¹ 1ጪኒጌን ናኒ ዮ፤ ካቶኩሼ እየው ናንዳካ ቦናኔ ናንዳካ ትጌሻኔ ዎሺሽኬን ኣን። ² ናንዳካኦ ጓርጉ ከእያይ ኩኔኬ ምክሩጝ ሹካ ታቺ እንዻ ካኩዋወ እያይኑጝ ኣይን እየውዻ የእባጃያ ከእንካ ሁሉኩሾጝ። ³ ውር ሺጝ፣ ሃሹቃዬ ባይሼንያጝ፣ እሲማ ከእያይ ጎሜ ሃኣጚ ኡሩኬኑጝ ካዮ ኩንሼባ እየው እያይ ሉጉድ፤ ክየምጵንዻ ዻቅኬን። ⁴ ዬ እየው፣ ጪኒጌን ናኒ ዮ፤ ሹ ይን ካቃሲዬ እየው ከጓርጉጝ የማራ ድሙጉ ክያኒዬን፤ ⁵ እየው ፓይላ የኣያ ሃንታካ ኦሜሌል፣ የኣያ ሃንታካ ሹሽዻ። ኡዋው ሃማሬኬ ኦካ ውርካ ምክሬን ወይ ኦካ ድሙጉዬን፤ ⁶ ኣኪ ካጬዬንባ፤ ካኡዋሩጝ ኡዋው ኤታጌን ዬ ካማርኬ ውር ዶክ ጊታይ ራጲ ማቲዬን። ⁷ ጊታይ ራጱጝ ራጳ ከምክር፤ ጊታይ ጮይዻ ጮይባ ከምክር። ⁸ ዬ ኡዋው ናንዳካጝ ሃኣይቴ ውርካ ሹሹጝ፣ ሃክማ እምነቴ ናሺማዬ [ከጥሩሬ]፣ ቃቦ እንካ ባይሼንዻ ሃሻማኬ ኦይንካ እሽኪ ሹቦዬ ከኡዋው ኤታጋን ኡዋሩጜን ካቆቢባ፤ ⁹ ባይሼንካ ባሪዮ ካጌይኬ ታካ ኢየሱስ ክርስቶስ ታቺ እን ጉዋዩዬ ጊያ ዬ ቱምሼ ናንዳካ ማኒቴ ካኒ ኣጁጝኬን ኡዋው። ¹⁰ ካጬዬኑጝ ካራጱጝ ካቆብቴኬ እሺ ከዻቆጝ እሺ ኣርሻ ናንዳካ ኡዋው። ¹¹ ዬ ከኣኩሉክ ከእያይ ጋን ከሻምቶጝ ፓይላ ሌምሲባ ጋጝ ክየም ካሌምሲባ ኑዋ። {ክሊማ እንካ ቱንሱጝ} ¹² ኣኪ ጪኒጌን ናኒ ዮ፤ ከኦካ ጫቃን ጉዩ ጊታይ ኣሽክዬን ከቁዋቅቱጝ፣ ከታቺ እንዻ ጊታይ ኣይኬ ኦጉዩ ዼጌ ጊታይ ኣይ ውርካ ክሊማ ጉዩዬ ከጎቢቶጝ ሃይሁና እየውባ፤ ¹³ ናንዳካ ዋድማ ጊዬይዻ ጎቢባ እንግን ካሎን ከናሺማ፤ ቆቢባ ከጋጝዻ ከሹቃ። ¹⁴ ጪኒጌን ናኒ ዮ፤ ሃክሊያባ እየው ይዕጝ፤ ጎሪባ ጊታይ ማር ዋድማ ኣኔኑጝ፤ ሾይንሺባ ጊታይ ኣይ ሪጎጝ፤ ኬልሺባ ጊታይ ዻቹጝ፤ ዶንሺቴባ ውር ፓይላ። ውር ክየምጵንዻ ከኦካ ባልካ ኦኬ ጋራ ካማር ኦኬ ጋራ ዋሼኔ ኣጅቴባ፤ ኣይባዬ ኣይኒን ናንዳካ እየውጝ ከጋጙጝ ኣይኒን ከውር እንቃጝ ኦይን ኣይ ሹቃ ሻምሼን ሻሚባ ሹ ጮል ¹⁵ ውር ክየምጵንዻ ከኦካ ባልካ ኦኬ ጋራ ካማር ኦኬ ጋራ ዋሼኔ ኣጅቴባ፤ ኣይባዬ ኣይኒን ናንዳካ እየውጝ ከጋጙጝ ኣይኒን ከውር እንቃጝ ኦይን ኣይ ሹቃ ሻምሼን ሻሚባ ሹ ጮል። ¹⁶ ዋዝንዽባ ሹ ጮል፤ ¹⁷ ኦይዲ ቃጪቴኔ ይወንባ፤ ¹⁸ ኣይኒን ከዴንታ ኬና ኣኔን እያኑጝ ጎሺባ፤ ክያጃካ ባሪዮ ከኢየሱስ ክርስቶስ ናንዳካ እየው ሃእኔ። ¹⁹ ኦይዲ ጉካ መንፈስ ካይሲቴን፤ ²⁰ ኦይዲ ሃሳዋ ጊታይ ውርካ ቶካ ባሪዮ ሃሳወ ቦውቴን፤ ²¹ ፓቲሺባ ኦኬ ፓይላ፤ ጎሚባ እን ኣይ ሹቃጝ፤ ²² ከሃይነትካ ኦኬ ጋራ ኬና ኣኔን እያንዻ ፓይባ ዹክ። ²³ ኣምላክ እንካ ሹቃጝ ካቃድሲባ [ሁለንተና] ጉዩ፤ መንፈስ ጉዩ፣ ናፒሲ ጉዩዬ ኣሩጝ ጉዩዬ ከሹካጝ ኢየሱስ ክርስቶስ ታቺ እን ጉዋዩ ኩኖጝ ካማር ዻብሾ ኣኔኔ ካካሊባ። ²⁴ እን ሺው እየው ሃኬና ጌርምኔ፤ እሺዻ ሻምባ። ²⁵ ጪኒጌን ናኒ ዮ፤ ፕር ይወንባ ናንዳካ ኡዋው። ²⁶ ጪኒጌን ናኒ ፓይላ ከሹንቅኔን ኬና ይሁሺኔ ቦውባ ሆፎ ጊዬይ። ²⁷ ሜርሜሩጝ ካኮሜ ኦካ ጪኒጊን ፓይላጝ ሃኤልቅምሼንያ እየው ከታቺ እን። ²⁸ ኣይኔንካ ኢየሱስ ክርስቶስ ታቺ እን ጉዋዩጝ ካኣይኬ እየው።