2 ¹ وبعد أيام ،رجع يسوع المسيح لكفر ناحوم وانتشر الخبر إنو بالبيت ، ² فاتجمعوا ناس كثير، وماعاد حصلوش مكان حتى قُدام الباب.وبدء يسوع المسيح يكلمهم بكلام الله . ³ وجابوا له بعض الناس واحد مشلول محملين له أربعة رجال. ⁴ لكنهم ماقدروش يوصِلّونه لعند يسوع المسيح من كثرة الزحمة. رجعو طلعو فوق سقف البيت اللي داخله يسوع المسيح وعملوا فتحه ونزلو الفراش اللي المشلول راقد فوقه. ⁵ ولما شاف يسوع المسيح قوة إيمانهم ، قال للرجَّال المشلول :"يا ابني، سامحتك من ذنوبك"

⁶ وكان من بين الناس الجالسين بعض من اليهود اللي يكتبوا التوراة ، وبدؤا يفكروا بقلوبهم : ⁷ "هذا الرجَّال ليش يتكلم كِذا ؟كلامُ كُفر! منو يقدر يسامح الذنوب إلا الله وحده؟"

⁸ بهذاك الوقت حس يسوع بقلبه باللي يفكروا فيبُه بقلوبهم . وسألهم ليش تفكروا بهذا الشيء بقلوبكم؟ ⁹ أيو أسهل إنو أقول للمشلول: سامحتو ذنوبك ،ولا أقوله :قُم إتحمل فراشك وامشي؟ ¹⁰ لكن انا قلتو كذا من شان تعرفوا إنو ابن الانسان عندو مقدرة يسامح الذنوب بالدنيا " ولفت للمشلول وقال لُه : ¹¹ قُم إتحمل فراشك وإرجعك بيتك! ¹² بساعته قام اللي كان مشلول وأتحمل فراشه ،ومشي قٌدام الناس كلهم .فتعجبوا كلهم وسبحوا الله وقالوا :"ما قاشفناش مثل هذا أبداً!" ¹³ بعد كِذا خرج يسوع المسيح مرة ثاني لساحل البحر،فتبعوه الناس كلهم وبدأ هو يعلمهم. ¹⁴ ولما هو ماشي ، شاف لاوي ابن حلفى جالس بمكتب الضرائب،قال له :"إتبعنا!" فقام وتبعه .

¹⁵ ولما كان يسوع المسيح جالس ياكل ببيت لاوي ،جلسو معوه موظفين بالضرائب والناس اللي موش مُتدينين ياكلوا معه ومع تلاميذه ،لإنوه كانوا كثير اللي تبعوه. ¹⁶ ولما شافوا اليهود المتدينين وعلماء التوراة يسوع المسيح يأكل مع الناس اللي موش مدينين وموظفين الضرائب ،قالوا لتلاميذه:"ليش يأكل مع موظفين الضرائب واللي موش مدينين؟

¹⁷ فسمع يسوع المسيح هذا الكلام منهم قلهم :"مايحتاجش للدكتور إلا الإنسان المريض،أما اللي هو بخير مايحتاجش لدكتور" انا ما جيتوش عشان الناس الصالحين ،انا أجيتو عشان الناس المذنبين والخاطئين". ¹⁸ وبآذاك الوقت كانو تلاميذ يوحنا وتلاميذ اليهود المتدينين صائمين، أجاؤ بعض الناس يسألوا يسوع المسيح وقالوا له:"ليش تلاميذ يوحنا واليهودالمتدينين صائمين؟وتلاميذك مايصموش؟

¹⁹ جاوبهم يسوع المسيح: هل أهل العُرس يقدروا يصوموا والعريس بينهم ؟ مادام والعريس بينهم ميقدروش يصومو. ²⁰ لكن شِجي وقت ويُرفع العريس من بينهم .بعد كِذا شقدروا يصوموا.

²¹ - مافيش احد يقدر يُرقِّع ثوب بالي بِرُقعه جديد، لإنوالرقُعه الجديد شتخرب، وتخريب الثوب زيادة. ²² ومافيش احد يعمل خمر جديد داخل قِربه قديم ، لإنو القربه شتقتطع ويستكب الخمر مِنه ،لكن نسكُب الخمر الجديد داخل قربه جديد." ²³ وبيوم سبت ،كان يسوع المسيح يمشي بين الزرع ، وكانوا تلاميذه يمشوا بعده ويقطفوا سبول وهم ماشين . ²⁴ فقالوا له اليهود المتدينين : شـــوف ! ليش تلاميذك يعملوا شيء مايجوزش عمله يوم السبت؟

²⁵ جاوبهم يسوع المسيح : مــا قِـرتومش إيش عمل داود لما احتاج وجويع هو واصحابه؟ ²⁶ دخل المعبد اليهودي لما كان أبيأثار رئيس شيوخ اليهود،وأكل من الخبز المقدس اللي يُقدمنوه للرب واللي مايحلش أكله إلا لشيوخ اليهود وحدهم ،وزاد جاب مِنوه لأصحابه ياكلوا."

²⁷ قلهم يسوع المسيح :"االله خلق السبت للإنسان ،موش الإنسان للسبت ." ²⁸ إذن اللي رجع بشر هو رب السبت كمان.