3 ولما كان جالس عند جبل الزيتون مقابل بيت الله ، بُطرس ويعقوب ويوحنا وأنداروس سألوه لوحدهم. 4 قُل لنا: متى شيحصل هذا ؟ وايش هي العلامة اللي تبين على وقوعه ؟ " 5 فقلهم يسوع : " أنتبهوا من أنو واحد يضيعكم . 6 شيجئوا ناس كثير بأسمي وشيقولوا : أنا هو، وشيضيعوا ناس كثير. 7 ولما تسمعوا عن الحروب والاخبار حق الحروب ، لا تتضايقوش ، لانو هذا لازم يحصل، بس هذه مش النهايه. 8 وشتقوم أمة على أمة ، ومملكة على مملكة ، وشيحصل زلازل بأماكن كثير ، وشيحصل جوع . هذي بداية الأوجاع . 9 أنتبهوا لنفسكم . لانو بسببي شيشلوكم للمحاكم ، وشتجلدوا في بيوت العبادة . وشتوقفوا أمام حكام وملوك بسببي علشان تشهدوا لهم . 10 ولازم انو البُشرى تتوزع عند الشعوب كلهم . 11 ولما يمسكوكم ويشلونكم . لا تقلقوش من بدايتها على اللي شتقولوه ، إنما قولوا اللي شيجي لكم بهذيك الساعة . أنتم مش اللي شتتكلموا ، اللي شيتكلم هو الروح القدوس . 12 والأخ شيسلم أخوه للموت ، والأب شيسلم ابنه ، والأولاد شيقوموا على والديهم وشيقتلوهم . 13 وكل الناس شيكروههم بسببي . بس اللي شيجلس للنهاية هو اللي شيعيش. 14 ولما تشوفوا نجاسة الخراب موجودة بالمكان اللي مايصلحش تكون فيه ، ليعرف القارئ ! عندئذ اللي بمنطقة يهوذا ، لازم يهربوا لعند الجبال . 15 واللي كان بالسقف ماينزلش وما يدخلش يأخذ اللي ببيته . 16 واللي كان بالمزرعة ، ما يرجعش يشل ثوبه. 17 والويل للحوامل والمُرضعات بيهاذيك الأيام . 18 صلوا عشان ما يحصلش هذا بالشتاء. 19 لانو شيوقع بيهاذيك الأيام ضيق ما قا حصلش مثله من لما الله خلق بداية العالم لهذي اليوم وما شيتكررش أبداً . 20 لولا انو الرب قد اختصر هذيك الأيام ، لما نجي واحد من بني آدم ، بس عشان اللي المختارين اللي اختارهم الله ، هو أختصر هذيك الأيام. 21 إذا قلكم واحد : " المسيح هنا ولا هناك ، لا تصدقوش . 22 لأنو شيظهروا اكثر من مسيح كذاب ومن نبي كذاب،وشيعملوا آيات ومعجزات عشان يضيعوا اللي أختارهم الله ، اذا قدروا . 23 إذن أنتبهوا ، أنا قا خبرتكم بكل حاجه عادها ما حصلتش . 24 وبعد هاذك الضيق ، الشمس شتكون ظلمة ، والقمر ماشيضوييش، 25 والنجوم شتفلت من السماء، وشتهتز القوات اللي بالسماء. 26 وبعدين الناس شتشوف اللي كان بشر جاي بين السحاب بقوة كبيرة ومجد. 27 وبعدين شترسل الملائكة وشيجتمع اللي اختارهم من الشرق والغرب والشمال والجنوب ، من كل مكان تحت السماء .
28 " اتعلموا هذا الدرس من شجرة التين : لما تلين الأغصان حقها ويطلعين أوراقها ، تعرفوا انو الصيف قاهو قريب . 29 وكمان ، لما تشوفوا هذي الأمور تحصل ، أعرفوا أنو اللي كان ابن الإنسان قاهو قريب ، إنما قده على الأبواب. 30 أقول لكم الصدق ، كل هذه الحاجات شتحصل قبل ما يموت هذا الجيل . 31 السماء والأرض شتختفي بس كلامي مشختفيش . 32 " ما فيش ولا واحد يعرف متى شيوقع هذيك اليوم ولا الساعة ، لا الملائكة اللي بالسماء ، ولا الابن ، إنما الأب وحده هو اللي يعرف. 33 إنتبهوا ! إسهروا! لأنكم مش عارفين متى شيحصل هذا الوقت . 34 مثل الرجال اللي سيب بيته وسافر لمكان بعيد ، وجاب لخدامة المسئولية التصرف كل واحد في عمله ، ووصي البواب انو يسهر. 35 إسهروا إذن ، لأنكم مش عارفين متى شيجي صاحب البيت ، يمكن في المساء، ويمكن في نص الليل او يُمكن في الفجر او في الصبح. 36 عشان ما يجيش فجأة ويلاقيكم راقدين. 37 واللي أقول به لكم ، أقول به للجميع : أسهروا!