11
1
ኣን ናንዳካጝ ሃሙኒኔ ክርስቶሱጝ እየውዻ ሙኔን ኣንባ። {ይሁኔን እን ኣይ ጋዛጝ}
2
ከኦኬ ፓይላ ናንዳካጝ የቃቢቴ ኣኔ እርርሲኔን እን የቦቴኬ ኦናኒዬ ናንዳካጝ የጎምቴ ሹቃጝ ሃጎሺያ እየው።
3
ኣይባዬ ከእባጅቴ ይኑጝ ሃናሺያ፤ ሹቦካ ጁሙ ፓይላ ሃክርስቶስ፣ ሹቦካ ሃኣጚዻ ሃጁሙ፣ ሹቦካ ክርስቶስዻ ሃባሪዮ።
4
ውር እን ጎቢዬ ይወን ወይ ሃሳው ሃሳዋጝ ኣይን ጁሙ ፓይላጝ ጎብሽባ እሺ ኤምኑ፤
5
ኚያጝ ክየምጵንዻ ጅጝኬን እሺ ኤምኑዬ ይወን ወይ ሃሳው ሃሳዋጝ ጎብሽባ እሺ ኤምኑ፤ ኮምሼ ከእያይ ካሪኔ ጭራሺ ኔኑጝ።
6
ሃኣጚ ማራ እሺ ኤምኑ ጄጜንያጝ፤ ካካሪንቴባ ጭራሺ ኔኒ፤ ጭራሺ ኔኒ ጩትኔን ወይ ካርኔን ማቲ ኬናካ ቦኩንሲ እሺዬ ቶያያጝ ዬ ካጅጝባ እሺ ኤምኑ።
7
ጁሙ እሺ ኤምኑ ጎብሲዬን ኣኔኬን፤ ጁሙ ሃሄክንሶካ ባሪዮዬ ጎብንታዬ፤ ዬ ሃኣጚ ሃጎቢንታካ ጁሙ፤
8
ናንዳካኦ ሃኣጚ ጌይኬ ኦካ ጁሙ ዬ ጁሙ ካኒ ጌይኬን ከኦካ ሃኣጚ።
9
ፕርዻ ሃኣጚ ሙኒሼ ጁሙ ዬ ጁሙ ካኒ ሙኒሼኬን ሃኣጚ።
10
ከክያጃጝ፤ ከክያጃካ ውርካ ኤርጎዻ፤ ሃኣጚ ኣኒኔ ከኦካ ጌጳሞ ዱቡጝ ዹዋልሺኔን እንካ ዹዋልሺኖጝ ካሻምሼ እሺ ኤምኑ።
11
ዬ ከታካ ታቺ እን ሃኣጚ ማር ጁሙ ኣኔንያጝ፤ ጁሙዻ ማር ሃኣጚ ኣኔንያጝ ኣይኬን።
12
ሃኣጚ ከእያይ ጌዬኬ ኦካ ጁሙጝ ፓይላ፤ ጁሙዻ ጅሽባ ከኦካ ሃኣጚ፣ ኣዬባዬ ጌይኔንካ ፓይላ ሃባሪዮ።
13
ይንዳ እየው ኮምቴየ፤ ሃኣጚ ማር እሺ ኤምኑ ጅጜኔ ካይሁኔ ባሪዮጝ ሁሉኩሼባይ?
14
ዬ ሃኣጚ ጌጳሲያ ጭራሺ ኔኒያጝ ካኣዬ ጋራጝ ኣይን ጊታይ ሙኔዻ ካኒ እርርሲኬን እየው?
15
ዬ ሃኣጚ ጌጳሲያ ጭራሺ ኔኒያጝ ማር ጌጳሞ ኔኒዬኒ? ጋዬ እንግን ጭራሺ ራጅሞጝ ካጅጜ እንግን ኤታጋኔ ጊያ።
16
ኣኪ ውር ክየምጵንዻ ዎሻ ናንዳካ ክያጃጝ ዜርምኔንያጝ፤ ኣይን ኡዋውጝ ኣይን ቶኦካ ይሁኔንካ ባሪዮጝ ዱሲምኔን ኬና ኣይኬ ኦጝ ዋናጝ ኣኔኬን። {ምሽካ ቃይካ ታቺ እን}
17
ኣይባዬ ከሹካጝ የፑኡሺምንቶጝ ናንዳካ ኦይን ጎድሲ ዬ ናንዳካጝ ማሬካ ጠቅምኔን ኣዬኑጝ፣ ኤርጎጝ ጋያ እየውያጝ የካኔ ኣኒናኬን ጎቢዬን።
18
ከፓይላ ሌምሼ ከኦካ ቶኦካ ይሁኔን ከሹካጝ የፑኡሺምንቶጝ ከኦካ ጫቃን ጉዩ ላልምኔን ኣኖጝ ሃዋያያ ይንዻ ካቻሊምኔ እያይ ኣዬኑጝ ከካሺዬን ሃኣምንያ፤
19
ከኦካ ጫቃን ጉዩ ጊታይካ ኣኩሉክ ካጌዬ ዋናዬ ካጊባጆጝ፣ ይጝ ከኦካ ጫቃን ጉዩ ዋና ማቲዬን ኣኖጝ ሃጊዲ።
20
ሹካጝ የፑኡሺምንቶጝ እንኬ ኣምቶጝ ማር ምሽካ ቃይካ ታቺ እኔን፤
21
ሹካጝ የኣምንቶ ክየም ማር ኑዋ ካሊዬኔ ኣምባ ዳዓኖ እኑጝ፤ ክየም ካሽ ቃውባዬ ኑዋ ጮይባ።
22
ኣይባዬ ቶኦ ጊታይ የኣምንቴዬ የማቲንቴዬ ኣኔኬኒ? ሞ ከቶኦካ ይሁኔንካ ባሪዮ ቦውዬን የቆብሻባይ ጊታይ ማር ኣኔኑጝ? ኣኪ ካዋይሼ እየው ኦ? ከዳቡጝ ካጎሺ እየውባይ? ክየምጵንዻ ሃጎሺኬን።
23
ኣን እን ሃቦወኬ ኦካ ታቺ እን ሃሳስክሼባ እየው፤ ኢየሱስ ታቺ ሳጊዬ ከምክር እን ጋይኖጝ፤ ቲት ባላሻዬ፣
24
ኡዋኖጝ ጩዋ ጩኬ፣ ሺጝ ይጝ ናንዳካ እየው ካኣዮጝ ሃኣሩጝ ናኒ፤ ሻሚባ ካኣን ቃቢዬን።
25
ፕር ከምሽካ ቃይዻ ጩዋ ቲት [ጽዋዌ] ሺጝ፤ ጽዋጝ ካኣዬኬ ኒያቡ ናኑጝ ሃክያጃ ሃሊ፤ ዬ ከሹካግ የማቴ ጽዋ እኑጝ ሻሚባ ካኣን ቃቢዬን።
26
ከሹ እን ጋሜ ባላሻ እኑጝ፣ ከሹ እን ማቴ ጽዋ እኑጝ ፓይላ ሌይ ሃም ታቺ እን ካኩዋዎጝ የክያጃባ ኣርሼን።
27
ኣኪ ውር ክየምጵንዻ ካማር ሁሉኬኔ፤ ኣማ ባላሻጝ ወይ ማታ ጽዋካ ታቺ እንያጝ፤ ማቲባ ውርካ ባጃካ ኣሩጝካ ታቺ እኔ ኒያቡዬ።
28
ውር ክየምጵንዻ ከኦካ ሌሜንካ እንካ ኣሜ ባላሻጜ ካማቴ ጽዋጜ፤ ካቶይ እሺ ኤምኑ፤
29
ናንዳካኦ ውር ክየምጵንዻ ኣሩጝካ ታቺ እን ካኒ ሁሉኩሼኬን እሺዬ ኣማዬ ማታያጝ እን ኮምሼን ቦኩኖጝ ኣምባ፣ ማትባ።
30
ከኦካ ጫቃን ጉዩ ውር ጁዋኑ ዻቼዬ ዴምኔዬ፣ ውር ክየም ክየም ራጶጝ ሃናንዳካ ክያጃ እኑጝ።
31
ዬ ሃቶያያ ኡዋው ኤታጋንያጝ ዋቲ ማርሼያ ኡዋው ኮምሼን።
32
ኣይባዬ ሹካጝ ታቺ እን ኮምሼ ኡዋው ሃጎራዽያባ፣ ይንዻ ከፔኑጝ ክየምጵንዻ ካኣዬኔ ጊያ።
33
ዬ ጪኒጌን ናኒ ዮ፤ ናንዳካ ኣማ ከሹካጝ የፑጪቶጝ ጋጝ።
34
ከሹካጝ የፑጪቶጝ ካማርሼ እየው ኮምሼን ኣዬኑጝ፤ ውር ክየምጵንዻ ካጝ ካሽ ቃወ ኣኔያጝ ካኣምንቴባ ሃምካ ቶኦ ኔኑጝ፤ ናንዳካ ኦይን ሺዺ ፕር ከሹካጝ ሃኩኖጝ ሃሹዋጵባ።