3 ¹ وبيوم من الأيام ، راح بُطرس ويوحنا للمعبد اليهودي يصلوا الساعة ثلاث العصر . ² وقُدام باب المعبد اللي يسمى باب الجميل ، في كان رجّال جالس من يوم ما ولد وهو أعرج ، يتحملوه الناس كل يوم ويطرحوه عند الباب عشان يطلب صدقة من اللي يدخلوا الهيكل. ³ ولما شاف بُطرس ويوحنا يدخلوا المعبد ، طلب منهم صدقة . ⁴ فا شافوا لعنده نظرة طويلة ، وقله بطرس: "شوف لعندنا" ⁵ فشاف لعندهم ، وهو متوقع يتصدقوا علوه . ⁶ وقله بطرس: "ما فيش معي فضة ولا ذهب ، بس شاجيب لك اللي عندي : باسم يسوع المسيح الناصري قُم وامشي!" ⁷ ومسكه بيده اليمين وأقامه ، وبنفس الوقت تقوت أرجله وكعبه ، ⁸ وقفز ووقف وبدأ يمشي ، ودخل معاهم للهيكل ، وهو يمشي ويتقفز فرحان ويسبح الله. ⁹ وشافوه كُل الناس الموجودين وهو يمشي ويسبح الله . ¹⁰ وعرفوه إنو الشحات الأعرج اللي كان يجلس قُدام باب الجميل ، واستغربوا كثير وانذهلوا من اللي حصل . ¹¹ ولما كان الرجّال يلازم بُطرس ويوحنا بالهيكل بقاعة سليمان ، جري لعندهم ناس كثير واتجمعوا عندهم مستغربين . ¹² ولما شاف بطرس هذا قلهم: "يا بني إسرائيل ، ليش تستغربوا من اللي حصل ، وليش تشوفوا لعندنا كأنه إحنا بقدرتنا أو إيماننا خلينا هذا الرجال يمشي؟ ¹³ إنما رب إبراهيم وإسحاق ويعقوب ، رب آبائنا ، مجد ابنه يسوع ، اللي سلمتوه للقتل وانكرتموه قُدام بيلاطس ، اللي كان أراد يخرجه . ¹⁴ أنكرتم القدوس البار ، وطلبتم مسامحة رجال قاتل ، ¹⁵ وقتلتم واهب الحياة . بس الله قامه من الموت ، وإحنا شهود على ذلك . ¹⁶ وهذا الرجّال اللي تشوفونه وتعرفونه ، اتقوي بالإيمان بِاسم يسوع . فالإيمان بيسوع هو اللي شفي الرجّال تماماً مثلما تشوفوه كُلكم .

¹⁷ وانا داري يا إخواني ، أنكم أنتم ورؤساءكم عملتم هذا بجهل ، ¹⁸ والله بهذا تمم اللي قد كان أوحى فيبه لجميع الأنبياء إنو المسيح شيتألم . ¹⁹ فتوبوا وارجعوا عشان الله يسامح ذنوبكم، ²⁰ وتجيكم أيام الفرج من عند الله ، بيرسل لكم يسوع المسيح مرة ثانية ، اللي سبق أختاره لكم ، ²¹ والمسيح لازم يبقي بالسماء لما يجي الوقت اللي يتم فيبه إصلاح كُل شيء مثلما أوحى الله لإنبيائه الصالحين من زمان . ²² وقد قال موسى: شيبعث الله لكم من بين إخوانكم نبي مثلي ، فا سمعوا للي شيقلكم . ²³ واللي ما يسمعش له يُهلك من بين الناس . ²⁴ وكمان تنبأ على هذي الأيام كل الأنبياء من صموئيل وكُل اللي أجاء برسالة بعده . ²⁵ وانتم أولاد الأنبياء وأولاد العهد اللي عمله الله مع لآبائنا لما قال لإبراهيم: بذريتك شتحصل البركة كُل شعوب الأرض . ²⁶ وعشانكم أولاً أقام الله ابنه يسوع ورسله علشان يبارككم بإنو يرجع كل واحد منكم من عمله الشرير."