3 ¹ ጪኒጌን ናኒዮ፤ ከክርስቶስ ካኒ ናንዳካጝ የኣይቴ ሃንታጝ፣ ከሜይሼ እየው ከውርካ ኣሩጝ ዬ ካሜይሼ እየው ከውርካ መንፈሱጝ ሃቻሊኬን። ² ካኒ ናንዳካጝ የማርቴ ጌጵሼኑጝ ዎሺሻ እየው ሼቴ ዬ፤ ሃኣይኬን እየው ዳዓኖ ቁዋቃ፤ ኣይኒን ጋኑጝ የኣያ ኣካራ። ³ ካንዻ የኣያ ውርካ ኣሩጝ፤ ከኦካ ጫቃን ጉዩ ጋጝ ቦውዬኔ ዜርማዬ ኣኔባ፤ ኣኪ፣ ሃእን የኣይቴ ውርካ ኣሩጝ ሞ? ኦኬ ኣሽክዬን ጉዩካ ሃኬ እያይ ኣዬኬ ኦኬ ኣሽክዬን ውር ፓይላ ሞ? ⁴ ናንዳካ ኦ፤ ክየም ሺጝ ኣን ሃኣይካ ጳውሎስ፣ ኑዋ ፕር ሺጝ ኣን ሃኣይካ ኣጵሎስያጝ፣ [ማር እን የኣይቴኬ ሹቦ ጉዩጵኔኒ?] ⁵ ኣይባዬ ኣጵሎስ ሃኦ? ኤጳውሎስካ ሃኦ? ታቺ እን ናንዳካ እጝ ኣዬ እየው ክየም ክየሙጝ ሃውርካ ዋድማ ጊታይ ኣሽክዬኑጝ፤ እየውዻ የፓይንቴ ሃምካ እምነቱጝ ሃኬ ታይ ጊዬዪጝ። ⁶ እን ኣን ሃዾቅዮጝ፤ ኣጵሎስ ውሺያ ሙዋ፤ ዬ እን ጌጳሲውጝ ሃባሪዮ። ⁷ ዬ እንካ ጌጳሲ ሃባሪዮ ዬ፣ ማር እን ዾቅዬን ወይ ማር እን ውሺ ሙዋዌን። ⁸ ኣይን እን ዾቂ ኣይን እን ውሺ ሙዋጝ ጋይ ክየም፤ እንግን ክየም ክየም ከእያይ ዋድምዮጝ ቦዋ እንካ ጋዬ እንግኑጝ። ⁹ ኡዋው ሃኣያ ጊታኬና ካኣሽኪኬ ባሪዮ ከጋጝ ክየምጵኔ፤ እየውዻ የኣያ ሃሙካ ባሪዮ፤ የኣያ [ፎቅካ] ባሪዮ። ¹⁰ ከኣይኔን እን ጋዬ ኣን ከኦካ ባሪዮጝ፣ ከውር ኣጁጉ ኬናካ ኣሽክህንቴ ቶኦ ሃካርሲያባ ሃዝዬን፤ ኑዋዻ ኣሽኪባ እን ኩይሼ ታካ ዾዮክ ኔኑጝ፤ ኣይባዬ እንግን ክየም ክየም ሻም እያን ካጋሽክዮጝ ካጋጅሾጝ ኣኔባ። ¹¹ ናንዳካ ኦ ከካርሲ እን ካርሲዬ ሹ እንካ ሌሜኑጝ እንቃ ውር ክየምጵንዻ ኬናካ ቻሊ እንቃ ኣሽክዬን ኣኔኬን፤ ካኣሽኪ እንዻ ሃኢየሱስ ክርስቶስ። ¹² ውር ክየምጵንዻ ከኦካ ቶኦ እን ካርሲዮጝ ከወርቄ ወይ ከቢሬ፣ ከባይ እን ጎቢዮጝ ወይ ከሻሪ፣ ከሹጩ ወይ ከወልጫ ሻማ ጫንቃልያጝ፣ ¹³ ዋድማ ኔኒ ኣዬ እያኑጝ ቶይባ፤ ናንዳካ ኦ ሱ እን ቦሼባ ሃም ኣይ ሜሌሉጝ። ናንዳካጝ ካዹዋልሺኔ ከጉውጝ ጉው እን ዋድማካ ውር ክየም ክየም ኣዬ ኦጝ ፓቲሺባ። ¹⁴ ዋድማ እን ውር ክየም ኣሽክዮጝ ቁዋቅትሼ ዾራያጝ ጌይባ ሹልማት፤ ¹⁵ ዬ እን ዋድማ ኔኒ ጉዱቦጝ ሺዽባ ከኦካ ሽልማት፤ ዬ እሺ ባይሽባ፤ ካኣይባዬ ካባይሾጝ ከጉው ቱዎጝ ሃኬ እያይ ሳጊዬ ከጪንቄቴ ጊያ። ¹⁶ እየው ኤታጋን የኣይቴ ቶኦካ ይሁኔንካ ባሪዮጝ፤ መንፈስካ ባሪዮ ኣኒኔ ኦጉዩ ቱዎጙጝ የእባጃኬን? ¹⁷ ውር ክየምጵንዻ ኮሲያ ቶኦካ ባሪዮያጝ ባሪዮ ኮሲባ እሺዻ፤ ቶኦካ ይሁኔንካ ባሪዮ ሃኬና ይሁሺኔዬ፤ ቶኦካ ይሁኔን እንዻ ሃእየው። ¹⁸ ውር ክየምጵንዻ ካማር እሺ ኤምኑ ቱዋኔን፤ ከኦጉዩ ውር ክየምጵንዻ ሙኔና ኬና ኣኔ ፓካልማሞ ፔኑጝ ክያኒያጝ፣ ካኣዬ ፓካላጝ ካኮምሼ እሺ ኤምኑ ከማይም። ¹⁹ ፓካልማሞካ ፔኑጝ ከኦካ ሌሜንካ ባሪዮ ሃማኛሞዬ፤ ሺጝ እያጜ ቶኳዬ፤ «እሺ ጎምባ ፓካላን ከጃካማ ጊዬይ፤» ²⁰ ከኦካ ራቅ እንቃ ፕር ሺጝ፤ «ታቺ እን ቃቦካ ፓካላን ኣዬ ማም እያይ እባጅባዬ ቶኳ፤ ²¹ ኣኪ ውር ክየምጵንዻ ካማር ከውር ቃይዬን።ኦኬ ፓይላ ሃጉዩዬ፤ ²² ኣይኒን ጳውሎሱጝ ኣይኒን ኣጵሎሱጝ ወይ ኣይኒን ኬፉጝ፣ ኣይኒን ፔኑጝ ኣይኒን ዻቆጝ ወይ ኣይኒን ኣርሼኑጝ፣ ኣይኒን እንካ ጋኑጝ ኣይኒን እንካ ኩዋው ከታካሌሜኑጝ፣ ፓይላ ሃጉዩ፤ ²³ እየውዻ የኣያካ ክርስቶስ፤ ክርስቶስዻ ሃካ ባሪዮ።