¹ ጪኒጌን ናኒ ዮ፤ ሃፓይንቴ ኦጉዩጝ ማሬ ናንዳካ ማም እያይ ኣዬኑጝ እየውዻ የእባጃያ። ² ከእያይ የእባጅቶጝ ከኦካ ሌሜንካ ይጝ ከኦከ ፊልጵስዩስ ሃጌያ ጋሎዬ ሃዳርጊናያ፤ ኣይባዬ ኖኩማ ታቺ ሄክሺኒን ኡዋውጝ ካሜይቴ እየው ክያጃ ሹቃካ ባሪዮጝ ሃጌያያ ሾያሞ ከኣምላክ። ³ ይሁኔን እንካ ሻምቶጝ ማርኬ ኦኬ ጊያምሺኔን ወይ ማርኬ ቃቦ ጋራዬን ወይ ማር እንካ ዎሽቴኔን። ⁴ ኣይባዬ ክያጃ ሹቃ ከኤልቅሞ ቦወን ከእያይ ባሪዮ ሻሜ እየው ሄካዬ ኮሟጝ ሃማቲያ ውሬ ሃሃሳውናባ። ሃሻምቴ ይንዻጝ እን ሻን ጉዋዩ ቃቢዮጝ ሃናንዳካ ባሪዮ ዬ ሃሺጛ ናንዳካ ዋዝንሲዬኔን። ⁵ ካማርቴ ክያጃ ሾሮ ክየምጵንዻ ሃሳወኑጝ ወይ [ሃሺጛ ናንዳካ ኦኬ ጉዋዩ] ጅጜኔ ሃማርቴ ውር ጊታይ ኣይካ ሙኒኔን ኣዬኑጝ የእባጃያ፤ ናንዳካ ይንዻ ይንዳ ባሪዮ ሃማኝ ጉዋዩ። ⁶ ኣይኒን ከኦጉዩጝ ኣይኒን ከኦካ ውር እንቃጝ፣ ሃዎሻኬን ጎቢንታ እን ጌዬኬ ኦካ ውሩጝ። ከእያይ ሃኣይቴ ሐዋርያካ ክርስቶሱጝ ዋቲ ሃማቲቴያ እየው ኦኬ ዴጩጉ። ⁷ ኣይባዬ ከእያይ ጁዋኔ ሹሹምቢዬ ውዋጝ ኡዋዻ ሃዋካ ጆላያ ከኦካ ጫቃን ጉዩ ከሹቃት። ⁸ ማር ክያጃ ሹቃካ ባሪዮጵኔኔ ካካሺቴ እየው ዻቆ ጉዋዩዻጝ ሌይ ሃምካ ዋዝንሲዬ ኡዋውጝ የኣያ ጊታኬና ኬና ናሺዬ። ⁹ ጪኒጌን ናኒ ዮ፤ የጶቅሲያባ ኦኬ ኣሽክዬን ጉዋዩዬ ዻቾ ጉዋዩዬ፤ ካማርቴ ውር ክየምጵንዻ ኦኬ ዴጩጉ ኣይሼኔ ሃኣሽክና ከምክሬ ሹሼ ሃሜይሺቴያ እየው ክያጃ ሹቃ። ¹⁰ ሃኣንቴባ ከኦካ ጫቃንካ ጊታይ ኤርሜንኬ እየወ ሃሻማ እያን ሃቆብቴኬ ይሁኔኔ፣ ከጫንቃል ኣዬኔ ፕርዻ ዻባሞ ኣኔኬኔ እየውዻ ባሪዮዻ የኣያ ማኝ። ¹¹ ሹኔ ከእያይ ኣይሼ ሃንታ ኔኑጝ ኡዋዻ ናንዳካ እየው ክየም ክየም ሃኣይቴ እያኑጝ የእባጃያዬ፤ ¹² ናንዳካ ጊታይ ሺውሼ ሃምካ መንግስት ኔኒዬ ጎቢንታ ኔኒዬ ከቆብቴ ከእያይ ካሁሉኩሼ ባሪዮጝ ሃቁዋቅትሺሻያ እየው። ¹³ ክያጃ ባሪዮ እን የዋይቴኬ ኦጉዋዩጝ ከሹ እን የናሺቶጝ፣ ከኦካ ጊታይ ኤርሜንኬ እየው ከኣኩሉክ ከእያይካ ኣሽክዮጝ ኬካ ክያጃካ ባሪዮ ዬ ናንዳካጝ የማርቴ ከክያጃካ ውር ሻሜ ናሺቴኑጝ ሃቃጪቴኬኔ ሃጎሺያባ ባሪዮ። ¹⁴ 14 ጪኒጌን ናኒ ዮ፤ ጊታይ ኣኔንኬ ኢየሱስ ክርስቶሴ ጌዬኬ ይሁዳጝ የሙኒናያ ቶኦ ጊታይካ ባሪዮጝ፤ ጊታይ ከእያይ ጌዬኬ ኦካ ውርካ አይሁድ ጋሎጝ እየውዻ ከኦካ ውራን ጊታይ ጉዩጝ የጌያያ ጋሎ። ¹⁵ እንግን ኒሻ ኢየሱስ ታቺ እኔ ውርካ ቶካ ባሪዮዋኔ፤ ዋኬያ ኡዋዻ፤ ካኒ ዋዝንሲኬን ባሪዮዻ፤ ማቲያ ጋልካ ውርካ ውር ፓይላዻ፤ ¹⁶ ይንዻ ካባይሾጝ ካምርቴ ኣሕዛብ ሜይሼኑጝ ሃካ ሃርጊኔን፤ ከዴንታ ይንዻ ፑኡሺሼ እንግን ኤታጋን ሴሶ ሹ ጮሌ ፓይሼባ ሌይ ሃምካ ቱንሱጝ። ማኒትዻ ኩንሼያ እንግን ሄክንሶ ኣኔኬኔ። {ፎሽካዽዬንካ ጳውሎስ እን ኣኔ ናንዳካ ውርካ ተሰሎንቄ ቶዬኑጝ} ¹⁷ ኣይባዬ ጪኒጌን ናኒ ዮ፤ ኡዋው ማርኬ ሻን ጉዋዩዬኔ ናንዳካ ሹ ጩዋማ ካላልሜንኬ ኦጉዩጝ፣ ከእን ናሹጝኬ እየው ፎሽካዽዬን ታቺ እኑጝ ሃዎሻያ ማሪ ጉዩ ቶዬን። ¹⁸ ሃዎሻያ ሃሚን ጉዩ ፓይኔን፤ ሳጎዻ ኣን ጳውሎስ ሃታምያ ሹ ጁዋኑ፤ ኣይባዬ እጁጝ ኡፑሺሽ ኡዋወ። ¹⁹ ኢየሱስ ታቺ እን ጉዋዩ ኩናያጝ ከኦካ ሌሜን ኔኒ ሃኒን ካኣይ ቃቦ ሹቃ ጉዋዩጝ ወይ ካኣይ ዋዛ ጉዋዩጝ ወይ ካኣይ ኣክሊል ጉዋዩጝ? ማር እየወኒ? ²⁰ ከኣኩሉክ የኣያ ጎቢንታ ጉዋዩዬ ዋዛ ጉዋዩዬ።