12 ¹ وجلس يُكلمهم بأمثال وقال : " زرع رجال مزرعة ، وعمل جمبها جدار ،وحفر داخلها حوض معصره ،وبني فيها برج عشان الحراسة ، وبعدين أجرها لمُزارعين وسافر للخارج. ² ولما قده موسم ،أرسل بعبد لعند المُزارعين عشان ياخذ منهم نصيبه من ثمر المزرعة. ³ فمسكوا العبد وضربوه ورجعوه فاضي اليدين. ⁴ فأرسل لهم بعبد ثاني ، وهم ضربوه على رأسه وعوروه واهانوه. ⁵ فأرسل لهم واحد ثاني فقتلوموه .وبعدين أرسل لهم عبيد كثير غيرهم ، فضربوا منهم وقتلوا بعضهم . ⁶ وماعد بقيش للرجّال إلا ابنه اللي يحبه ، فأرسله أخيراً لعندهم كمان، وهو يقول " أنهم شيحترموا ابني! ⁷ بس المُزارعين قالوا بينتهم البين : "هذا هو الوارث. تعالوا نقتله علشان الميراث يكون لنا ." ⁸ مسكوه وقتلوه ورجموا به لخارج المزرعة . ⁹ فأيش يعمل صاحب المزرعة ؟ يجي ويقتل المُزارعين ويشل المزرعة ويعطيها لغيرهم . ¹⁰ ما قريتموش هذي الآيه : الحجرة اللي ما يشتوهاش البنائين ، هي نفسها تكون الحجرة حق الزواية ! ¹¹ هذا كان من الرب ، وهي حاجه عجيبة بنظرنا ؟ " ¹² فحاولوا أنهم يمسكوا بُه لأنهم عرفوا إنو قال المثل عليهم ، بس خافوا من الناس ، فسيبوه ومشوا. ¹³ وبعدين أرسلوا لعنده ناس من اللي يكتبوا التوارة ومن الهيردوسيين عشان يخلوموه يُخطيء بكلامه. ¹⁴ فمشوا لعنده و قالوا له : " يامعلم ، إحنا عارفين انك رجّال نزيه ، وما تخافش من حد ، وما يهمكش مكانة الناس ، إنما تُعلم طريق الله بالصدق . هل حلال أنو نسلم الضريبة لقيصر ولا لا ؟ ندفع ولا ما ندفعش؟" ¹⁵ فعرف بمكرهم ، وقلهم: " ليش تشتوني أخطيء بكلامي؟ جيبوا لي فلس واحد عشان أشوف ." ¹⁶ فجابوا لُه ، فقلهم : " صورة من هذي ، وأسم من هذا ؟ " قالوا : " قيصر . " ¹⁷ فقلهم يسوع : " سلموا اللي هو لقيصر لقيصر ، واللي هو لله لله . " فأستغربوا منه. ¹⁸ وجاءوا له بعض من الناس اللي هم صادقين اللي مايأمنوش بالقيامة ،وسألموه قائلين: ¹⁹ " يامعلم ، موسى جاب لنا هذي الوصية ، إذا في رجال مات وترك وراءه زوجه وما خلفش ابن ، وكان لهذا الرجّال أخ ، فالأخ يشل الحرمة الأرمله ويجيب منها أولاد على اسم اخوه. ²⁰ " وفي كانوا هناك سبعة أخوة ، الأول أتزوجها ومات وماخلفش منها أولاد . ²¹ والثاني تزوجها ومات ومخلفش منها أولاد وكمان الثالث عمل نفس الشيء. ²² أتزوجوها السبعة كلهم وماتوا وماخلفوش أولاد . ومن بعدهم ماتت الحرمة كمان . ²³ بيوم القيامة ، لما يقوموا الأموات ، لمن شتكون الزوجة ؟ لإنو السبعة أتزوجوها ." ²⁴ فجاوبهم يسوع : " انتم ضايعين ، لأنكم مش عارفين كتاب الله ولا قوة الله ! ²⁵ لما الاموات يقوموا ، ما يتزوجوش ،ولا يزوجوا ، إنما هم يرجعوا مثل الملائكة في السماء. ²⁶ أما من جهة قيامة الأموات ، ماقريتموش التوراة حق موسى ،في الموضوع حق الشجيرة انو الله قال له : " انا رب إبراهيم ورب إسحاق ورب يعقوب ؟ ²⁷ هو رب ألأحياء مش رب أموات . أنتم اذن ضايعين كثير." ²⁸ وكان واحد من المُتدينين قاجاء وسمعهم يتناقشوا ، ولما شاف انُه يسوع عرف يجاوب عليهم ،سأله : " أيش اهم الوصايا كلهن ؟ " ²⁹ فجاوب يسوع : " أهم وصية هي : أسمع يا إسرائيل ، الرب إلهنا هو الله الأحد. ³⁰ فاحب المولى إلهك من داخل قلبك ، ومن داخل نفسك ، ومن داخل فكرك وبكل قدرتك . ³¹ والثانية هي " أحب الأخرين مثلما تحب نفسك . ومافيش ولا وصيه اهم من هذي الثنتين . " ³² فقلو الرجال المُتدين : " تمام يا معلم ! أنت على حق إنو الله واحد ومافيش إله غيره. ³³ وأن نحبه من داخل قلوبنا وبكل فكرنا وقدرتنا ، وانُه نحب الآخرين مثلما نحب أنفسنا ،أفضل من القرابين والضحايا . " ³⁴ ولما شاف يسوع إنو جاوب بالعقل قال له : " انت مش بعيد من مملكة الله . " وبعدين ما جرأش ولا واحد انو يسأله أسئلة ثانية . ³⁵ ولما كان يسوع يُعلم في بيت الله ، قال " كيف يقولوا المُتدينين انُه المسيح هو ابن داود ؟ ³⁶ لانُه داود نفسه ، قال بوحي الروح القدس : قال الله لسيدي " إجلس عند يميني عشان أشل اعدائك واحطهم تحت أرجلك ؟. " ³⁷ فداود نفسه يدعي المسيح سيده ،كيف شيكون المسيح ابنه ؟ وكانوا ناس مليان يسمعوا يسوع بفرح. ³⁸ وقال بالتعليم حقه : " أنتبهوا من الناس المُتدينين اللي يحبوا انهم يتجولوا بملابس طويلة وحلوه ، والناس يسلموا عليهم بالساحات العامة ، ³⁹ ويكونوا بالصف الأمامي في بيت العبادة ، وانهم يجلسوا على كراسي الشرف بالولائم ، ⁴⁰ وهم يسرقوا فلوس الأرامل ، ويجلسوا يصلوا صلاة طويلة عشان الناس تشوفهم . لهذا هم شيحصلوا أقوى عذاب . ⁴¹ وجلس يسوع امام الصندوق حق التبرعات اللي في بيت الله . وجلس يراقب الناس اللي يحطوا الفلوس لوسطه ، وكان في ناس أغنياء يحطوا فلوس كثير. ⁴² وبعدين أجاءت أرملة فقيره وحطت في الصندوق فلسين قيمتهم قليل. ⁴³ فصيح لتلاميذه وقلهم : " اقول لكم الصدق ، هذه الأرملة الفقيرة حطت في الصندوق أكثر من اللي حطوه الناس الثانين كلهم . ⁴⁴ لأنهم كلهم أعطوا من اللي هو زياد عندهم ، بس هي جابت اللي تحتاجه كل اللي عندها ، جابت كل المعيشة حقها! "