2 وأجاءوا له بعض من اللي يكتبوا التوارة بسؤال عشان يختبروه ، وقالوا له " هل هو حلال أنه الرجال يطلق مرته ؟ " 3 فجاوب : " بأيش موسى وصيكم ؟ " ، 4 قالوا له " موسى سمح أنو نكتب شهادة طلاق وبعدين الزوجة تتطلق . " 5 قال لهم يسوع " هذا بسبب قساوة قلوبكم موسى كتب لكم هذي الوصيه . 6 بس من بدايه الخليقة جعل الله الأنسان ذكر وأنثى . 7 وهذا السبب الرجال يسيب أبوه وأمُه ويرتبط بمرته . 8 ويكونوا الأثنين جسد واحد ومن اذاك الوقت هم واحد مش اثنين . 9 واللي جمعه الله ما يفرقوش الإنسان. " 10 وفي البيت ، تلاميذه عادوا وسألوه عن هذا الأمر . 11 فقلهم " اللي يطلق مرته ويتزوج بواحدة ثاني ، يزني بها . 12 وإذا المره طلقت زوجها وأتزوجت واحد ثاني ، تكون ارتكبت الزنى !" 13 وأجاءوا له ناس مع الجُهال علشان يلمسهم ، بس التلاميذ لاموا اللي جابوهم. 14 ولما شاف يسوع هذا زعل وقال لهم " خلوا الجُهال يجيئوا لعندي لا تمنعوهمش ، لإنو الله يُدخل لمملكته مثلهم . 15 وأقول لكم الحق ، اللي ما يقبلش مملكة الله مثل الجاهل الصغير مش دخلهاش . " 16 وبعدين حضنهم ، وطرح أيديه عليهم وباركهم . 17 ولما قده شيخرج للطريق، جري لعنده رجال وسجد له وسأله : " يا معلم الصالح ، أيش اعمل عشان أورث الحياة الأبدية ؟" 18 بس يسوع قال له " ليش تدعيلي بالصالح ؟ مافيش صالح الا الله وحده. 19 انت تعرف الوصايا : لا تقتلش و ماتزنيش وماتسرقش، وماتشهدش زور ، وما تظلمش احد ، وأبوك وامك كرمهم ." 20 الرجال قله : " يا معلم ، من وانا عادنا صغير أعمل بكل هذن الوصايا . " 21 فشاف له يسوع بحب وقال له " ناقصك حاجه واحده : روح وبيع كل اللي معك ، ووزع ثمنه على اللي هم فقراء ، عشان يكون معك كنز بالسماء، وبعدين تعال وتبعني. " 22 فزعل الرجل من هذا الكلام وراح وهو مهموم، لانه كان غني كثير.
23 فتلفت يسوع لعنده وقال لتلاميذه : " كم هو صعب على الأغنياء انهم يدخلوا لمملكة الله ! " 24 فاستغربوا التلاميذ من كلامه . فقلهم يسوع مرة ثانيه: يا أولادي كم هو صعب الدخول لمملكة الله ! 25 مشي جمل من خزق إبرة أسهل من أنو واحد غني يدخل لمملكة الله ! " 26 فأستغربوا التلاميذ زيادة وقالوا بينهم بين " على كذا منو شيقدر انو ينجو ؟ " 27 فشاف لهم يسوع وقال : " الناس ما يقدروش ، بس الله يقدر ، لان الله على كل شيء قدير."
28 فقله بطرس : " نحنا تركنا كل حاجه وتبعناك . " 29 فقال يسوع " اقول لكم الصدق : اللي يسيب بيت أو إخوة او أخوات او ام او أب او اولاد او مزارع علشاني وعلشان الإنجيل. 30 شيحصل بيذي الدنيا ، حتى مع المُضايقات، مية مرة من البيوت والاخوة والاخوات والامهات والاولاد والمزارع ، وفي الاخرة شيحصل حياة أبدية. 31 وكثير اللي هم بالأول هنا شيكونوا في ألاخير هناك ، واللي هم في الأخير هنا شيكونوا بالاول هناك . " 32 وكانوا بالطريق شيطلعوا لمدينة القدس ،ويسوع كان يمشي قُدامهم . وكانوا التلاميذ مُستغربين ، والناس اللي تبعونه كانوا خايفين . فيسوع شل الأثنى عشر التلميذ مرة ثانية لوحدهم ، وكلمهم باللي شيوقع له. 33 فقال : " إنتبهوا ! إحنا بالطريق للقدس ، وشُيسلم اللي كان ابن الإنسان لرؤوساء الكهنة والمتدينين ، وشيحكموا علوه بالموت وبعدين شيسلمونه للأجانب. 34 وشيتمسخروا بُه ، وشيتفلوا علوه ، وشيجلدوه ، وشيقتلوه . بس هو شيقوم حي بعد ثلاث أيام " . 35 وراح لعنده يعقوب ويوحنا اللي هم أولاد زبدي وقالوا له : " يا معلم ،نشتيك تعمل اللي كل نطلبه منك . " 36 فقلهم : " أيش تشتوا أعمل لكم ؟ " 37 فقالوا له : " خلينا نجلس بمجدك واحد عند يمينك والثاني عند شمالك . " 38 فقلهم يسوع : " انتم مش عارفين أيش تطلبوا : تقدروا تشربوا الكأس اللي شربته انا ، ولا تغوصوا بالأوجاع اللي أنا اغوص فيها ؟ " 39 فكلموه : أيوه نقدر . " فقلهم يسوع " الكأس اللي أنا شاشربه شتشربونه والأوجاع اللي شاغوص فيها أنتم شاتغوصوا بها. 40 اما الجلوس عند يميني و شمالي ، مش هو لي علشان أجيبه ، هو للناس اللي أتجهز لهم.
41 ولما العشرة التلاميذ سمعوا بهذا ، زعلوا من من يعقوب ويوحنا. 42 فدعي لهم يسوع وقلهم : " تعرفوا انو اللي يعتبروا انفسهم حكام على الناس يتسيدوا عليهم والعظماء حقهم يحكموا عليهم. 43 أما أنتم ما شيكنوش هذا بينكم ، واللي يشتي منكم يكون عظيم ، يكون خادم بينكم . 44 واللي يشتي يكون الأول بينكم ، يكون عبد للناس كلهم. 45 لانو اللي رجع ابن الإنسان ماجاش عشان الناس تخدمه إنما اجاء عشان يخدمهم ويضحي بنفسه أضحيه على ناس كثير . 46 وبعدين وصلوا لأريحا ، ولما قده شيخرج من أريحا ، ومعه ناس مليان والتلاميذه حقه ، كان برتيماوس الاعمى ابن تيماوس جالس جنب الطريق يشحت. 47 ولما سمع انه يسوع الناصري ،جلس يصيح : " يا يسوع يابن داود إرحمنا !" 48 فصيحوا ناس كثير فوقه وقالوله : " اسكت . " بس هو زاد يصيح أكثر : " يا ابن داود إرحمنا ! " 49 فيسوع وقف وقال : صيحو له ، فصيحوا للأعمى وقالوا له : " أتشجع وقوم ، يسوع يدعي لك . " 50 فرجم بالثوب حقه ، وقفز وراح لعند يسوع. 51 يسوع سأله : " أيش تشتيني اسوي لك ؟ الأعمى قال له : " يا سيدي انا أشتي أشوف . " 52 يسوع قال له : " امشي والأيمان حقك قاشفيك ! وهذيك الساعة شاف ، وتبع يسوع في الطريق.