8
1
بهذيك الأيام كان في ناس كثير ، ومافيش معاهم حاجة ياكلنه ، فدعا يسوع لتلاميذه وقلهم:
2
"أشفق على الناس هاذوم لهم ثلاث أيام جالسين معي وما فيش معاهم حاجة ياكلنه .
3
لو رجعناهم لبيوتهم جاوعين شيدخوا بالطريق ، لأن بعضهم جاء من مكان بعيد."
4
فتلاميذه قالوا له: "كيف شيقدر واحد يشبع هاذوم خبز وإحنا باذه الخبت ؟"
5
فسالهم: "كم به معاكم خبز؟" فقالوا له: "سبع حبات."
6
فكلم الناس يجلسوا على الأرض ، واخذ السبع الحبات الخبز ، وشكر الله وقسمه وجاب لتلاميذه عشان يوزعنه بين الناس ، فوزعوه .
7
وكان به قليل سمك صغير ، فيسوع شكر الله وكلم تلاميذه يوزعوه كمان .
8
والناس اكلوا لما شبِعوا ، وبعدين التلاميذ رفعوا باقي الأكل بسبع سلال .
9
واللي أكلوا كانوا حوالي اربعه الف شخص . وبعد كذا يسوع روحهم
10
وطلع القارب مع تلاميذه ومشي لمنطقة دلمانوثة .
11
وبعدا جاءوا شيوخ اليهود وجلسوا يتناقشوا مع يسوع ، فطلبوا منه معجزة من السماء عشان يختبروه .
12
فتنهد وقلهم: "ليش الشعب اذه يشتي معجزة؟ أقلكم الصدق ، الشعب اذه ماشيحصل ولا معجزة!"
13
وبعدا سيبهم ورجع للقارب ومشي للساحل الثاني .
14
وتلاميذه نسوا يشلوا معاهم خبز ، ومافيش معاهم بالقارب إلا خبزه .
15
ووصاهم يسوع وقلهم: "اِنبتهوا! واحذروا من خبز شيوخ اليهود وخبز الملك هيرودس."
16
وتكلموا بينهم البين: "ما فيش معانا خبز!"
17
ويسوع عرف وقلهم: "ليش تتكلموا بينكم البين انوه ما فيش معاكم خبز؟ لحد الآن ما فهمتمش وما عرفتمش؟ للآن قلوبكم مقفلة؟
18
ما فيش معاكم عيون تشوفوا وآذان تسمعوا؟ ما تذكروا
19
لما قسمتوا خمس حبات خبز بين خمسه الف شخص؟ كم سلال مليان بقين؟" قالوا له: "ثنا عشر."
20
"ولما قسمتوا السبع الحبات الخبز بين اربعه الف شخص ، كم سلال مليان بقين؟" فقالوا له: "سبع حبات."
21
فقلهم: "لحد الآن مافهمتوش؟"
22
وجاء لقرية بيت صيدا ، وجابوا لعنده رجال أعمي وطلبوا مُنه يلمسه .
23
فمسك بيد الأعمي وقاده لخارج القرية ، وتفل لعيونه ، وطرح ايديه علوه وسأله: "تشوف شيء؟"
24
فشاف لعنده وقله: "اشوف الناس تمشي مثل الأشجار!"
25
فطرح يسوع ايديه فوق عيون الرجال مرة ثانية . ولما الرجال فتح عيونه وشاف ، رجع صحيح يشوف كل شيء تمام .
26
فرسله لبيته وقله: "لاتروحش القرية."
27
ومشي يسوع وتلاميذه لقرى قيصرية فيلبس ، وبالطريق سأل تلاميذه: "الناس إيش يقولوا عليا ، من أنا؟"
28
فقالوا له: "ناس يقولوا عليك يوحنا المعمدان ، وناس يقولوا عليك إيلياء ، وناس يقولوا عليك واحد من الأنبياء."
29
فسألهم: "وانتم إيش تقولوا عليا ، من أنا؟" فجوب له بطرس: "أنت المسيح."
30
فقلهم يسوع إنتبهوا تكلموا أي واحد عليا .
31
وبدأ يُعلمهم أن ابن الإنسان لابد يتوجع كثير ، ومايقبلش الشيوخ ورؤساء الكهنة والفقهاء وشيقتل ، وبعد ثلاث أيام شيقوم حي .
32
وتكلم باذه الموضوع بالصوت قُدام الجميع ، فشله بطرس على جنب وجلس يلومه .
33
فالفت وشاف لعند التلاميذ ، وصيح على بطرس وقله: "أمشي من قُدامي ياشيطان! أنت تفكر مثل البشر ومش مثلما يفكر الله."
34
وبعدين دعا للناس والتلاميذ وقلهم: "اللي يشتي يتبعني ، لابد علوه ينسى نفسه ، ويتحمل صليبه ويتبعنا .
35
لإنو اللي يشتي ينقذ حياته يضيعه . أما اللي ضيع حياته عشاني وعشان رسالة الإنجيل فإنو ينقذه .
36
لإنو إيش بايستفيد الإنسان لو ربح العالم كُله ، وضيع نفسه
37
إيش بايجيب الإنسان فدية عن نفسه؟
38
لإنو اللي يستحي مني ومن كلامي قُدام هاذه الشعب الفاسق العاصي ، يستحي منه ابن الإنسان لما يجي عند مجد أبي مع الملائكة الطاهرين."