5 وكان في بالقدس بيهذاك الوقت يهود أتقياء أجاءوا من كل بلاد العالم . 6 فلما سمعوا هذا الصوت ، أجتمع ناس كثير منهم . وكانوا في حيرة لأن كل واحد كان يسمعهم يتكلموا بلغته . 7 فاستغربوا وتعجبوا وقالوا : " هاذم الناس اللي يتكلموا هم كلهم من الجليل . 8 فكيف يسمع كل واحد مننا لغة البلاد اللي ولد فيبها ؟ 9 فبعضنا فرتيون ، وماديون وعيلاميون . وبعضنا من سكان مابين النهرين واليهودية ، وكبدوكية ، وبنتس ، وأسيا ، 10 وفريجية ، وبمفيلية ، ومصر، ونواحي ليبيا اللي هي قريبة من القيروان ،وفي بيننا كثير من الرومانيين الزوار ، 11 يهودا ومتهودين ، وبعض الكريتيين والعرب. ومع هذا نسمعهم يتكلموا على أعمال الله العظيمة بلُغاتنا إحنا ! " 12 وجلسوا كلهم يسألوا بينهم البين بإستغراب وتعجب : " ايش يعني هذا كله ؟ " 13 وناس ثانيين كانوا يتمسخروا ويقولوا : " هاذم سكارنيين !" 14 فوقف بطرس مع الرسل الأحد عشر ، وكلم الناس الحاضرين بصوت عالي ، وقال : " يا يهود، ويا كل الموجودين في القدس ، انتبهوا وأسمعونا . 15 هاذم مش سكارنيين مثلما انتم تتوقعوا ، لانُه الساعة تسع بالصباح . 16 بس هذا اللي اتكلم به بلسان النبي يوئيل : 17 يقول الله : بالايام الأخيرة شاسكب روحي على كل بني آدم ، وشيتنبأ أولادكم وبناتكم ، و شبابكم شيشوفوا رُؤى ، ومشايخكم شيحلموا باحلام . 18 وبيهذيك الايام شاسكب من روحي على العبيد حقي كلهم ، رجال وحريم فيتنبأوا . 19 وشاعمل عجايب بالسماء من فوق ، ومعجزات تحت الأرض ،أينما شيكون دم ونار ودخان كثير . 20 والشمس شتظلم ، والقمر شيرجع للون الدم ، قبل ما يجي يوم ربنا ، هذاك اليوم العظيم الجليل . 21 بس كل من يدعي بإسم الرب شيخلص !
22 يا بني إسرائيل إسمعوا هذا الكلام : يسوع الناصري هو رجّال أثبت الله لكم على إنو أرسله، بمعجزات وعجايب وعلامات عملها بواسطته . وأنتم عارفين بهذا لإنها حصلت بينكم . 23 وهو سلم لكم حسب خطة الله المرسومة وعلمه السابق ، فصلبتموه وقتلتموه بمساعدة الكفار. 24 بس الله حرره من وجع الموت وأقامه حي، فماكنش من الممكن للموت إنو يجعله مُقيد. 25 لأن داوُد يقول علوه : "كنتو أشوف الرب أمامي دائماً هو على يميني علشان ما اتزعزع. 26 لهذا قلبي فرحان وابتهج لساني ،وجسدي كمان يرقد على أمل. 27 لانك مشتسيبش نفسي بعالم الأموات ، ومشتسمحش لقدوسك إنو يتعفن بالقبر. 28 هديتنا إلى طريق الحياة ، وتملأنا بالفرح بمحضرك .
29 " يا اخوة ، إسمحوا لي أننا أكلمكم بصراحة ، أبونا داوُد مات ودفن ، وقبره موجود هنا لهذا اليوم . 30 لإنو داوُد كان نبي ، وعارف إنو الله حلف له يمين بإنو شيجيء المسيح من نسله ويجلس على عرشه . 31 فشاف المستقبل وأتكلم على قيامة المسيح بكلامه بان الله ماشيسبوش بعالم الأموات ،وجسده مشيتعفنش بالقبر . 32 فيسوع هذا ، الله اقامه حي . وإحنا كلنا نشهد بيهذا. 33 ولما رُفع لعند يمين الله ، لاقي من الأب الروح القدوس الموعود بُه ، وسكبه علينا . وهذا هو اللي تشوفونُه وتسمعونُه الآن . 34 لأن داوُد ماطلعش للسماء بس هو نفسه يقول : " قال الله لسيدي: " أجلس على يميني، 35 عشان أخلي اعدائك يكونوا تحت أرجلك ." 36 " إذن لازم على كل بني إسرائيل أنهم يعرفوا كلهم ، إنو الله قاخلي يسوع هذا الذي صلبتموه انتم ، رب ومسيح ."
37 ولما سمعوا الناس هذا ، اتقطعت قلوبهم ، فسألوا بُطرس وباقي الرُسل : " يا اخوة ، ايش نسوي ؟ " 38 جاوب عليهم بطرس: " توبوا ، وليتعمد كل واحد منكم باسم يسوع المسيح ، عشان ذنوبكم تُغفر، وتحصلوا هبة الروح القدس. 39 فالوعد هو لكم ولأولادكم ولكل الأمم البعيدين ، أي لكل من يدعوه الرب إلهنا. "
40 وكان بطرس يعلمهم بكلام ثاني كثير ، وحذرهم وقال : " أنقذوا أنفسكم من شر هذا الجيل الفاسد ." 41 فاللي قبلوا منهم كلامه اتعمدوا . واجتمع بيهذاك اليوم حوالي ثلاثة ألف شخص . 42 وكانوا يداموا على حصول تعليم الرُسل ، وعلى حياة الشركة ، وكسر الخبر، والصلوات .
43 ولما حصلت معجزات وعلامات كثير بأيدي الرسل ، حصل خوف عند كل شخص . 44 والمؤمنين كانوا كلهم متحدين ، وكل حاجة مشتركه بينهم . 45 كانوا يبيعوا الارض حقهم وأملاكهم ، ويوزعوا القيمة على الناس الثانيين حسب إحتياج كل واحد منهم. 46 وكانوا يتجمعوا مع بعض ببيت الله كل يوم . ويكسروا الخبز في البيوت ، وياكلوا الاكل مع بعض بفرح وتواضع. 47 وكانوا يسبحوا الله ، وكانوا يحصلوا رضى من الناس كلهم . وكان المسيح كل يوم يجمع اللي يُنعم عليهم بالنجاة الى جماعة المؤمنين .