6 ¹ وبآذيك الأيام زاد عدد التلاميذ، وحصل إنو المؤمنين اليهود اليونانيون المغتربين اذمروا من اليهود العبرانيين المقيمين، لإنو أراملهُم مكانينش يُحصلين نصيبهن من المساعدات اليومية. ² فقاموا الرسل الاثنى عشر جمعوا كل التلاميذ وقالوا لهم: "ما يصلوحش إنو نحنا نهمل تعليم كلمة الله ونقوم نوزع المساعدات. ³ يا إخوة إختاروا من بينكم سبعة رجال، تكون سمعتهم تمام، ممتلئين من الروح القدس والحكمة، عشان نُكلِّفهُم بآذي المهمة. ⁴ ونِحنا شِنداوم على الصلاة وخدمة كلمة الله." ⁵ كل التلاميذ أعجبهم هذا الرأي، واختاروا استفِانوس، رجَّال مليان بالإيمان ومن الروح القُدس وفِيلبُّس وبُروخُورُس ونِيكانـُورَ وتيمون وبرميناسَ، ونيقولاوُسَ الأنطاكي اللي كان يهودي من قبل . ⁶ وجابوا السبعة الرجال لعند الرُسُل، وطرحوا الرسل أيديهُم فوقهم وصلوا عشانهم. ⁷ وانتشر كلام الله، و زاد عدد التلاميذ بشكل كبير بالقدس، وكثير من الكهنة آمنوا بيسوع المسيح. ⁸ كان إستِفانُوس مليان بالإيمان والقوة، كان يعمل عجائب ومعجزات عظيمة بين الناس.

⁹ فعارضونوه بعض الأشخاص اللي ينتسبوا لجماعة العبيد المحررين، وساعدونهم بعض اليهود من القيروان والإسكندرية، ومن كِيليِكيَّا وآسيا، وبـدأوا يُناقشوا استفانوس. ¹⁰ لكن مقدروش إنو يهزِمنوه بسبب الحكمة اللي جابه لُه الروح القدس بالكلام. ¹¹ فجابوا رشوة لبعض الناس وقالوا لهم قولوا: "سِمعنا إستفانوس يتكلم بكلام كُفر على مـوسى وعلى الله." ¹² آذي التُهمة خلت الناس والشيوخ وعلماء التوراة، يثوروا ضد إستفانوس فمسكونوه، وسلمونوه للمجلس الأعلى، ¹³ وجابوا شهود زور يشهدوا علوه يقولوا: "هذا الرجَّال دائماً يسب الهيكل المقدس والتوراة. ¹⁴ وسِمعنوه يقول: إنو يسوع الناصري شِـهدِم هذا الهيكل، وشُغيِّر العادات اللي جابِه لنا موسى." ¹⁵ كل الحاضرين بالمجلس لفتُو جِهتوه، فشافوا وِجهه كأنوه وِجه ملاك.