10 فقالوا رؤوساء اليهود للي شُفي : " اليوم سبت ، ما يجوزلكش إنو تتحمل فراشك ." 11 وجاوبهم : " اللي شفينا قلي: " أتحمل فراشك وإمشي ." 12 فسألوه : " منو اللي قال لك : " إتحمل فراشك وإمشي ؟" 13 والرجال كان مايعرفش من هو، لإنو يسوع اختفي بين الناس الكثير .
14 وبعد هذا يسوع حصله ببيت الله فقله : " إنتبه ! أنت شُفيت فلازم تتوقف عن الخطيئه ، علشان ما يحصلكش اسوأ . 15 فمشي الرجّال لعند رؤساء اليهود ،وكلمهم بإنو يسوع هو اللي شفاه . 16 فجلسوا اليهود يضايقوا يسوع ، لإنو عمل كذا بيوم السبت .
17 فقلهم يسوع : " ابي مايتوقفش من العمل أبداً ، وأنا أعمل مثله ." 18 لهذا السبب قادة اليهود نووا بالفعل أنهم يقتلوه ، لإنو اولاً خالف الوصية حق السبت، وثانياً قال إن الله هو أبوه ، فساوي نفسه بالله .
19 فقلهم يسوع : " اقول لكم الصدق ،ما يقدرش الابن إنو يعمل حاجه من نفسه ، إنما يعمل ما يشوف الأب يعمله . فكل اللي يعمله الأب يعمل مثله الابن . 20 لإنو الأب يحب الابن ويوري له كل اللي يعمله ، وشيوري له أعمال أكبر من هذي فتستغربوا. 21 ومثلما الأب يقيم الموتى ويحييهم ، كمان الابن يحيي اللي يشتي. 22 والأب ما يحاسبش ولا واحد ، لأنه جاب الحساب كله للابن . 23 عشان الجميع يكرموا الابن مثلما يكرموا الأب . واللي ما يكرمش الابن ، مايكرمش الأب اللي أرسله .
24 أقول لكم الصدق ، اللي يسمع كلامي ويصدق باللي أرسلنا، له حياه الخلود ولا عقاب علوه بيوم الدين لأنه انتقل من الموت الى الحياة . 25 أقول لكم الصدق ، شيوقع وقت ،بل هو قاوقع الوقت اللي يسمع به الأموات صوت ابن الله ، واللي يسمعه يعيش 26 ومثلما أن الأب نفسه هو أساس الحياة ، قد جاب الابن كمان إنو يكون مصدر للحياة. 27 وكمان جاب له سلطة حساب الأخرة ، لإنو هو اللي رجع ابن الإنسان . 28 ما تستغربوش من هذا ، لإنو شيجي وقت يسمعوا كل الناس اللي بالقبور صوته. 29 وشيخرجوا. اللي عملوا الخير شيقوموا لعند حياة الخلود واللي عملوا السيئات شيقوموا لحساب الأخرة . 30 أنا ماقدرش اعمل شيء من عندي ، إنما انا أحاسب مثلما يكلمنا الأب . والحساب حقي عادل ، لإنو انا ماطلبش الإرادة حقي ، إنما إرادة اللي أرسلنا . 31 إذا كنتو أشهد على نفسي ، فالشهادة حقي مش صحيحة. 32 في من يشهد لي ، وانا عارف أنو شهادته لي صحيحه. 33 انتم أرسلتم ليوحنا، وهو شهد للحق . 34 انا أقول هذا ، مش علشان اتكل على شهادة الناس ، انما علشان تنجوا . 35 كان يوحنا سراج مضيئ لامع ، وأنتم رضيتم أنكم تستمتعوا بنوره فترة من الزمن. 36 لكن انا عندي شهادة اكبر من شهادة يوحنا ، الأعمال اللي كلفنا بها الرب ، هي الأعمال اللي اعملها ، هي تشهد لي إنو الأب أرسلنا . 37 وبعدين الأب اللي أرسلنا هونفسه يشهد لي . أنتم ما سمعتموش صوته ولا شفتم شكله أبداً . 38 وكلمته ما تثبتش فيكم ، لإنو انتم ما تصدقوش اللي هو ارسله . 39 أنتم تفحصوا الكتب ، لإنو باعتقادكم شتهديكم لحياة الخلود ، وهي بالفعل تشهد لي. 40 بس أنتم ماتشتوش انكم تجيئوا لعندي عشان تكن لكم هذي الحياة .
41 أنا ما قبلش مدح الناس. 42 بس أنا اعرفكم وأعرف محبة الله مش موجودة فيكم . 43 انا جيتو باسم أبي وماقبلتوناش. إذا أجاء واحد باسم نفسه تقبلونه. 44 فكيف تقدروا تأمنوا وأنتم تشوفوا المجد بينكم البين ، وماتطلبوش المجد اللي يجي من عند الله وحده؟
45 لاتظنوش أننا شاشتكي بكم لعند الأب . اللي يشتكي بكم هو موسى اللي خليتم أملكم فيه. 46 لو كنتم تُصدقوا موسى ، لكنتم تصدقونا ، لانُه هو كتب عني . 47 فإذا ما تصدقوش اللي كتبه، كيف شتصدقوا كلامي؟"