንግን። ¹⁸ ከኦጉዩ ውር ክየም ክየም የዋሻ ከኦኮኑጝ ካማሬ ዮጝ ጉዩ ኩኔኔ ጋሽክያ ኦካ ጃካማ። ¹⁹ ካኣይባዬ ሃኬ ክያጃካ ታቺ እንያጝ ሃኩንባ ይሪካ ሃሚን ጉዩጝ፤ ጩዋ ማር ውር ጊታጝ ሻሜን ጃካማጵኔኔ፣ የኣንቴ ቁዋቅት ኬና ኣኔን እያኑጝ ሃዎሽያ ቶዬን። ²⁰ ናንዳካኦ መንግስትካ ባሪዮ ማር ክያጃካ ሃሳዋዬኔ ሃክያጃካ ቁዋቅት። ²¹ ኣይባዬ የዎሻ ና? ካቦው ሴጋዬ ካኩዋዋይ? ሞ ካኩዋውኬ ናሺማዬ ከመንፈስካ ክየም ማትዬኔ?