7 و بعـد حوالي ثلاث ساعات ،أجاءت زوجتُه وما تعرفش إيش اللي حصل . 8 فسألها بطرس :" قولي لي: هل بهذا السِعر بِعتُم الأرض ؟ قالت : "أيوه، بهذا السعر ". 9 قلها بُطرُس :" ليش اتفقتي مع زوجِك إنكم تختبروا روح الربَّ؟ شوفي ، الشباب اللي دفنوا زوجِك وصلوا عند الباب ،وشِحملونيك انتي كمان !" 10 وبهذيك اللحظة وقعت على الأرض عند أرجُل بُطرُس وماته ! ولما دخلوا الشباب حصلوها ميته، أتحملوها لخارج وقـبروها جنب زوجها. 11 فحصل خوف كبير بين المؤمنين ،وكل اللي سِمعوا بهذا الخبر. 12 وحصلت على يـد الرُسل مُعجزات وعجائب كثير بين الناس. وكانوا كُلَّهُم يجتمعوا بقلب واحد بقاعة سُليمان بالهيكل. 13 ومافبيش احد أتجرأ من خارج جماعتهم إنو يدخل بينهم ،بس كانوا الناس يمدحونهم . 14 وآمنوا بالـربّ عدد كبير من الرجال والنساء وأنضموا معهم. 15 وكانوا الناس يجيبوا أمراضهم للشوارع ، ويطرحونهم فوق الفُرُش والحصير،عشان لما يجزع بُطرُس يمشي ويوقع ظِلُه على أي واحد منهم ويتعافي 16 وكانوا يجيئوا ناس من المدن والقُرى المُجاور للقُدس ، مُتحملين الأمراض وناس معذبين فيبهم شياطين ، فكانوا كُلهم يتشافوا . 17 قام كبير شيوخ اليهود وكل اللي مُعه ،اللي هم من مذهب الصدوقيين اللي ما يُؤمنوا بالقيامة من الأموات ، وملأهم الحسد. 18 مسكوا الرُسل وحبسوهم بالسجن المركزي . 19 لكن ملاك من الـربّ أجاء بالليل و فتح أبواب السجن ،وخرجّهُم ، وقلهم : 20 " روحوا إوقـفـوا بالهيكل ، وكلِّموا الناس ببشارة الحياة الجديدة كامل " 21 لما سِمعوا الرسل هذا الكلام ،دخلوا وقت الفجر للهيكل وبدأوا يُعلموا الناس. ولما وصل كبير مشائخ اليهود وجماعته ، واستدعي المجلس اليهودي وشيوخ بني إسرائيل كلهم،أرسلوا العساكر يجيبوا الـرُسُل من السجن. 22 وصلوا العساكر للسجن بس ماحصلوش الرُسُل داخله، فرجعوا وخبروا، 23 وقالوا:"شِفنا أبواب السجن مُقفل بقوة ، والعسكر واقفين قـُدام الأبواب،بس لما فتحنا ما حصلناش أحد داخل ".
24 لما سِمع هذا الكلام رئيس حرس الهيكل ورؤساء الكهنة، أتعجبوا وقالوا :"إيش اللي حصل ؟ 25 بعدين أجى واحد وخبَّرهُم وقلهم :" الرجال اللي حبستوهم بالسجن ، واقفين الآن بالهيكل يُعلموا الناس ." 26 راح قائد الحرس هو وعساكره ، وجابوا الرسل بدون عُنف ،لإنوه كانوا خايفين من الناس ليرجموهم . 27 لما دخلوهم أمام المجلس ، حقق معهم رئيس الكهنة 28 وقال :" مش إحنا أمرناكم إنو ما تعلِّموش بهذا الإسم ؟ بس أنتم مليتم مدينة القُدس بتعليمكم ، وتشتو تحملونا مسئولية قتل هذا الرجَّال " 29 جاوبُه بطرس والرسل :" لازم إنو نطيع الله أكثر من الناس . 30 أنتم قتلتُم يسوع المسيح وعلقتونُّه فوق خشبة ،لكن الله إله آبائنا قيمُه من الموت . 31 بس الله رفعه إلى يمينه ، وخلوه هو الملك والمُنقِذ، وبواسطته يقدروا بني إسرائيل يتوبوا ويغفِّر لهم ذنوبهم. 32 ونِحنا نشهد لُه بهذي الأمور ، ويشهد الروح القدس اللي جابُه الله للي يطيعوه."
33 لما سِمعوا أعضاء المجلس هذا الكلام،زِعلوا زيادة ، وقرروا إنو يقتلوا الرُسُل . 34 بس واحد من أعضاء المجلس، إسمه غمالائِيلُ، كان يهودي متدين ومُدرس للتوراة وكل الناس كانوا يحترموه ،وقف و أمر إنوه الرُسُل يخرجوا شويه . 35 بعدين قال لِأعضاء المجلس :" يابني إسرائيل ،إنتبهوا تعملوا شيء من اللي انتم ناوين عليه بيهاذم الرجال. 36 قبل فترة قام ثُوداسُ ،وقال إنو رجّال عظيم ، وأنضموا معه تقريباً أربعمائة رجال، بس قُتِل و اتشتتوا أصحابه وانتهي أمرهم . 37 وبعده ظهر يهوذا الجليلي أيام عـدّ السُكان ،ومشوا بعده كثير من الناس،لكِنُه قُتِل، واتشتتوا اللي تِبعنوه. 38 نصيحتي لكم إنو تبّعِدوا من هاذوم الناس وتخلوا لهم حالهم ، فإذا كان عملهم هذا وأفكارهم هذي من البشر ما شفلحوش. 39 وإذا كان من عند الله مشتقدروش أبداً إنوه توقفونهم، وشتكونوا خليتم أنفسكم محاربين لله."
40 أقتنعوا أعضاء المجلس بكلامُه وعملوا بنصيحتُه ،ودخّلوا الرُسل وجلدونهم وأمرونهم إنو ما يتكلموش بإسم يسوع المسيح، وفـكّـو لهُـم.
41 فخـرجوا الرسل من المجلس فرحين ،لإنو الله أعتبرهم مستحقين للإهانة عشان إسم يسوع المسيح. 42 وكانوا كل يوم وهـُمّ بالهيكل ،ومن بيت لبيت يُعلموا ويُبشِّروا بيسوع المسيح .