2 وبعد ست أيام ،أخذ يسوع المسيح بطرس ويعقوب ويوحنا لوحدهم ،وطلع معهم لجبل مرتفع،وتغير شكله قُدامهم . 3 ورجعت ملابسه بيضاءتلمع أزيد من الثلج ،مافيش أي مبُيض بالدنيا يُبيض مثله. 4 وظهر لهم إيليا وموسى وكانوا يتكلموا مع يسوع المسيح . 5 بدأ بطرس يقول ليسوع المسيح :"ياسيدي ما أحسن إنوه نجلس هِنا ! ونعمل ثلاث خيام واحدة لك ، وواحدة لموسى ،وواحدة لإيليا" 6 ماعادريش أيش يقول ،لإنو كانوا خائفين مرّه .
7 وجأت سِحابه وظللت عليهم وسمعوا صوت من السحابة يقول:"هذا هو ابني حبيبي إستمعوا لُه!"
8 وفجأه لفتوا لجنبهم،ولا شافوا أحد معهم إلا يسوع المسيح وحده.
9 ولما هم نازلين من الجبل،نبه عليهم مايخبروش أحد باللي شافوه إلا بعد ما يقوم هو من الموت . 10 فعملوا بوصيته ،بس كانوا يتسألوا بينهم البين :" أيش يعني القيامة من بين الأموات؟" 11 وسألونه:"ليش يقولوا اللي يكتبوا التوراة إنوه إيليا لازم يجي أولاً؟" 12 فجاوبهم:"صحيح ، إيليا شِجي أولاً ويصلح كل شيء .وكمان أجى بالكتاب عن اللي رجع بشر(أو /إبن الإنسان) إنوه لازم يتألم كثير ويهتان.
13 لكن أقولكم إنو إيليا أجى فعلاً،وعملو به كل مايشتوا،مثلما هو مكتوب عنه بالكتاب!" 14 ولما وصل لعند باقي التلاميذ، شاف ناس كثيرمتجمعين عليهم وبعض اليهود اللي يكتبوا التوراة يُكارحونهم . 15 ولمــا شافوا الناس يسوع المسيح، اتعجبوا كلهم وجـرو يسلموا علوه. 16 فسأل اليهود اللي يكتبوا التوراة :"على أيش تُكارحونهم (او/ تُناقشونهم)؟" 17 فرد عليه واحد من المتجمعين :"يـا معلم ،جبتو ابني لعندك فيبه شيطان خلو أعجم ، 18 لما يجي لُه،يصرعه على الأرض ،ويرغي بلقفه ويجدم(أو/ يشُد) على أسنانه ويتيبَّس.وطلبتو من تلاميذك يُعالجونه ويخرجونُه، لكن ماقدروش."
19 قلهم يسوع المسيح:"انتم جيل بلا إيمان، لـمتى شجلس معكم ؟لـمتى شتحملكم ؟ هاتوا لي الولد." (أو/ أنتم جيل ماعندكمش إيمان،) 20 فجابونُه لعند يسوع المسيح .مجرد ما شاف الشيطان ليسوع المسيح صرع الولد، ووقع للأرض ،وكان يتمرغ ويرغي بلقفه.
21 فسِئل يسوع المسيح أبوالولد : من متى ذا بدأ يجي لُه ؟فجاوب: من لما هو طفل. 22 ومرات كثير كان يرجم به لبين النار وللماء من شان يقتله .إذا أنت قادر تعمل له شيء ،إرحم حالنا وساعدتنا . 23 فقال له يسوع المسيح :"إذا أنت قادر إنك تؤمن ،فكل شيء ممكن عند المؤمن! " 24 بساعتُه صاح أبوالولد وقال: "أنا مُصدِّق ياسيـد ،ساعدنا عشان يتقوي إيماني الضعيف" 25 ولما شاف يسوع المسيح إنو عدد الناس يكثُروا، نِهِر الشيطان النجس،وقال له :"ياشيطان يا اللي أعجمت هذا الولد وقفلت أذانُه ، أنا أأمُرك إخرج مِنُه ،ولا تدخُلش فيبه مـره ثاني! " 26 فصاح الشيطان وصرع الولـد بقوة وخرج منه ورجع الولد كأنه ميت،فقالوا كثيرمنهم إنو مات .
27 لكن يسوع المسيح مسكه بيده وقيمه،فقام . 28 وبعد ما دخل يسوع المسيح البيت سألونه تلاميذه لوحده :"ليش ما قدرناش إحنا نُخرج الشيطان؟" 29 قلهم :"هذا النوع مايخرجش بشيء إلا بالصلاة والصوم " 30 وخرجوا من هِناك وخلفوا منطقة الجليل، ومايشتيش يسوع المسيح أحد يعرف مكانه. 31 لإنو كان يدرس تلاميذه ويقلهم :"ابن الانسان،شسلمونه ليد الناس ،ويقتلونه،وبعد ما يُقتل يقوم حي باليوم الثالث" 32 بـس مافهموش كلامه.وخافوا إنو يسألونه عن معناته. 33 وبعدين أجاء لكفرناحوم.ولما اجتمعوا بالبيت ،سألهم يسوع المسيح :"على إيش كنتم تتكارحوا بالطريق؟" 34 فسكتوا،التلاميذ وماجاوبوش بشيء،لإنهم كانوا يتكارحوا بالطريق منو الأعظم بينهم؟ 35 فجلس يسوع المسيح،ودعي للاثنعشر تلميذ وقالهم:" إذا احد يشتي يكون الاول،يُخلي نفسه آخر واحد وخادم للكل !" 36 وبعدين أخذ يسوع المسيح ولد صغير ووقفه وسطهم وضمه لحُضنه وقلهم : 37 "اللي يَقَبل طفل مثل هذا إكراماً لإسمي يُعتبر قِبلنا،واللي يقبلنا فهو قِبِل اللي أرسلنا كمان" 38 قاله يوحنا:"يامعلم ،شِفنا واحد يُخرِّج الشياطين بقوة إسمك ،حاولنا إنو نمنعه لإنو ماهوش تبعنا" 39 فقلهم يسوع المسيح:لا تمنعُنوش ! لإنو اللي يعمل معجزة بقوة إسمي ،لا يمكن إنوه يسيء لي بآذي السرعة . 40 لإنُه اللي موش ضدنا فهو معنا . 41 أقولكم الصدق :اللي يسقيكم قلص ماء إكراماً لإسمي لإنكم تبع المسيح ،أجـرُه ماشِضيعش أبدا.ً 42 من كان عقبة قُـدام المؤمنين الصغار اللي يؤمنو بي ،أحسن لُه إنو يربِط حجر مطحن ثقيل على رقبتُه ،ويرجمو به للبحر. 43 إذا كانت يدك تُسبب لك إنو تٌخطئ إقطــعه: أحسن لك إنو تدخل للحياة بيد واحدة،من إنو تكون لك ثنتين يـدات وتدخل لجهنم اللي ماتطفاش. 44 مكان الدود اللي مايموت ،والنارما تطفاش. 45 ولو رجلك شتكون سبب لك إنو تُخطئ إقطعِـــه : أحسن لك إنو تدخل للحياة برجل واحده ،من إنُه يكون لك ثنتين أرجل وتدخل جهنم اللي ماتطفاش. 46 مكان الدود اللي مايموت ،والنار ماتطفاش. 47 ولو عينك شتكون سبب إنُه تُخطئ إقلــعِه :أحسن لك تدخل لمملكة الله بعين واحده، من إنو تكون معك ثنتين عيون وتدخل جهنم . 48 مكان الدود اللي مايموت ،والنار اللي ما تطفاش.
49 لإنُه كل واحد يُملّح بنار،وكل ذبيحة تُملّح بملح. 50 الملح تمام ،بـس إذا راحت ملوحته،كيف نُرجِّع لُه طعمُه؟لازم يكون لكم ملح بأنفسكم ،وعيشوا بسلام بينكم البين!"