8 ¹ أما يسوع المسيح فراح لجبل الزيتون. ² والصباح بدري رجع للهيكل ،واتجمعوا عليه كل الناس ، فجلس وبدأ يُعلمهم. ³ فجابوا لُه معلمي الشعب و علماء اليهود ، مرأة مسكنوها وهي تزني،وقفوها بالوسط ، ⁴ وقالوا لُه :" يا مُعلم ،هذه المرأة مسكناها وهي تزني. ⁵ وموسى أوصانحنا بالتوراة إنو مثل هذه المرأة نقتلِه رجم بالحجار، إيش تقول أنت؟" ⁶ طرحوا لُه هذا السؤال عشان يختبرونُه ويحصلوا تُهمه يُحاكمُونُه بِه،لكن يسوع المسيح إنحني وبدأ يكتب بإصبعُه على الأرض. ⁷ لكنهم رفسوا عليه السؤال ، وقف وقال لهم :" اللي ماعلوش منكم ولا ذنب ، يبدأ الأول ويرجمه بحجر!" ⁸ وانحني مرة ثاني ورجع يكتب على الأرض. ⁹ لما سمعوا هذا الكلام ،انسحبوا كلهم واحد بعد واحد، بالبداية الكِبار بالعُمر، وبقي يسوع المسيح وحدُه والمرأة واقفه قُدامُه. ¹⁰ وقف يسوع المسيح وقال لها:" يا مرأه ،وين راحو اللي اشتكوا فيبِك؟ ولا واحد منهم حكم عليك؟" ¹¹ قالت : "لا ولا واحد ياسيد" قال لها يسوع المسيح :" ولا أنا بحكم عليك. روحي ولا ترجعيش للخطيِّة." ¹² بعدين واصل يسوع المسيح كلامُه للناس وقال :" أنا هـو نور العالم،اللي يتبعنا ما يمشي أبداً بالظلام، ويكون معُه النور اللي يقودُه للحياة." ¹³ فقال لُه علماء اليهود :" أنت الآن تشهد لنفسك ، شهادتك موش مقبول" ¹⁴ جاوبهم يسوع المسيح وقال لهم:" إذا كنتو اشهد لنفسي فشهادتي حقّ،لإنو عارف من فين أجيتو وفين رايح؛ بس أنتم ماتعرفوش من وين أجيتو ولا فين رايح . ¹⁵ أنتم تحكموا عليَّا بمقاييس البشر، لكن أنا ما أحكم على احد. ¹⁶ ولو حكمتو، بيكون حكمي عادل،لإنو انا محكمش لوحدي ،لكن أنا والأب اللي ارسلنا هو معي. ¹⁷ مكتوب بالتوراة إنو شهادة شاهدين تصِحّ. ¹⁸ أنا أشهـد لنفسي ،والشاهد الثاني اللي معي هو الآب الذي أرسلنا ." ¹⁹ فسألونُه أين هو أبوك؟ جاوب يسوع المسيح:" أنتم ماتعرِفُوناش ولا تعرفوا أبي. ولو عرفتونا بتعرفوا أبي كمان."

²⁰ قال يسوع المسيح هذا الكلام جنب صندوق التبرعات ،وهو يُعلِّم بالمعبد اليهودي ،ولا أحد مسكوه ،لإنو وقتُه عاده ماجاش. ²¹ ومرة ثاني قال لهم يسوع المسيح:" أنا ماشي، وشتُدوروا عليَّا،لكنكم شتموتوا وعليكم ذنب خطاياكم، وماتقدروش إنو تجيئوا للمكان اللي انا رايح لُه." ²² فبدأ اليهود يتسألوا بينهم البين :" يمكن إنو شقتُل نفسُه ؟ لإنو يقول:"ماتقدروش تجيئوا للمكان اللي انا رايح له" ²³ فقال لهم :" أنتم من تحت ،أما انا من فوق ،أنتم من هذا العالم ،أما انا موش من هذا العالم." ²⁴ عشان كِذا قلتو لكم :شتموتوا بخطاياكم ،لإنكم إذا ما تؤمنوا بإنو أنا هــو، تموتوا بخطاياكم." ²⁵ فسألونُه :" منو أنت ؟ " جاوبهم يسوع المسيح: كلمتُكم أنا من البداية ! ²⁶ عندي أشياء كثيرة أقولِه وأحكُم فيبِه عليكم ،لكن اللي ارسلنا هو صادق وانا أُكلم الناس باللي سمعتو مِنو" ²⁷ ومافِهموش إنو يسوع المسيح كان يتكلم معهم على الآب. ²⁸ فقال لهم يسوع المسيح :" لما تُعلِّقوا ابن الإنسان شتعرفوا إننا هـو،وإننا ما أعملش شيء من نفسي،لكن أتكلم مثلما علمنا أبي. ²⁹ واللي ارسلنا هو معي ،ومايخلينا أبي لوحدي،لإننا دائماً أعمل اللي يرضوه"

³⁰ ولما كان يسوع يتكلم بهذه الأمور آمنوا فيبُه ناس كثير. ³¹ فقال يسوع المسيح لليهود اللي آمنوا فيبُه: "لو أتمسكتُم بتعليمي، فانتم تلاميذي صِدق . ³² وشتعرفوا الحق ،والحق شحرركُم." ³³ جاوبنوه:" نِحنا جِـدنا إبراهيم ،ومكناش عبيد لأحد أبداً! كيـف تقول لنا :"شتكونوا أحرار؟" ³⁴ جاوبهم يسوع المسيح:" أقولكم الصدق : كل من يعمل الخطيَّة هو عبد للخطيَّة. ³⁵ والعبـد ما يبقِيش ببيت سيده للأبد؛ أما الإبن يعيش فيبُه للأبد. ³⁶ إذا حرركم الإبن شتكونوا من صدق أحرار. ³⁷ أنا عارف إنكم من ذُورية إبراهيم ،بس أنتم تشتوا تقتلونا لإنو كلامي محصلش مكان بقلوبكم. ³⁸ أنا أكلمكم باللي شِفتُو عند أبي ،وانتم تعملوا باللي سِمعتنوه من ابوكم" ³⁹ فقالوا لُه: " أبونا هـو إبراهيم !" فقال لهم يسوع المسيح :" لو كنتم أولاد إبراهيم ،كنتم شتعملوا أعمال إبراهيم. ⁴⁰ لكن أنتم تشتوا تقتلونا،وانا إنسان كلمتكم بالصدق اللي سمعتُه من الله ،وابراهيم ماعمل شيئ مثل هذا. ⁴¹ أنتم تعملوا أعمال أبوكم." فقالوا لُه :" نِحنا ما ولـدناش من زنـى ! معنا أب واحد هو الله." ⁴² قال لهم يسوع المسيح:"لو كان الله أبوكم صدق كنتم شتحبونا،لإننا خرجتو واجيتو من عند الله، مجيتوش من نفسي ،لكن هو اللي رسلنا. ⁴³ ليش ماتفهموا كلامي؟لإنكم ماتتحملوش تسمعوا كلامي. ⁴⁴ إبليس هو ابوكم ،وانتم أولاده، عشان كذا تشتوا تعملوا رغبة أبوكم ،من البداية هو كان قاتل ،وماهوش مُتمسك بالصدق،ولا فيه شيء من الصدق ،لما يكذب هذا شيء طبيعي عِندُه ،لإنو كذاب وابو الكذب! ⁴⁵ أما أنا لإننا أقول الصدق، ترفضوا إنكم تؤمنو فيبي. ⁴⁶ منو منكم يقدر يُثبت عليَّ خطيّة واحدة ؟ إذا كنتُ أقول الصدق،ليش ما تُؤمنوا فيبي؟ ⁴⁷ اللي من الله يسمع كلام الله،وانتم ما تسمعوش لإنكم منتم من الله." s1 يسوع المسيح وإبراهـيم

⁴⁸ فقالوا لُه اليهود :" موش إحنا على حق لما نقول إنك سامري وفيبك شيطان؟" ⁴⁹ جاوبهم يسوع المسيح:" مافيبيش شيطان،أنا أكرِم أبي وانتم تهينوننا. ⁵⁰ أنا ما أطلُبش تمجيد نفسي ،في من يطلُبُه وهو اللي يحكم بهذا. ⁵¹ أقولكم الصدق: اللي يعمل بكلامي مايموتش أبداً." ⁵² فقالوا لُه اليهود :" الآن تأكدنا إنو فيبك شيطان. قامات إبراهيم، وماتوا الأنبياء وانت تقول : اللي شِعمل بكلامك ما شِموتش أبداً" ⁵³ هل أنت أعظم من أبونا إبراهيم اللي مات؟ حِتى الأنبياء ماتوا؛ من جاعل نفسك؟" ⁵⁴ جاوبهم يسوع المسيح:" إذا كنتُ أمجد نفسي،فاذاك المجد ما يساوي شيء،لكن اللي يمجدنا هو أبي اللي تقولوا إنو ربكم، ⁵⁵ أنتم ما تعرفونُه ، بس أنا أعرفُه.ولو قلتو لكم إننا ما أعرفوش شاكون كذاب مثلكم ،لكن أعرِفُه وأعمل بكلامه . ⁵⁶ أبوكم إبراهيم أشتاق بفرح إنو يشوف يومي، فشافوه وفِرح." ⁵⁷ فقالوا لُه اليهود:" كيف رأيت إبراهيم ،وانت عُمرك عاده ما وصل خمسين سنة ؟" ⁵⁸ جاوبهم يسوع المسيح:" أقولكم الصدق :قبل ما يُخلق إبراهيم أنا موجود ." ⁵⁹ مسكوا حجار عشان يرجمونوه، بس يسوع المسيح أختفى من بينهم وخرج من الهيكل .