¹ ታታቻን ዮ፤ እየውዻ ከፎላ ዾዮክ ታቺ እን ኣኖጝ ናንዳካጝ የእባጅቶጝ ቶይባ ውርካ ዋድማ ጉዩ ከኦኬና ኣይ ጃወ ከሹቃቲዬ። {ክሊማ ዶክ} ² ከጎሺ ጬዬኔ ቁዋቅትሺዬ ይወንባ። ³ እን ኣን ሃማቲዬ ውርካ ቁምኔኑጝ ካቻሊቴ ኦካ ድኬንካ ክርስቶስ ኬራፌኑጝ፣ ባሪዮ ካቦውሼ ኡዋው ሃፑካ ክያጃ ኔኑጝ ይሁሼንባ ፕር ናንዳካ ኡዋዻ፤ ⁴ ፕርዻ ሃሳውኔን ካሁሉኩሼ ኣኑጝ ካሃሳወ ክያጃ ጃውጝ ይሁሼን ኣንባ። ⁵ ከውር ጊታይ ኣኔን ሹኑኩጝ ከጋጝ ኣዬን ኣዬን ጉዩ፤ ጃሌጆልባ ከፓካልማሞ፤ ከባሊ ጊታይ የጌይቴዻ ፓይላ ጠቅምህንቴባ። ⁶ ናንዳካ ውር ክየም ክየም ሃእያን ካሁሉኩሼ እየው ቶግ ዋሼኑጝ ከእባጅቶጝ ሃሳዋ ጉዩ ከኦኮኑጝ ጉትሼ ሶቆጝ ሹ ጮል ካማቲባ ኬና ቋቁሼ ከኣይኔን። {ጌሶካ ላልምኔን} ⁷ ቲኪቆስ ሜይሼባ እየው ዴንታ እን ሃኣኖጝ ፓይላ፤ እሺ ሃጪኔ ኬና ናሺዬዬ ውርካ ዋድማ ሹቃዬ፣ ከታቺ እንዻ ሃኣሽካራ ከኣን። ⁸ ከእባጅ ዴንታጝ ሃኣኔዬ ሻን ጉዩዻ ካሌምዮጝ ናንዳካ ክያጃጝ ሃይዕሲሼባ ሃሚን ጉዩጝ፤ ⁹ እሺዻ ኩንባ ከውር እን ኣይ ጉዩዬ ኣይ ሹቃዬ ናሺዺዬ ከጪኔ ጉዋዩ ኣናሲሞስ ሃሚን ጉዩጝ፤ እንግንዻ ሜይሼባ እየው ናንዳካ ዴንታጝ ሃኣኖጝ ፓይላ። ¹⁰ እን ቁሜኬ ኣኑጝ ኣርስጥሮኮሴ ውዋካ ጪኔካ ጁዋኔካ በርናባስ ማርቆሴ ቦዋ እየው ሆፎ፤ ናንዳካ ማርቆስ ኦኬ ፓይላ ሄክሻ እየው፤ ኣኪ ኩና ሃሚን ጉዩያጝ ቦውባ እሺ። ¹¹ እን ሺጜ ኢዮስጦስ ኢያሱዻ ቦዋ እየው ሆፎ። ከኦካ ጫቃንካ ውር ጊታይ ቆሮጝ ናንዳካ መንግስትካ ባሪዮ ጊታይ ኣሽክዬን ከኣኑጝ ሌምሲ ኣንዻ ሃጊጝጵን፤ እንግንዻ ሌምሲያ ኡዋው። ¹² ከእን ኣይ ውር ጉዩጝ ውርካ ዋድማካ ኢየሱስ ክርስቶስ ኤጳፍራ ቦዋ እየው ሆፎ፤ እሺዻ ከቁዋቅትሽ ካሎኔ ከዳዲ ፓይላ ፓይላዬ ከክያጃካ ባሪዮ ፓይላ ካቁዋቅትሻ ጎሮጝ ሹ ጮል ናንዳካ እየው ኣኔን ከይሁኔን ዳርግኔን። ¹³ ፕርዻ ናንዳካ እየው ፕር ከሎዶቅያዬ ጊታይ ኣኔን ከተማካ ኢያራጝ ቁዋቅትሼ ካጋሽክዮግ ኣን ሃማኝሺሼ እየውባ። ¹⁴ ሉቃስ ሃኪም እን ናሺዮጝ ፕር ዴማስዻ ቦዋ እየው ሆፎ። ¹⁵ ጪኒጌን ጊታይ ጉዋዩ ኣኔን ሎዶቅያጝ፣ ጊታይ ኣኔን ለንምፋን፣ ውርካ ቶኦካ ይሁኔን ጊታይ ኣኔን ቶኦ ቱዎጝዻ ቦቴ ኣንባ ሆፎ ጊዬይ። ¹⁶ ሜርሜር ይጝ ኮምሼያ እየውያጝ ጩዋ ፕር ቶኦካ ይሁኔን እን ኣኔን ሎዶቅያጝ ካኮሞጝ ሻሚባ፤ ፕር እየውዻ ኮምባ ሜርሜር እን ኣኔን ሎዶቅያጝ። ¹⁷ ናንዳካ ኣክርጳዻ፣ ዋድማ እን ቦወኬ ታቺ እኑጝ ዋይሺቴባ እሺ ኣን ኣጅሼባ ሌይ ሃምካ ቱንሲ ሄክሺሼን። ¹⁸ ጌሶጝ ቶኪኬ ቡዋ ናኑጝ ኣን ሃኣይ ጳውሎስ። ቃቢ ቁምኔን ናኒ። ኣይኔን ካኣይኬ እየው።