4 وبعدين قلهم: "يجوز يوم السبت نعمل خير و الا شر؟ نحيي نفس و الا نميته" وسكتوا . 5 فالفت لعندهم وهو زعلان ومضايق من قساوة قلوبهم . وقال للرجال اللي ايده يابس: "مُد ايدك." فمده ، وبسرعة ايده اتعافت. 6 وبذاك الوقت خرجوا شيوخ اليهود من المعبد ، واتفقوا مع الهيرودسيين عشان يقتلوا المسيح . 7 ومشى المسيح مع تلاميذه للبحيرة بعيد من الناس ، لكن كان في ناس كثير مشوا بعده جاءوا من مناطق الجليل، 8 ويهوذا ومن القدس وأدومية و من وراء نهر الأردن ، وصُور وصيدا ، كُلهم جاءوا لعند المسيح لأنهم سمعوا عن الحاجات اللي عملها . 9 فكلم يسوع تلاميذه يجهزوا له قارب عشان الناس ما يزاحموه . 10 لإنو كان شفى ناس كثير ، فاللي كان فيبه مرض كان يسرع لعنده عشان يلمسه . 11 فكانت الشياطين ، لما تشوفه ، تسجد له وتصيح: "أنت ابن الله." 12 فكان يحذرهم ما يتكلموش علي اللي يعمله . 13 وبعدين طلع المسيح للجبل ، ودعا للي يشتيهم ، وجاءوا لعنده . 14 فاختار اثنا عشر منهم عشان يكونوا معه على طول ، ويُرسلهم عشان يبشروا ، 15 ويكون لهم قدره يشفوا الامراض ويخرجوا الشياطين . 16 والاثنا عشر اللي اختارهم هُم: سمعان اللي سماه بطرس ، 17 ويعقوب بن زبدي ، ويوحنا أخوه وسماهم بوانرجس اللي يعني أولاد الرعد. 18 وأندراوس ، وفيلبُس ، وبرثلماوس ، ومتى ، وتوما ، ويعقوب بن حلفى ، وتداوس ، وسمعان القانوني ، 19 ويهوذا الإسخريوطي اللي خانه . 20 وبعدين مشي للبيت ، والناس تجمعوا مرة ثانية وما قدرش يسوع والتلاميذ حتى ياكلوا . 21 ولما سمعوا أهله ، اجاو لعنده عشان ياخذوه ، لإنهم قالوا إنو قده مجنون . 22 لكن اليهود اللي يكتبوا التوراة اللي جاءوا من القدس قالوا: "انه فيبه شيطان وهو يخرج الشياطين برئيس الشياطين." 23 فدعا لهم وكلمهم بأمثال: "كيف يقدر شيطان يخرج شيطان ؟ 24 لو انقسمت دولة على نفسها ، تنتهي . 25 ولو انقسمت عائلة على نفسها ، تنتهي . 26 والشيطان لوعمل ضد نفسه وانقسم ، ينتهي حاله . 27 ما يقدرش واحد يدخل بيت رجال قوي ويسرق بيته إلا بعد ما يقيد صاحب البيت القوي أول حاجة ، وبعدا شيقدر يسرق بيته . 28 شأقولكم الصدق ، كل الذنوب حق الناس تغفر لهم ، حتى كفرهم . 29 بس اللي يكفر بالروح القدس ، ما يغفرش ابداً ، بايجلس ذنبه للأبد." 30 وبهاذه يسوع جوب على اللي يقولوا إنو فيبه شيطان . 31 وبعد كذا جاءت أمه واخوانه ، ووقفوا خارج البيت ، ورسلوا ناس يدعوا له . 32 والناس اللي كانوا معه ، قالوا له: "أمك واخوانك خارج البيت يشتوك." 33 قلهم: "من أمي واخواني!؟" 34 رجع لفت للناس اللي معه وقلهم: "هاذوم أمي واخواني! 35 لإنو اللي يعمل بكلام الله ، هو أخي وأختي وأمي ."