¹ ከእን ሺዺዻካ ጪኒጌን ናኒ ዮ፤ ናንዳካ ባሪዮ ዋዝንሲዬን የሻማ እያን ቆቤን ካሁሉኩሼ እየውጝ ሃእርርሲያያ እየው፤ ከኣኩሉዻ የኣኒና እያይ ቆቤን። ናንዳካጝ ኣዬዻ ከታቺ እን ከኢየሱስ ከእን ሃይሁንቴ እየወ ከእን ሃክሊቴ እየወ ከዴንታ ኬና ሳጊኬ ኦካ ይጝ ከይቄንኬ ይጜ ጊያ። ² ከጌጳሞካ ኢየሱስ ታቺ እን ሃኣይቴ እየው ኤርጎ ኬና ኣኔን እያኑጝ የእባጃያ። ³ ክያጃካ ባሪዮ ከጌይኬ ኦካ ኩጳሞ ዹኬ ከይወንባዬ ጊያ፤ ⁴ ፕርዻ ውር ክየም ክየም ከሩዋ ኔኒ ካእባጅ እንካ ጎሜኬ ይሁኔኔ ጎቢንታዬ ጊያ፤ ⁵ ይንዻ ከኣሕዛብ ጊታይ ማር ባሪዮ እባጄኑጝ ካማርኬ ኣርግማካ ኣሩጝ ኣዬን። ⁶ ውር ክየምጵንዻ ካማርኬ ኦግታጝ ሳጊዬ ጪኔ ቱዋኔን፤ ናንዳካኦ ከእያይ ሃሜይቴ እየው ከኦካ ሌሜንካ ይጜ ሃኣጅሺሽቴ እየውጝ ታቺ እን ከሴሲ ጊታጝ ኣኔን እያጝ ከጊታይ ኣሽኪ ቡልሼባ ባጃ፤ ⁷ ባሪዮ ካዋካ ጆልኬ ይሁኔኔ ዬ ካኒ ሺውሼኬን ኡዋው ኦኬ ጋራ። ⁸ ኣኪ ውር እን ቦዊ ክሊማጜ ማር ናሺዬኑጝ፣ እን ቦውዮጝ ሃባሪዮ እን ኣይ እየው መንፈስ ቅዱስ ዬ ማር ውሬን። ⁹ ናንዳካ እን ጪኒጌንካ ጋጝ ካናሺዬ ጋጙጝ ውር ክየምጵንዻ ካቶኩሼ እየው ዎሺሽኬን፤ ናንዳካኦ እየው ከናሺቴ ጋጙጝ የእርርያያ እየው ኤታጋን ከኦካ ባሪዮ። ¹⁰ ከጪኒጌን ጊታይ ጉዋዩ ጌዬን መቄዲንያ ፓይላ የናሺቶጝ ሃኬና ጊባጄ፤ ኣይባዬ ጪኒጌን ናኒ ዮ፤ ከኦካ እን ሳጊኬ ኦጙጝ ከፓይሺቴ ሌሜኑጝ ሃክሊያ እየውባ። ¹¹ ከሌሜንካ ይጝ ከእያይ ሃሜይቴ እየውጝ ኣሽኪባ ከቡዋ ጉዩ፤ ቆቢባ ሹይ፤ ሻሚባ ኦካ ክያጃ ጉዩጵን። ¹² ይንዻ ቆቤን ጉዩ እንካ ሹ ጮሉጝ ከኦካ ውር ጊታይ ኣኔን ሹኑኩጝ ካጎቢሲዬ እየወ ከማርቴ ውር ክየምጵንዻ ኦኬ ዴጩጉ ማቲሼኔ ጊያ። {እንቃ ኩኔንካ ታቺ እን} ¹³ ጪኒጌን ናኒ ዮ፤ ከማርቴ ውር ጊታይ ራጲ እባጄኔ ከሺዽቶጝ ሃዎሻኬን፤ ፕርዻ ከሞይካዽቴ ከውር ጊታኮኑጝ ማር ቃቦ ሹቃ ኣኔኑጝ ሃዎሻኬን። ¹⁴ ከእያይ ኢየሱስ ኣርሼዬ ከእያይ ናሹጜዬ ሃኣምኒያያጝ፤ ጊታይ ኣይኬ ኢየሱሴ ራጱጝ ባሪዮ ቦኩኔባ እንግን ከእሺ እያጝ። ¹⁵ እን ሃሜይቴ እየው ከክያጃካ ታቺ እኑጝ ሃይዕጝ፤ ኡዋው ሃኣንቴባ ከዻቆዬ ሌይ ሃም ታቺ እን ካኩዋዎጝ ሃኣያ ጊታይካ ሺዺ ሃሌማኬን ጊታይ ራጱጝ፤ ¹⁶ ኣይን ታቺ እንዻ ከኤርጎ ታቺ፣ ከናቅድካ ታቺካ ውርካ ኤርጎዬ ከናቅድካ ውርካ ኤርጎካ ባሪዮዬ ጎቤንባ ከፎላ ዾዮኬ። ጊታይ ኣርሺኬ ክርስቶስዻ ሌሜ ናሹጝጓ። ¹⁷ ከኦይን ጩዋ እን ኡዋው ሃሺዽቶጝ፣ ካቆብቴኬ ዻቆጝ ከታቺ እን ፑጉ ክያኒ ቦወን ቦሼባ ኡዋው ከእንግን ሉፍ ክያኒ፤ ከይንዻ ቦን ጮል ሃኣያባ ከታቺ እን ከጋጝ። ¹⁸ ዬ ሌምሲባ ጋጝ ከክያጃጝ።