12 ¹ ጪኒጌን ናኒ ዮ፤ ዬ ፕር ጋን ከእባጅቴ ናንዳካ ኣይኔንካ መንፈሱጝ ሃዎሺያ። ² ውርካ ኣረማውያን ከሹዋን ጊታባ ጋኖጝ ይዕሲሼ እንግን እያጜ ዮጜ ቦሼ እንግን ሃምካ ኮይሞ እን ኣይ ዱዹጝ የእባጃያ። ³ ዬ ውር ክየምጵንዻ ካጝ ሃሳወን ከመንፈስካ ባሪዮጝ፤ ኢየሱስ ሃኬና ጋሺዬ ውር ኬና ሺጝ እያይ ኣኔኬን፣ እያይዻ ማርኬ መንፈስ ገዛ እን ኣዬንያጝ፤ ውር ክየምጵንዻ ኬናካ ሺጝ ኢየሱስ ሃታቺ ማሬካ ኣኔኑጝ ሃሜይሼ እየውባ። ⁴ ኣይኔን ኣይኒን ዋናዋናጝ፣ ዬ መንፈስ ኔኒ ሃክየም፤ ⁵ ዋድማ ኔኒ ኣይኒን ዋናዋናጝ፣ ዬ ታቺ እን ሃክየም፤ ⁶ ኣሽክኔን ኔኒ ኣይኒን ዋናዋናጝ፣ ፓይላዻ እን ኣሽኪኬ ፓይላጝ ዬ ባሪዮ ሃክየም እኑጝ። ⁷ ኣይባዬ መንፈስ ገዛ እን ዹዋልሺኔን ናንዳካ ውር ክየም ክየም ካኣዮውጝ ሃካ ጥቅምካ ጋጝ። ⁸ ናንዳካ ክየም ከመንፈስ እን ጋይባ ሃሳዋካ እባጄን ክያጄን፣ ናንዳካ እንቃ ፕር ከመንፈስ እኑጝ ጋይባ ክያጃካ እባጄን ሃሳወን፤ ⁹ ናንዳካ ክየም ከመንፈስ እኑጝ ጋይባ እምነት፣ ፕር ናንዳካ እንቃ ከመንፈስ ጋይባ ኣይኔንካ ባይሺኔን፤ ¹⁰ ናንዳካ ክየም ኦኬ ሹቃ ኣሽክዬን፣ ናንዳካ እንቃ ሃሳዋ ሃሳወን፣ ፕር ናንዳካ እንቃ ኡሲ ጋራ ጊታይ ዋና ሻሜን፣ ናንዳካ ክየም ልሳን ዋናዋና ሃሳወን፣ ፕር ናንዳካ እንቃ ልሳን እን ሃሳወ ዋናዋናጝ ጋይባ ኣይኔንካ ሆኮልዬን። ¹¹ ጊታይ ፓይላ ኣይኒን ኣይኔንካ መንፈስ ክየም እኑጝ፤ ናንዳካ ውር ክየም ክየም እሺ ኤምኑ ከእያይ ናሺዮጝ ኣዬና። {ሩዋ ክየም ኣኔ ኣሩጝ ጁዋኑ} ¹² ሩዋ ኣኒኒን ኣሩጝ ጁዋኑጝ ሃሩዋጝ ክየም፤ ኣይባዬ ኣሩጝ ኣይኒን ጁዋኑጝ ሩዋ ሃክየም፤ ክርስቶስ ሃእያይ። ¹³ ሃኣያያ ውርካ አይሁድ ወይ ውርካ ግሪክያጝ፣ ካኣይ ካይሲ ወይ ውር ነጻ፤ ኡዋው ፓይላ ካኣይቴ ሩዋ ክየሙጝ ከመንፈስ ክየም እኑጝ ዱቅያ ኡዋው፤ ኡዋው ፓይላ ካማቴ መንፈስ ክየም እኑጝ ጋያ ኡዋው። ¹⁴ ሩዋ ጋሽክዮጝ ሃኬ ኣሩጝ ጁዋኑ ዬ ማርኬ ኣሩጝ ክየሜን። ¹⁵ ጃፍ ሺጝ ኣን ናንዳካጝ ሃማሬ ቡዋ ኣዬኑጝ ሃማር ኣሩጝካ ሩዋወንያጝ ኣሩጝካ ሩዋ ማቲዬን ኔኒ ሺዽባይ? ¹⁶ ናቡዻ ሺጝ፣ ኣን ናንዳካጝ ሃማሬ ካርቡ ኣዬኑጝ ሃማር ኣሩጝካ ሩዋወንያጝ ኣሩጝካ ሩዋ ማቲዬን ኔኒ ሺዽባይ? ¹⁷ ሩዋ ፓይላ ዋቲ ማቲያ ካርቡያጝ፣ ዋዬን ካጌይኬ ኦን? ሩዋ ፓይላ ዋቲ ማቲያ ናቡያጝ፤ ናርሼን ካጌይኬ ኦን? ¹⁸ ኣይባዬ ባሪዮ ከእያይ ናሺዮጝ ክየም ክየም ካሺሼያ ኦጉዋይካ ራቁጝ። ¹⁹ ፓይላ ዋቲ ማቲያ ኣሩጝ ክየምያጝ፤ ዋንቲ ሩዋ ካጌይኬ ኦን? ²⁰ ኣኪ ኣሩጛን ሃጁዋኑ፤ ዬ ሩዋ ሃክየም። ²¹ ካርቡ ካዋይሼ ቡዋ የዎሺሽኬን ኣኑጝ ቻሊኬን፤ ሹቦዻ ካዋይሼ ጃፍ የዎሺሽኬን ኣኑጝ ቻሊኬን። ²² ፕርዻ ኣሩጝካ ሩዋ ጊታይ ሙኔን ዻቹጉጝ ካሎን ሃጊታኬና ካዎሺሽ። ²³ ኣሩጝካ ሩዋ ጊታይ ቦውዮጝ ሳጊ ሃኣያባ ጎቢንታ፣ ፕርዻ ኣሩጝካ ሩዋ ጊታይ ኣይ ኡዋው ሹሙጝ ሳጊ ሃዋሽክሻባ፤ ²⁴ ዬ ኣሩጝካ ሩዋ ጊታይ ጉዋዩ ማር ኡዋው ሹሙ ኣዬኑጝ እን ዎሺሽኬን እየው። ²⁵ እን ሻሚ ይንዻ ከኦካ ጫቃንካ ኣሩጝካ ሩዋ ማር ላልምኔን ኣኔኔ፤ ካቃቢ ጋጝ ልኪዬ ጊያ። ²⁶ ኣሩጝካ ሩዋ ክየም ጋልዬናያጝ ኣሩጝካ ሩዋ ፓይላ ጋልዬንባ ከጋጝ፤ ኣሩጝካ ሩዋ ክየም ጎብያያጝ ኣሩጝካ ሩዋ እንቃዻ ዋዝንዽባ ከጋጝ። ²⁷ ኣኪ እየውዻ የኣያ ሩዋካ ክርስቶስ፤ እየው ክየም የኣያ ኣሩጝካ ሩዋ ኔኒ። ²⁸ ባሪዮ ከኦካ ቶኦካ ይሁኔን ቱዎጝ እንካ ሌሜን ሐዋርያታን፣ እንካ ላንሳጝ ውርካ ቶካ ባሪዮ፣ እንካ ማክንሳጝ ውርካ እርርሲኔን፣ ዻይሼዻ ውር ጊታይ ኣሽክዬን ኦኬ ሹቃጝ፣ ጊታይ ኣኔ ኣይኔንካ ባይሺኔኑጝ፣ ጊታይ ኣኔ ኣይኔንካ ውር ክየምጵንዻ ሻሜ ቶዬኔ ውር ጊታይ ኣኔ ኣይኒንካ ልሳን ዋናዋና ሃሳወኔ ካሺያ። ²⁹ ፓይላ ጋይ ሐዋርያቲ? ፓይላካ ጋይ ውርካ ቶኳ ባሪዮይ? ፓይላካ ጋሽክባይ ኦኬ ሹቃ? ³⁰ ፓይላካ ጋኔባይ ኣይኔንካ ባይሺሼን? ፓይላካ ሃሳወንባይ ከልሳን? ፓይላካ ሆኮልባይ? ³¹ ኣይባዬ ኣይኔን እን ሳጊኬ ፓይላጝ ዎሽባ ከቁዋቅቲ። {ናሺማ} ፕርዻ ሃዹዋልሼባ እየው ጉዋር እን ሳጊኬ ፓይላጝ።