6 فقلهم يسوع: "وقتي لسه ما قد جاء، وأما أنتم وقتكم مناسب كُل حين . 7 ما يقدرش العالم يكرهكم ، بس هو يكرهنا أنا لاننا شاهد علوه بإنو أعماله شريرة . 8 روحوا أنتم للعيد ، أما انا ما شأروحش الآن لهذا العيد لإنو وقتي لسه ما قد أجاء." 9 وتكلم بهذا وجلس بالجليل .
10 ولما إخوانه راحوا للعيد ، راح هو كمان ،بالخفاء مش بالظاهر. 11 اليهود كانوا يدورا علوه بالعيد ، ويقولوا: "وين هذاك الرجّال؟" 12 والناس كانوا يتهامسوا علوه كثير ، فمنهم قالوا : "إنو رجّال صالح." و منهم قالوا : "لا ! إنما هو يضل الشعب." 13 بس ما تكلمش أحد علوه بالعلن ، خايفين من رؤساء اليهود . 14 ولما مشي نص العيد ، راح يسوع للمعبد وجلس يعلم الناس . 15 فاستغربوا اليهود وقالوا: "كيف هذا يعرف الكتُب وهو ما تعلمش؟ 16 فقلهم يسوع: " تعليمي مش من عندي ، هو من عند اللي رسلنا . 17 واللي يشتي يعمل مشيئة الله يعرف إذا كان تعليمي من عند الله ، أو من عندي . 18 اللي يتكلم من عند نفسه يشتي المدح لنفسه ، واللي يشتي المدح للي رسله ، فهو صادق ولا فيبه ذنب . 19 موسى جاب لكم التوراة ، بس ولا واحد عمل بالتوراة . ليش تحاولوا تقتلونا؟" 20 فقالوا له الناس: "فيبك شيطان! هو اللي يشتي يقتلك؟" 21 وقلهم يسوع: "سويت عمل واحد يوم السبت وكلكم استغربتم . 22 موسى أوصيكم بالختان وهذا ما يعنيش إنو الختان يرجع لموسى إنما للآباء! ولهذا تختنوا الإنسان حتى اذا كان يوم سبت. 23 وأنتم تختنوا الواحد يوم السبت عشان ما تخالفوش شريعة مُوسى ، فهل تزعلوا مني لإنو عالجت إنسان بكله بيوم السبت؟ 24 لا تحكموش حسب الظاهر ، إنما احكموا بالعدل." 25 وقالوا ناس من أهل القدس: "مش هذا اللي يدورا بعده يشتوا يقتلوه؟ 26 هوذا يتكلم بالعلن ولا أحد كلمه بشيء، هل يا ترى رؤساءنا اقتنعوا بالفعل بانه المسيح؟ 27 المسيح لما يجي ما فيش واحد يعرف منين هو ، أما هذا إحنا نعرف أصله." 28 ورفع يسوع صوته وهو بالمعبد يعلم وقلهم: "ايوه ، تعرفوننا وتعرفون منين أنا! وانا ما جاءتش من عند نفسي ، بس اللي رسلني هو على حق ، وأنتم ما تعرفوه . 29 أنا أعرفه لأننا منه ، وهو اللي رسلنا."
30 وحاولوا اليهود يقبضوا علوه ، بس ولا واحد مسكه ، لأنه الوقت حقه عاده ما قد جاءش . 31 وآمنوا فيبه ناس كثير وقالوا: "لما يجي المسيح ، يمكن يعمل معجزات أكثر من اللي عملها هذا الرجّال؟"
32 وسمعوا شيوخ اليهود الناس يتهامسوا بهذا الكلام علوه ، فرسلوا هُم ورؤساء الكهنة عسكر عشان يمسكوه . 33 وقلهم يسوع: "أنا جالس معكم لوقت قصير ، وبعدين شا رجع لعند اللي رسلنا . 34 شتدورا بعدي وما شتحصلونا ، ولا تقدروا تجوا للمكان اللي انا فيبه." 35 وتكلموا اليهود بينهم بين: "وين يشتي هذا يروح ما بنلاقيش؟ مش ناوي يروح للمدن اليونانية اللي اليهود فيبها مشتتين ، ويعلم اليونانيين؟ 36 وإيش يقصد لما قال: شتدورا بعدي وما شتحصلوناش ، ومش تقدروش تجيؤ للمكان اللي انا فيبه؟" 37 وبآخر يوم من العيد ، وهو اليوم المهم ، وقف يسوع وقال بصوت مرتفع: "لو واحد عطِش ، يجي لعندي ويشرب . 38 ومثلما قال الكتاب ، اللي آمن بي شتجري داخله أنهار ماء حي."
39 وقال هذا عن الروح القدس اللي شيقبلوا المؤمنون فيبه . بس لحد الوقت هذا الروح ما قد كنش أعطي للناس ، لأن يسوع لسه ما قد تمجد . 40 ولما سمعوا الناس الموجودين بهذا الكلام ، في منهم قالوا: "هذا من صدق هو النبي." 41 وثانيين قالوا: "هذا هو المسيح." وغيرهم قال: "ليش المسيح بيجي من الجليل؟ 42 مش قال الكتاب المسيح بيجي من ذرية داود ، ومن بيت لحم ، القرية اللي جاء منها داود." 43 فاختلفوا الناس علوه . 44 وكان في منهم يشتوا يقبضوا علوه ، بس ولا واحد مسكه .
45 ولما رجعوا العسكر حق المعبد ، سألوهم رؤساء الكهنة وعلماء الشريعة : "ليش ما جبتموش؟" 46 فقالوا لهم: "مافيش واحد نهائياً يتكلم نفس هذا الرجّال."
47 فقالوا علماء الشريعة : " هل أنتم ضللتم كمان ؟ 48 أو في واحد من الرؤساء أو من علماء الشريعة أمن فيه؟ 49 أما هذا الشعب اللي ما يعرفش التوراة ، عليهم اللعنة!" 50 بس في واحد منهم اسمه نيِقوديموس قا كان جاء لعند يسوع من قبل وقلهم: 51 "هل تحكم شريعتنا على واحد بدون ما نسمعش مِنه أول شيء ونعرف إيش عِمل؟" 52 وقالوا له: "أو أنت من الجليل؟ ابحث بالكتاب وشوف أنه ما يجيش نبي من الجليل نهائياً." 53 وراح كُل واحد لبيته .