¹ ዬ ናንዳካጝ ሃማርቴ ዶንሺዬኑጝ ናንዳካ ሹ ጩዋማ ከኦካ ኣቴና ኡዋጵን ኡዋጵን ሺዽዬን ማቲ ሹቃዬ ጌዬና። ² ከኦካ እምነት ጉዩ ከሌምሲ እየወ ካቁዋቅትሽ እየወ ጪኔ ጉዋዩዬ ከዋድማካ ክርስቶስ እን ከኡዋው ኣይ ውርካ ዋድማካ ባሪዮጝ ሃይዕሲቴያ እየው ጢሞቴዎስ፤ ³ ይንዻ ከፓታና ይጝ ውር ክየምጵንዻ ካማር ሪጊሺኔኔ ጊያ። ኡዋዻ ከእያይ ጋጁጜ ኡዋው ናንዳካ ክያጃጙጝ ኣይን እየውዻ የእባጃያ ⁴ ከኣኩሉክ ከሹዋን ጊታባ ሃኣይቴኬ እየውጝ ካጌይቴ ጋሎጝ ሃኣኔን እየው ይሪይሪ ሜይሼን፤ ከእያይ የእባጅቴዻጝ ፕር ማቲያ እያይ። ⁵ ዬ ከሹ እን የማርቴ ኦኬ ክየምጵንዻ ዶንሺዬኑጝ ናንዳካ እምነት ጉዩ እባጄን ሃይዕሲያ፤ ሃሻሜ እንዻ ሃሺጚ ካ እንካ ፓታኒኔኑጝ ፓቲንሲ እየወ ሃሺጚ ዻቾ ጉዋዩ ፓይላ ሺዽያ ማም እያይኔ ጊያ። {ክያጃ ሹቃ እን ጢሞቴዎስ ቦኩኖጝ} ⁶ ዬ ጋን ጢሞቴዎስ ኩንኬ ሃሚን ጉዩ ዮጝ ጉዋዩዬ ናንዳካ እምነት ጉዩዬ ናንዳካ ናሺማ ጉዩዬ ዋይሺሻ ኡዋው ሃሳዋ ባሺ። ፕርዻ ሹ ጮል የጶቅሲቴ ኡዋው ከሹቃዬ ከእያይ ኡዋው ሃፎሽካዽቴ እየው ቶዬኑጝ እየውዻ የፎሽካዽቴ ኡዋው ቶዬኑጝ ሜይሼያ ኡዋው። ⁷ ዬ ጪኒጌን ናኒ ዮ፤ ከጫንቅዬን ጉዋዩዬ ከጋሎ ጉዋዩዬ ፓይላ ከናንዳካ እምነት ጉዩ ሌምሲያ ኡዋው ከእየው። ⁸ ናንዳካጝ የቁዋቅትሼ ጎርቴኬ ታቺ እኑጝ ከኣኩሉክ ጋን ሃቆባባ ከዻቆ። ⁹ ከእየው ናንዳካ ዋዛ እን ሃጌይቴ ኦካ ሌሜንካ ኣምላኩጝ ፓይላ ናንዳካ ባሪዮ ሃቻሊያ ጎሺ ኬና ኣይ እያን ሻምሼን? ¹⁰ ካቶይቴ እየው እንቃዬ ካቋቁቴ እምነት እን ጉዩ ጆጊ ከምክሬ ሹሼ ሃቁዋቅትሻዬ ሃይሁናባ ካሎን። ¹¹ ኣይን ካንዻጝ ኣምላክ ጉዋዩዬ ሹኔ ጉዋዩዬ፣ ኢየሱስ ክርስቶስ ታቺ እን ጉዋዩዻ ካፓይንቴ ሃሚን ጉዩጝ ካኣሽክሼባ ኡዋው ጉዋር ጉዋዩ። ¹² ከእያይ ኡዋው ሃናሺቴ እየውጝ ፓይላ ናሺማ እን ጉዩ የኣይቴኬ ጋጜ ናሺማ እንጉዩ የኣይቴኬ ውር እንቃዻ ታቺ እን ካጁዋንትሺሼባ እየው፤ ካሺዕሺሼባ እየው። ¹³ ኢየሱስ ክርስቶስ ታቺ እን ጉዋዩጝ ከሹ እን ኩኔኬ ውርካ ይሁኔን ፓይላጝ ከኦካ ሌሜንካ ኣምላክ ጉዋዩዬ ሹኔ ጉዋዬዬ ኦይድ ጊታኬና ማር ዻብሾ ኣኔኔ ከማቲ ውርካ ይሁኔኔ ከጌይንቶጝ ካሻምባ ሻን ጉዩ ጫንቃል።