¹ ኣኪ ሃኦኬና የናሹጝቴ ከጋጝ ከክርስቶስያጝ፣ ከኦይን ክርስቶስ ኡፔ ኦካ ቡዋካ ባሪዮ ቡዎን ሳጊ ዎሽባ ኦግታይ ኣኖጝ፤ ² ቃቦ ጉዩዻ ካኣይኬ እን ኣኔን ዾዮክ ዬ ካማርኬ ኦካ ዻሉጝ ኣዬን። ³ የኣርሻያዬ፤ ዻቆ ጉዩዻ ከክርስቶስ ከታካ ባሪዮ ድካዬ፤ ⁴ ዻቆ ጉዩ ካኣዮጝ ከሹካጝ ዹዋልሺኔ ክርስቶሱጝ እየውዻ ከሹ እን የዻዋልሺናባ ከጎቢንታ ከእሺ። ⁵ ዬ ኒሺባ ኣርግማ እን ጉዩካ ዳሉጝ፤ ጊታይዻ፥ ኩጳሞ፣ ኦኬ ጋራን፣ [ቡልኔን]፣ ኣርግማ ጋራዬ ኦግታይ ኣይኬ ኦካ ባሪዮ ሹኑክ ይሁኔኑጝ። ⁶ ከናንዳካ ኦግታይዻ ማኒትካ ባሪዮ ኩንሼባ ኦካ ሃንታ ጊታይ ማር ዋይሺኔኑጝ፤ ⁷ እየውዻ ከኦካ ዻቆ ባ ጉዩካ ሌሜን የኣንቶጝ የኣኒና ከኦግታጝ ጃሌጆሌን፤ ⁸ ዬ ጋን ዻብሾ፣ማኒት፣ ይርኔን፣ ሐሜቴ ሃሳዋ ጊታይካ ሪግሺሼ ጊታይ ኣኖጝ ፓይላ የቡልባ፤ ⁹ ናንዳካጝ የቡልቴ ውር ጌቾ እን ከዋድማ ኔኒዬ የፓቅቶጝ ኦይዲ ኦካ ጋጝ ከሾሮ ሃሳውኔን። ¹⁰ ከሙኒኔ ዴንታካ ፋጣሩጝ የኪማያ ውር ሃሊ እን ሻሜኬ ኦኬ እባጄን ሃሉጝ፤ ¹¹ ከኦይን ግሪክ ወይ ይሁዳ፣ ኬና ቆሬ ወይ ኬና ማሬ ቆሬን፣ ኣርማዊ ወይ ኣስኩቴስ፣ ሺጝ ውርካ ዋድማ ወይ ታቺዬ ዋና ጌዬን ኣኔኬን፤ ኣይባዬ ክርስቶስ ሃፓይላ፤ ሃኬ ፓይላ። ¹² ኣኪ ከእያይ የኣይቴ ጊታይ ይሁሺኔዬ ጊታይ ናሺዬዬ ጊታይ ጊድዬኬ ባሪዮዬ ጎምባ ዻዹጝኔን፣ ሌሜሞ፣ ሹቃቲ፣ ዴንታ ሹቃዬ ኦኬ ዶንሺዬኔ፤ ¹³ ቶይባ ጋጝዻ፤ ከኦጉዩ ውር ክየም ከኦካ ኑዋ ኣኔያ ኦኬና ካሺጜ ሺዕሺሼ ኣንባያጝ ሺዕሺቴባ ጋጝ፤ ከእያይ ታቺ እን ዋይሼ እየው ካሺዺባጝ እየውዻ ዋይሺቴ ኑዋ ካሺዺባ። ¹⁴ ከኦካ ጊታጝ ፓይላ ኦኬ ካሎን ከጋጝ ኣዬን ጎምባ ናሺማ እን ማር ጱኔን። ¹⁵ ማቲኬ ሩዋ ክየሜ ሹቃ ኣዬንካ ክርስቶስ እን ሺወ እየው ካጌጳዽባ ኦካ ሻን ጉዩ፤ ማቲባ ጊታኬናካ ጊሺህንቴ። ¹⁶ ክያጃካ ክርስቶስ ካኣኔባ ኦጉዩ ከቋቄን፤ እርርሲባ ጋጝዻ ከፓካልማሞ ፓይላ፤ ኪሊባ ጋጝዻ፤ ከይያሪዬ [ከማሕሌቴ]፣ ከኦኬ ሹቃካ መንፈስዻ ከጎሺዬን ኪውቴባ ባሪዮ ኬሸን ጉዩ። ¹⁷ ኬታይ ኔኑጝ የሻምቴ ባሪዮ ሹኔ ጎሺዬ፣ ኣይኒን ከክያጃጝ ኣኒን ከኦግታይ የሻምቴ ጃውጝ ፓይላ ሻምባ ከሮጝካ ኢየሱስ ታቺ እን። {ኦካ ውርካ ጶሮካ ቶኦካ ይሁኔን ዻዬን} ¹⁸ v 18 ሃኣጛን ዮ፤ ከታካ ታቺ እን እጝ ኣይ ልኩጝ ዋይሼንባ ጁማንቴን ጉዩ። ¹⁹ ጁማንቴን ዮ፤ ናሺባ ሃኣጛን ጉዩ፤ ኦይድ እንግን ኦኬ ጅቄ ማቲሼን። ²⁰ ሃንታን ዮ፤ ይን ካዋዝንሲዬ ታቺ እኑጝ ናንዳካ ውራን ጉዩ ዋይሼንባ ከኦኬ ፓይላ፤ ²¹ ሹቡጌን ዮ፤ ካማር ቃቦ ጊዬይ ቱምዬኔ ኦይድ ሃንታ ጉዩ ማኒሺሽቴን። ²² ውርካ ዋድማን ዮ፤ ኦይድኬ ውር ዋዝንሲዬን ወይ ናንዳካ ቶይኔን ሻሜኔ ኬሸን ባሺ ከታቺ እን ሪግሺኔን ናንዳካ ውር ታታቻን ጊታይ ጉዩካ ዳሉጝ ዋይሼንባ ከኦኬ ፓይላ። ²³ ኦግታይ የሻምቶጝ ፓይላ ማር ናንዳካ ውርኔ የሻሚቴ ናንዳካ ታቺ እኑጝ ኳሚዬ ሻሚባ ኬሸን ገዛ ጉዩ፤ ²⁴ ከታካ ታቺ እን ኦካ ሆርምኔን እን ከቦቴኬ ብድሩጝ ኣኖጝ የእባጃያዬ፤ እንኬ ዋድምቶጝ ሃክርስቶስ ታቺ እን። ²⁵ እንካ ሴሶዻ ጌይባ እንካ ቡዋ ኔኑጝ፤ ጁኒኔንዻ ኣኔኬን።