4 ¹ ومرة ثانية ، كان يسوع يُعلم بساحل البحر ، وجاءوا لعنده ناس كثير ، رجع طلع للقارب بالبحيرة وجلس فيبه . والناس كُلهم كانوا جالسين بالساحل . ² فعلمهم حاجات كثيرة بالأمثال . فقلهم بتعليمه: ³ "اسمعوا! المزارع خرج يزرع . ⁴ ولما كان يزرع ، فلتين علوه قليل حبوب بجانب الطريق ، فجاءن الطيور وأكلنهن . ⁵ وفلتين علوه قليل حبوب لفوق ارض فيبه حجار والتراب قليل ، فنبتن بسرعة لإنو التربة قليلة . ⁶ بس لما طلعه الشمس ، حرق النبات وذبل ، لإنو كان ما فيش معه جذور . ⁷ وفلتين علوه قليل حبوب لبين الشوك ، فطلع الشوك وخنقه وما طلعش ثمار . ⁸ وفلتين علوه قليل حبوب لفوق أرض مليحة ، فنبت وكبر وجاب ثمره ، بعضه طلع ثلاثين ضعف ، وبعضه طلع ستين ضعف ، وبعضه طلع مائة ضعف . ⁹ وبعدا قلهم : "اللي معه اذان تسمع يسمعني!" ¹⁰ ولما كان يسوع وحده ، اصحابه وتلاميذه سألوه إيش معنى المثل . ¹¹ فقلهم: "جبت لكم أنتم سر ملكوت الله . أما اللي هم خارج ، فأقلهم كل حاجة بالأمثال . ¹² حتى هم لو شافوا ما يبصروش ، ولو سمعوا ما يفهموش ، لعلا يتوبوا فتغفر ذنوبهم . ¹³ وبعدا قلهم: "إذا ما فهمتمش هذا المَثل؟ كيف باتفهموا الأمثال الثانية؟ ¹⁴ المزارع زرع كلمة الله . ¹⁵ فاللي زُرع بجانب الطريق ، هم اللي يسمعوا الكلمة ، ويجي الشيطان ويشل الكلمة اللي زرعت بقلبه . ¹⁶ ونفسه اللي زرع بأرض فيبه حجار ، هم اللي يسمعوا الكلمة ويقبلوها بنفس الوقت وهم فرحانين ، ¹⁷ بس ما فيش جذور ، فيموتوا ، أي ضيق أو مشكلة عشان كلمة الله ، يرجعوا بسرعة . ¹⁸ واللي زرع بين الشوك ، هم اللي يسمعوا الكلمة ، ¹⁹ بس هموم الدنيا ، وحب المال ، ورغبتهم بحاجات ثانية ، فتختنق الكلمة فترجع بدون فائدة . ²⁰ واللي زرع بالأرض المليحة ، هم اللي يسمعوا كلمة الله ويقبلوها ويجيبوا ثمار ، بعضهم ثلاثين ضعف ، وبعضهم ستين ضعف ، وبعضهم مائة ضعف ." ²¹ وقلهم: "هو يصلح نطرح كشاف تحت المكيال أو تحت السرير؟ لا ، اكيد بانطرحه فوق المنارة . ²² أي شيء مخفي يظهر ، وأي سر يفتضح . ²³ اللي معه اذان تسمع يسمعني!" ²⁴ وقلهم: "إنتبهوا للي أقلكم ! المكيال اللي تكيلوا به للناس ، هو نفسه اللي يكيلوا به لكم الناس ويزيدوه علوه . ²⁵ اللي معه يحصل أكثر ، واللي ما فيش معه فحتى القليل اللي معه ياخذ مِنه. ²⁶ وبعدا قال: "ملكوت الله مثل رجال يذري الحبوب على الأرض ، ²⁷ وينوم بالليل ويقوم بالنهار والحبوب يطلع ويكبر ، وهو مش داري كيف . ²⁸ فالأرض من نفسه تجيب الثمار: بالأول نبات ، وبعدين سبولة ، وبعدين بُر مليانة السبولة . ²⁹ ولما قد المحصول ناضج ، يجي وقت من يصربه بالشريم ، لإنو وقت الصراب جاء ." ³⁰ وقال: "بإيش نشبه ملكوت الله؟ وبأي مَثل نمثله؟ ³¹ يشبه حبة خردل ، مع أنه أصغر حاجة من الذري اللي يزرع بالأرض ، ³² بس بعد ما نزرعه يكبر ويقع أكبر من كل النباتات الثانية ، وتصبح شجرة فتجي طيور السماء وتعيش فيبه." ³³ وكان يعلمهم كلمة الله بأمثال كثيرة نفس هذه الأمثال ، بالطريقه اللي يفهموها . ³⁴ وما كنش يكلمهم بدون أمثال ، بس كان يفسر كل حاجة للتلاميذ لما يكونوا لوحدهم . ³⁵ وبهذيك اليوم ، لما جاء الليل ، كلم تلاميذه: "هيا نمشي للساحل الثاني . ³⁶ فمشوا من عند الناس ، وشلوه بالقارب مثلما كان ، وكان في معاهم جنب القارب الأول قوارب ثانية . ³⁷ وجاءت رياح قوية عاصفة ، وكانت الأمواج تلعب بالقارب لما قد كان القارب شيمتلئ ماء . ³⁸ وكان يسوع راقد على مخدة بمؤخرة القارب . فصحوه وقالوا له: "يامعلم ، ما يهمكش إحنا نغرق؟" ³⁹ فقام وصيح على الريح وقال للبحر: "اسكت ، اِهدأ."فوقفت الريح ورجعت هدوء تام . ⁴⁰ فقلهم: "ليش أنتم خوافين كذا؟ ما فيش معاكم إيمان؟" ⁴¹ وارتعبوا وتكلموا بينهم بين: "منوه هذا اللي حتى الريح والأمواج تصدقه؟"