9 " في هِنا ولد معُه خمسة خُبزشعيروثنتين سمك صِغار، بس إيش بتنفع هذه لكل هاذم الناس؟" 10 وكان في بالمكان حشيش كثير،فقال يسوع المسيح:" جلّسِوا الناس." فجلسوا الرجال وكان عددهم تقريباً خمسة ألف . 11 وشلّ يسوع المسيح الخبز،وشكر الله ،ووزَّع للتلاميذ، والتلاميذ جابوا للجالسين بقدر ما يشتوا،وعمل نفس الشيء بالثنتين السمك. 12 ولما شِبعُوا ،قال يسوع المسيح لتلاميذه :" جمّعوا اللي بقي من الخبز،عشان مايضيع شيء." 13 فجمعونِّه ،وملأُوا إثنى عشر سلّه من كسر خبز الشعير الخمسة اللي زادت على اللي أكلوا. 14 ولما شاف الناس هذي المُعجزة اللي عملها يسوع المسيح قالوا:" أكيد، هذا هو النبي اللي شيجي للعالم." 15 وعرف يسوع إنهم يشتوا يخطفوه ويخلُوه ملك ،فأبتعد منهم ورجع للجبل وحدُه. 16 ولما جاء الليل، نزلوا تلاميذُه للبحر، 17 وركبوا قارب واتَّجهوا جهة مدينة كفرناحوم بالجهة المُقابل من البُحيرة،وكان قد بدأ الظلام ويسوع المسيح عاده ما تِبعهم. 18 وضربت ريح قوي،وارتفع موج البحيرة. 19 وبعد ما مشوا تقريباً أربعة أوخمسة كيلو متر، شافوا يسوع يمشي فوق ماء البحر ويقترب من القارب ، فخافــوا . 20 فقلهم :" أنا هــو، لاتخافـوش !" 21 وعادهم كانوا يشتوا مِنُو يطلع للقارب،وصل القارب بساعتُه للمكان اللي كانوا رايحين لُه.
22 وباليوم الثاني ،أنتبهوا الناس اللي كانوا بالجِهة الثاني من البُحيرة، إنو مافيش إلا قارب واحد، و إنو يسوع المسيح ما رِكبش مع تلاميذه، وتلاميذُه مشوا لوحدهم . 23 بعدين أجت قوارب ثانية من طَبَريَّة، قريب من المكان اللي أكلوا فيبُه الخُبز بعد ما شكر الرب عليه. 24 ولما شافوا الناس إنو مش يسوع المسيح ولا تلاميذُهُ موجودين هناك ، رِكبوا القوارب وراحوا لكفرناحوم يدوروا على يسوع. 25 ولما حَصلوا يسوع المسيح بالجهة المقابل من البُحيرة، قالوا لُه:" يا مُعلم متى وصلت لهِنا ؟" 26 جاوبهم يسوع المسيح:"اقولكم الصدق: أنتم تُدوروا عليَّا مش لإنكم شفتم المعجزات ، بس لإنكم أكـلتُم من الخبز وشبعتم." 27 لا تعملوش عشان الأكـل اللي يفسُد ، إعملوا عشان الأكل اللي يـدوم ويوصل لحياة الخلود، هذا هو الأكل اللي يجيبه لكم ابن الإنسان، وختمُه الله الآب بختمه." 28 سألنوه:" إيش هي الأعمال اللي يشتيها الله مننا؟" 29 جاوبهم يسوع المسيح وقلهم :" العمل اللي يشتو الله منكم هو إنكم تُؤمنوا باللي ارسلُه." 30 فقالوا لُه :" إيش هي المُعجِزة اللي بتعملها عشان نشوفها ونُؤمِن فيبك ؟ إيش تقدِر إنو تعمل؟ 31 آباءنا أكلوا الـَمنَّ بالصحراء،مثلما هو مكتوب بالكتاب :"جابلهم خُبز من السماء عشان يأكلوا."
32 فقال لهم يسوع :" أقولكم الصدق :مش موسى اللي جاب لكم الخبز من السماء، أبي هو اللي يجيب لكم الخُبزالحقيقي من السماء، 33 لإنو خبز الله هو اللي ينزُل من السماء ويعطي الحياة للناس.
34 قالوا لُه :" يا سيد جيب لنا هذا الخبز دائماً" 35 فقلهم يسوع المسيح :"أنا هو خبزالحياة،اللي يجي لِيَ ما يجوع ،واللي يُؤمن بي ما يعطش أبـداً." 36 أنا قلتو لكم إنكم رأيتمونا،ومع هذا ما آمنتم فيبي. 37 كل ما يجيبو الآب لِيَ ،شيجي لعندي،واللي يجي لِياَ ،ما اطرحوش خارج أبداً. 38 لإننا نزلت من السماء، مش عشان أعمل إرادتي ،إنما عشان أعمل إرادة اللي رسلنا. 39 و إرادة اللي ارسلنا ،إنو ما أخلي أي واحد من اللي جابهم لِيَ يَهلَك، إنما
أقيمهُم باليوم الآخر.
40 لإنو إرادة أبي هي إنو كل مِن يشوفنا ويُؤمن فيبي تكون لُه حياة الخلود،وانا شاقيمُه باليوم الآخر."41 فبدأ اليهود يَزعلوا من يسوع المسيح لإنو قال:" أنا هو الخبز اللي نزل من السماء." 42 وقالوا :"مش هذا هو يسوع ابن يوسف،اللي نِحنا نعرف أبوه وامه؟ كيف يقول أنا نزلـتُو من السماء؟". 43 جاوبهم يسوع المسيح وقالهم:" لا تزعلوا بينكم البين. 44 مايقدرش أحد إنو يجي لِيَ ،إلا إذا جذبه الأب اللي ارسلنا ،وباليوم الأخير أنا شاقيمُه. 45 مكتوب بكتب الأنبياء: يتعلموا كُلهم من الله ،وكل من يسمع الأب ويتعلم من اللي شيجي لعندي . 46 ولا احد شاف الأب ،الوحيد اللي شاف الآب هو اللي جاء من الله ،هو وحده شاف الله. 47 أقولكم الصدق:اللي يُؤمن فيبي له حياة الخلود. 48 أنا هو خبز الحياة . 49 أباؤكم أكلوا المن بالصحراء وماتوا. 50 أما اللي يأكل من الخبز هذا اللي نزل من السماء مايموتش أبداً. 51 أنا هو الخبز الحي اللي نزل من السماء،اللي يأكل من هذا الخبز يحيا للأبد ،وهذا الخبز هو جسمي اللي شضحي فيبو عشان يعيش العالم. 52 فبدأ اليهود يتصايحوا بينهم البين ويقولوا:" كيف يقدر هذا إنو يجيب لنا جِسمه عشان نأكُله؟"
53 جاوبهم يسوع المسيح:" أقولكم الصدق: إذا ما أكلتم جسم ابن الإنسان وتشربوا دمه ،مشتكونش لكم حياة بداخلكم. 54 اللي يأكل جسمي ويشرب دمي،لُه حياة الخلود وأنا شاقيمُه باليوم الأخير، 55 لإنو جسمي هو طعام حقيقي،و دمي هو شراب حقيقي. 56 اللي يأكل جسمي ويشرب دمي ،يسكُن فيبي وانا أسكُن فيبُه. 57 مثلما إنو الآب الحيَّ أرسلنا،وانا أحيا بواسطتُه، فاللي يأكُلنا يحيا بواسطتي. 58 هذا هو الخبز اللي نزل من السماء،وهو يختلِف على المَنَّ اللي أكلوه أباؤكم وماتوا،اللي يأكل من هذا الخبز يحيا للأبد."
59 قال يسوع المسيح هذه الأموركُلها وهو يُعلم بالمجمع بكفرناحوم. 60 كثير من تلاميذُه ،لما سمعوا هذا الكلام قالوا :"هذا تعليم صعب ! منو يقدِرإنو يسمعوه؟" 61 فعرف يسوع المسيح بِنفسُه إنو تلاميذُه زعلانين من هذا،فقلهم :" هل هذا الكلام خليكم تشكوا بنفوسكم؟" 62 إيش بيحصُل لو شِفتم ابن الإنسان طالع الى أينما كان من قبل؟ 63 الروح هو اللي يعطي الحياة،أما الجسم ما ينفع بشيء ،الكلام اللي كلمتكم بُه هو روح وحياة، 64 لكن البعض منكم ما آمنوا ".قال يسوع المسيح هذا،لإنو كان يعرف من البداية منهم اللي ما آمنوش فيبُه ،ومن هو اللي شيخونه . 65 وبعدين قال :" عشان كِذا قلتو لكم ما يقدرش أحد إنو يجي لعندي إلا إذا جال له الأب هذا.
66 ومن هذاك الوقت رجعوا كثير من تلاميذُه للوراء، وبطلوا يمشوا معه. 67 فقال يسوع المسيح للاثنى عشرتلميذ:" وانتم ،تشتو تمشوا مثلهم ؟" 68 فجاوبه سمعان بطرس :" يـارب ، لمن نروح ؟ وكلامك هو اللي يهدينا لحياة الخلود. 69 ونِحنا آمنَّا وعرفنا إنك أنت المسيح ابن الله الحَيّ." 70 فقلهم يسوع المسيح:"مش أنا اخترتكم أنتم الإثنى عشر؟ وواحد منكم شيطان!". 71 كان يقصد بهذا ليهوذا بن سمعان الإسخريوطي ،اللي كان واحد من الإثنى عشرتلميذ، بس هو خانه فيما بعد .