10 ¹ ጪኒጌን ናኒ ዮ፤ ሹቡጌን ጉዋዩ ፓይላ ጋኒኔ ከኦካ ሉፍ ዱቡዬ ቁዋልኔ ከኛፓስ ዱቡጝ ከእባጅቶጝ ሃዎሽያ። ² እንግን ፓይላ ከሙሴ ክየም ኣዬን ዱቅዬን ከሉፌ ኛፓሴ። ³ እንግን ፓይላ ጋማ ከኦካ ዳዓኖካ መንፈስ ክየም፤ ⁴ እንግን ፓይላ ማታ ከኦካ ኦኬ ማቴንካ መንፈስ ክየም፤ ከኦካ ባይካ መንፈስ እን ኣኔን እንግን ዻዬኑጝ ማታዬ፤ ባይ እንዻ፣ ሃክርስቶስ። ⁵ ካኣይባዬ ባሪዮ ናንዳካጝ ማሬኬ ጁዋናን ዋዝንዽዬኑጝ ቡድ ቦና ክያኒዬ ሺዽያ። ⁶ እንግን ከእያይ ጋንግርዽዬ ኦኬ ጋራጝ፣ ፕር ኡዋዻ ካማርቴ ኣርግንዽዬኑጝ ኦግታጝ ማቲሼያ ኡዋው ሄክንሶ። ⁷ ዛርሲ ቃባ ናንዳካ ኣምኔኔ ካማቲኔኔ፤ ናሹጛ ካባጚኔንዻ ከእያይ ሺጜ እያይኔ ቶኮጝ፣ ከኦግዬይ ውር ክየም ክየም ከእያይ ሻሞጝ ኦይድ ውር ጊታኬናካ ይሁንቴ ኦግታይ ኣይኬ ኦካ ባሪዮ ሹኑክ ይሁኔን ማቲቴን። ⁸ ከኦግዬይ ውር ክየም ክየም ጋሽኪ ኩጳሞዬ ከሹ ክየም ከእያይ ጉፉቴ ውር ሺ ላማታም ማካሙጝ፣ ኡዋዻ ካማር ኩጳሞ ኣሽክዬን። ⁹ ከኦግዬይ ውር ክየም ክየም ከእያይ ፓታንሲዬ ባሪዮ ቻች እንዼ እንግኔ ካዮጝ፣ ኡዋዻ ካማር ባሪዮ ፓታንሲዬን። ¹⁰ ከኦግዬይ ውር ክየም ክየም ከእያይ ጉንዱምኔዬ ካዬኬ ኦይካ ካይሲውጝ፣ ኦይድ ጉንዱምንቴን። ¹¹ ይን ፓይላ ካኣዬ ሄክንሶጝ ሄክሻ እንግን፤ ቱንሲካ ቦን ሄክሻ ኡዋውጝ ቶኳ ካኡዋው ኣጅሺሼን። ¹² ዬ ውርካጝ ሺጝ ሃዾሪያ ኣኔያጝ ካማር ቡዴኔ ካኣጅሼባ። ¹³ ከኦካ እን ሄክሽ ውር ፓይላጝ ፓታና ኬና ኣይ ዋና ካኒ ሄክሽኬን እየው፤ ባሪዮ ሃሹቃ፤ ዬ ከኦይን የቻሊቶጝ ሳጊ ከፓቲኒቶጝ ኦይድኬን እየው፤ ኣይባዬ ከሹ እን ከፓትኒቶጝ ከቻሊቴ ፓታና ኔኒ ዶንሺዬኑጝ፣ ኣሽክሼባ እየው ጉዋርካ ቱሌን። {ከኦግታይ ኣይኬ ኦኬ ባሪዮ ሹኑኩጝ ኦይድ ክየም ማቲቴን} ¹⁴ ዬ ጪኒጌን ናኒ ዮ፤ ከኦይን ይሁኔ ኦግታይ ኣይኬ ኦካ ባሪዮ ሹኑኩጝ ቱልባ። ¹⁵ ሃሃሳወ ይኑጝ ናንዳካ ውር ጊታይ ጵቅሲዬን ኦኮጝ፤ ናንዳካ ኦይን ሃሃሳዎጝ ይንዻ እየው ኮምቴየ። ¹⁶ እን ሃኡዋንቶጝ ጽዋካ ኡዋኒኔን ማር እንካ ኣይኬ ኒያባካ ክርስቶስ ክየሜኒ? ባላሻ እን ሃፓችቴዻ ማር እን ኣይኬ ኣሩጝካ ክርስቶስ ክየሜኒ? ¹⁷ ባላሻ ኔኒ ኣይባ ክየሜ ኣኔባዬ፣ ኡዋዻ ሃኣያባ ጁዋናኔ ሃኣንቴባዬ ሃኣያ ሩዋ ክየም፤ ኡዋው ፓይላ ሃካሺምናባ ባላሻ ክየም እኑጝ። ¹⁸ ይንዳ ቃቢባ ውርካ እስራኤል፤ ጊታይ ኣሚ ጋላጝ ከጋላ ጋኔኬኒ ክየም ኣዬን ጊዬይ ከጋላ? ¹⁹ ኣኪ፣ ኣይኒን ኦይን ቡልሼ ኦግታይ ኣይኬ ኦካ ሹኑኩጝ እሺ ሃኦኬና ኣኔ ዋጋ እያጝኪ? ²⁰ ማር እያይኔን፤ እን ኣሕዛብ ቡልሼ ጋላጝ ማር ናንዳካ ባሪዮዬኔ ሃናንዳካ ቤሮ፤ ከማቲቴኬ ቤሮ ክየሙጝ ሃዎሺኬን። ²¹ ኒያቡካ ታቺ እኔ፣ ኒያቡካ ቤሮዬ ከማቴ ክየምጵኑጝ የቻሊያኬን፤ ከታካ ታቺ እኔ ከታካ ቤሮዬ ከካሺሚንቶጝ የቻሊያኬን። ²² ካቦዋሲ ታቺ እንኪ? ከቁዋቅቲካ ሃሳጊያባይ ከኦኔኒ? {ነጻ ኣዬንካ ውር ጊታይካ ይሁኔኑጝ} ²³ ኦኬ ፓይላ ጋዬና፤ ካኣይባዬ ኦኬ ፓይላ ጠቅምኬን፤ «ኦኬ ፓይላ ጋዬና ካኣይባዬ ኦኬ ፓይላ ሻምኬን ጫንቃል። ²⁴ ውር ክየም ክየም ዎሽ ጥቅምካ ባይዳ ዬ ዎሽኬን እን ኣይ ኔኒጵን። ²⁵ የክካኔ ሁሉካኬን ቃጊማ ክያኒዬ፣ ኣሩጝ ጊታይ ጉዋሩጝሼ ሃምካ ገበያጝ ቃውባ፤ ²⁶ ዳሊዬ ኦግታይ ኣኔን ቱዎጜ ፓይላ ሃካ ታቺ እኔ። ²⁷ ውርካጝ ማር ኣምኒዬን ቾችንሺ እየወ የዎሻ ፓዬንያጝ ኦይድ ቃግማ ክያኒ ሻወነ እን ቦሼ እየው ፓይላ ኣሚባ። ²⁸ ኣይባዬ ክየም ሺጝ፣ ይን ሃእጝ ቡልሼ ኦግታይ ኣይኬ ኦካ ባሪዮ ሹኑኩጝ ጋላዬ ናንዳካ ውር እን ዋይሼ እየው እያይኔ የሺጛ ናንዳካ መንፈስ ጉዩያጝ ኦይድ ኣምቴን። ²⁹ ሃሺጜ እንዻ ሃናንዳካ መንፈስካ ውር እን ዬ ማር ናንዳካ እየወን ነጻ ኣዬን ናኒካ ሃኦ ካሄንሲዬ ከዴንታካ ውር እንቃጝ? ³⁰ ሃኦኬና ጋሜ ዳዓኖ ከጎሺያጝ፣ ሃናንዳካ ሃኖክዬኬ ኦይን ጎሺዬ ባሪዮጝ? ³¹ ኣኪ የኣምናዻያጝ የማቲናዻያጝ፣ ወይ ኦኬ ክየምጵንዻ ካጝ የሻምቶጝ ፓይላ ጎቢባ ባሪዮ። ³² ኣይኒን ናንዳካ ውርካ ኣይሁዱጝ ኣይኒን ናንዳካ ውርካ ግሪኩጝ ወይ ኣይኒን ናንዳካ ቶኦካ ይሁኔንካ ባሪዮጝ ኦይድ ኦካ ካቲሜኔን ኣዬን፤ ³³ ኣን ሃዎሼ ውር ከኦካ ፓይላ ኬና ኣኔን እያን ዋዝንሲዬኑጝ እየውዻ ሻሚባ እያይ፤ ጁዋናን ካባይሾጝ፣ ማር እንካ ጠቅምሼ ኣኔኔ ሃዎሽባ እንካ ጠቅምሼ እንግኑጝ።