11 ¹ ولما قاقتربوا من القدس ، وصولوا بقرية بيت فاجي وقريه بيت عنيا اللي عند جبل الزيتون ، يسوع رسل أثنين من تلاميذه ، ² وقلهم : " روحوا للقرية اللي أمامكم وأول ما تدخلوها شتحصلوا حمار مربوط ما قد ركبش علوه ولا واحد ، فكموه وجيبوه لهنا. ³ واي واحد يقول لكم : " ليش تعملوا كذا ؟ قلوله : " السيد يحتاج له ، وشيرجعه لهنا على طول . " ⁴ فمشوا التلاميذ ، وحصلوا الحمار مربوط على واحد من الابواب بخارج على الطريق ففكوا الحمار. ⁵ فقالوا لهم بعض الناس اللي كانوا واقفين هناك : " أيش تعملوا ، ليش تفكوا الحمار ؟ ⁶ قلو لهم مثلما وصيهم يسوع ، فسيبوهم. ⁷ فجابوا الحمار لعند يسوع، وحطوا ملابسهم فوقه، فركب علوه. ⁸ وناس كثير فرشوا الثياب حقهم على الطريق، وناس ثانين فرشوا أغصان قطعوها من المزرعة. ⁹ والناس اللي كانوا امامه واللي وراءه يصيحوا : " الجلال ! مبارك الجاي باسم الرب. ¹⁰ تباركت المملكة حق أبونا اللي ننتظرها . الجلال في الأعالي"

¹¹ وبعدين يسوع دخل القدس ، ومشي لبيت الله ،وشاف لكل ما يحصل فيبه. والوقت قاكان مُتأخر، فخرج مع الأثنى عشر لبيت عنيا . ¹² وبيوم ثاني ، لما مشوا من بيت عنيا ، جِوع. ¹³ فشاف من بعيد شجري تين فيها ورق، فمشي لعندها لعلى وعسى يحصل فيها قليل من التين ، ولما وصل لعندها ماحصلش ولا حاجه الا ورق ، لانه ماكانش موسم التين. ¹⁴ فكلم الشجرة : " مافيش ولا واحد شيأكل منك أبداً . " وسمعوا تلاميذه هذا الكلام . ¹⁵ وبعدين وصولوا للقدس ومشي يسوع لبيت الله ، وجلس يطرد اللي يبيعوا ويشتروا هناك. وقلب مناضد الصيارف وكراسي تجار الحمام، ¹⁶ وماسمحش ولا لواحد انه يمشي بساحة البيت ومعه حاجات يحملها. ¹⁷ وعلمهم وقال: " يقول كتاب الله : " البيت حقي يُسمى بيت الصلاة لكل الشعوب ، بس انتم خليتموه كهف لصوص . " ¹⁸ وسمعوا رؤساء الكهنه والمتدينين ، وجلسوا يدوروا على طريقة عشان يقتلوه ، لانهم كانوا خايفين منه ولانو الشعب كله كان معجب زيادة بتعليمه. ¹⁹ ولما المساء اجاء ، يسوع خرج المدينة مع تلاميذه . ²⁰ ولماقاهم راجعين في الصبح ، شافوا شجرة التين يبست من الجذور. ²¹ بطرس أتذكر وقال له : " ياسيدي، شوف ! هذه شجرة التين اللي انت لعنتها قايبسه. ²² يسوع جوب عليهم : " أمنوا بالله ". ²³ اقول لكم الصدق ، اي واحد يقول لهذا الجبل : " روح من هنا واسقط بالبحر ، ومايشكش بقلبه ، ويؤمن باللي يقوله بانه شيحصل ، شيوقع من صدق. ²⁴ لهذا انا أقول لكم ، اللي تطلبونه في الصلاة ، أمنوا انكم حصلتم علوه من صدق ، فيعطى لكم . ²⁵ ولما تقيموا الصلاة ، سامحوا اللي أخطأ بحقكم ، علشان يغفر لكم أبوكم اللي بالسماء ذنوبكم كمان. ²⁶ وإذا ماتسامحتموش ،أبوكم اللي بالسماء مشغفرش لكم ذنوبكم . " ²⁷ ورجعوا مرة ثانيه للقدس . ولما كان يسوع يتمشي بالساحة حق بيت الله ، أجاءوا له رؤوساء الكهنة والمتدينين والشيوخ ، ²⁸ وقالوا له : " على أي أساس تعمل هذي الحاجات ؟ ومنو اللي جاب لك السلطة علشان تعمل بها ؟ " ²⁹ فقلهم : " وأنا شسألكم سؤال ، جاوبُنا علوه علشان أقول لكم ايش من سلطة أنا اعمل هذه الحاجات : ³⁰ المعموديه كانت من السماء ولا من الناس ؟ جاوبونا . " ³¹ جلسوا يتشاوروا وقال بينهم البين : " إذا قلنا : الله ، شيقول لنا : إذن ليش ما تؤمنوش به ؟ ³² أيش رايكم نقول : " الناس ؟ " بس هم خافوا من الشعب ، لأن الناس كلهم يعتبروا يوحنا انُه نبي بالحق. ³³ فجاوبوا وقالوا ليسوع : " ما نعرفش. " فقال لهم يسوع : " وانا مشقولش ايش من سلطة أعمل هذه الأشياء. "