4 ¹ ولما كان بطرس ويوحنا يكلموا الناس ، جاءوا لعندهم الكهنة ، ورئيس حرس الهيكل والصدوقيون ، ² متضايقين لإنو يوحنا وبطرس كانوا يعلموا الناس ويقولوا إن الأموات شيحيوا مرة ثانية مثلما قام يسوع . ³ فمسكوهم وحبسوهم بالسجن لليوم الثاني ، لإنو قد كان أجاء المساء. ⁴ وكان في ناس كثير من اللي سمعوا الكلمة آمنوا ، وصار عدد المؤمنين من الرجال بحدود خمسه ألف .

⁵ و في الصبح باليوم الثاني اجتمعوا بالقدس رؤساء اليهود والشيوخ ومعلمي الشعب ، ⁶ ومعاهم حنَّان رئيس الكهنة ، وقيافا ، ويوحنا ، والإسكندر ، وكُل اللي هم من عائلة رؤساء الكهنة . ⁷ وجابوا بُطرس ويوحنا لعندهم وسألوهم: "بأي قوة ، وبِاسم من فعلتم كذا ؟" ⁸ فامتلي بُطرس من الروح القدس وقلهم "يا رؤساء الشعب وشيوخه، ⁹ إذا كنتم تسألونا اليوم بسبب الإحسان إلى إنسان مريض وتشتوا تعرفوا كيف شفي، ¹⁰ إذن اعلموا كلكم ،وليعلم كل بني إسرائيل، إنو هذا الرجّال اللي واقف قُدامكم بكامل صحته بقوة اسم يسوع المسيح الناصري اللي أنتم صلبتموه ، واللي الله أقامه من الموت . ¹¹ يسوع هو الحجر اللي أنتم رفضتموه يا بنائين ، وهو نفسه رجع حجر زاوية الأساس ، ¹² ما فيش نجاة بدون يسوع ، لإنو ما فيش بالعالم كله أسم ثاني جابه الله للبشر فيبه يجب إنو ننجي ."

¹³ واستغربوا المجتمعين من شجاعة بُطرس ويوحنا ، لما عرفوا إنهم من عامة الشعب ومش متعلمين ، وعرفوهم أنهم كانوا مع يسوع . ¹⁴ ولما شافوا الأعرج اللي شفي واقف معاهم ، ما حصلوش شيء ينتقدوهم فيبه ! ¹⁵ وأمروهم يخرجوا من المجلس ، عشان يتفقوا بينهم بين . ¹⁶ وقالوا: "إيش نسوي بهاذم الاثنين الرجال ؟ كُل أهل القدس عارفين إنهم عملوا معجزة كبيرة ، وما نقدرش ننكر! ¹⁷ وعشان ما ينتشر الخبر أكثر بين الناس ، نهددهم ما يذكروش لأحد هذا الأسم من الآن".

¹⁸ وجابوهم وأمروهم ما يذكروش اسم يسوع ولا يعلموا الناس فيبه . ¹⁹ فقلهم بُطرس ويوحنا: "احكموا أنتم: هل يصلح بنظرالله إنو نطيعكم أنتم أم نطيع الله؟ ²⁰ إحنا ما نقدرش إنو نسكت إنما شنتكلم باللي شفناه وسمعناه." ²¹ فهددوهم مرة ثانية ، وما حصلوش طريقة لمعاقبتهم ، فخرجوهم خائفين من الشعب ، فكُلهم يسبحوا الله على المعجزة اللي شافوها ، ²² لأن الرجّال اللي وقعت فيبه معجزة وشفي قد كان عمره أكثر من اربعين سنة . ²³ ولما خرجوا بُطرس ويوحنا رجعوا لعند اصحابهم وكلموهم بكل اللي قالوا لهم رؤساء الكهنة والشيوخ ، ²⁴ ولما سمعوا كلام بطرس ويوحنا ، رفعوا صوتهم بقلب واحد لله ودعوا: "يارب ، يا خالق السماء والأرض والبحر وكل ما فيها ، ²⁵ أنت قلت بالروح القدس على لسان عبدك داود: ليش هاجت الأمم؟ وليش الشعوب تتأمر بالباطل؟ ²⁶ اجتمعوا ملوك ورؤساء الأرض ، واتفقوا ضد الله والمسيح! ²⁷ وتحقق هذا الكلام بالفعل، اتفق هيرودس ، وبيلاطس البنطي ، والكفار وبني إسرائيل ، ضد ابنك القدوس يسوع اللي جعلته مسيحاً ، ²⁸ وعملوا كُل ما سبق ورسمته أيدك وقضت مشيئتك أن يكون . ²⁹ والآن يارب شوف لتهديدهم ، ومكن عبيدك من التكلم برسالتك بكل شجاعة . ³⁰ ومد يدك للشفاء وسوي معجزات وعجائب باِسم ابنك يسوع القدوس".

³¹ ولما هُم يدعوا الله اهتز المكان اللي هُم جالسين فيبه ، وامتلأوا كُلهم بالروح القدس . وبداءوا يتكلموا بكلام الله بكُل شجاعة ! ³² وكانوا كُل المؤمنين قلباً ونفساً واحدة . وما فيش واحد منهم يقول اللي معه له وحده ، فكل حاجة كانت لهم كُلهم . ³³ وبقوة عظيمة الرسل كانوا يشهدوا إنو يسوع قام من الموت . ونعمة عظيمة تحل على كُلهم . ³⁴ وما فيش بينهم واحد محتاج ، لإنو كل اللي كانوا معاهم مزارع وبيوت كانوا يبيعوهن، ويجيبوا قيمتهن . ³⁵ ويجيبوها للرسل ، وهم يوزعونها حسب احتياج كل واحد .

³⁶ ومن بين هاذم يوسف ، اللي كان الرسل يدعونه برنابا يعني ابن التشجيع ، وهو من قبيلة لاوي ، ومعه جنسية قبرصية . ³⁷ وكان عنده مزرعة ، فباعها وجاب القيمة واعطاها للرسل!