¹ ውርካ ናሺዺ ናኒ ዮ፤ ኦይዲ መንፈስ ፓይላ ኣምኒዬን፤ ኣይባዬ መንፈሳን ኣዬኬ ባሪዮጝ እያሚባ፤ ናንዳካኦ ውርካ ቶካ ባሪዮ ጁዋኑካ ሾሮ ፓዬና ፔን ክያኒ። ² የእባጃባ መንፈስካ ባሪዮ ከይዕጝ፤ ኢየሱስ ክርስቶስ ኩኔኬ ኣሩጙጝ መንፈስ እን ናሺ ፓይላ ሃኬ ኦካ ባሪዮ፤ ³ ዬ መንፈስ እን ማር ባሪዮ ናሺዬን ማርኬ ኦካ ባሪዮዬን፤ ከእያይ ካኩዋወዬ የዋይቶጝ መንፈስ እንካ ኖኪ ክርስቶሱጝ ሃይዕጝ፤ ኣይኒን ጋኑጝ ኣኔባ ፔን ክያኒ። ⁴ ሃንታ ዮ፤ እየው የኣያኬ ባሪዮ፤ የባሺያያ እንግንዻ፤ ናንዳካኦ እን ኣኔን ከእየው ሳጊባ ከኦካ እን ኣኔን ፔን ክያኑጝ። ⁵ እንግን ጋይኬ ፔን፤ ዬ እንካ ሃሳዎጝ ሃኬካ ፔኑጝ፤ ውርካ ፔኑጝ ዋይሼን እንግንባ። ⁶ ኡዋው ሃኣያኬ ባሪዮ፤ ጊታይ እባጅ ባሪዮጝ ዋይሼን ኡዋባ፤ ዬ ጊታይ ማርኬ ባሪዮ ኣዬኑጝ ዋይሼንኬን ኡዋው፤ ከይንዻ ሃእባጃያ መንፈስካ ኣኩሉኬ መንፈስካ ሾሮዬ። {ናሺማካ ባሪዮዬ ናሺማካ ውሬ} ⁷ ውርካ ናሺዺ ናኒ ዮ፤ ናሺማ ናንዳካጝ ኣዬኬ ታካ ባሪዮጝ ካናሺ ጋጝባ፤ ካጝ ናሺዬን ፓይላ ሃኬና ጅሼኬ ኦካ ባሪዮ፤ እባጅባ ባሪዮዻ። ⁸ ዬ እን ማር ናሺዬን እባጅኬን ባሪዮ፤ ባሪዮ ሃናሺማዬ። ⁹ ባሪዮ ዹዋልሺኔ ናሺማ ኔኒ ኦካ ጫቃን ጉዋዩጝ ሃእያዕጝ፤ ኡዋው ኬታይ ኔኑጝ ካቆብቴኬ ዻቆጝ ባሪዮ ይዕሲሼያ ውዋ ክየም እን ኔኒ ፔኑጝ ክያኒ። ¹⁰ ናሺማ ሃይዕጝ፤ ማርኬ እን ኡዋው ሃናሺቴ ባሪዮዬኔ እሺ ከእያይ ናሺዬ ኡዋወ ናንዳካ ሴሶ ጉዋዩ ካኣይካ ሺዕሺኔኔ ሃኬ እን ይዕሲዬ ውዋ ኔኑጝ። ¹¹ ውርካ ናሺዺ ናኒ ዮ፤ ሃኦኬና ባሪዮ ናሺዬ ኡዋው እያይንያጝ፣ ኡዋዻ ካናሺቴ ጋጙጝ ሁሉኩሼ ኡዋባ። ¹² ውር ክየምጵንዻ ኬና ባሪዮ ኣኔኬን፤ ዬ ሃናሺያያ ጋጝያጝ ባሪዮ ኣይባ ከኡዋው፤ ናሺማ ኔኒዻ ማቲባ ከኡዋው ካሎን። ¹³ ናንዳካጝ ኣዬ ኡዋው መንፈስ ኔኑጝ፣ ኡዋው ካኣይቴኬ እሺዬ እሺዻ ካኣዬኬ ኡዋውጝ ሃእባጃያ። ¹⁴ ሹኔ ውዋ ኔኒ ካባይሺሼ ውርካ ፔኑጙጝ ከእያይ ይዕሲዮጝ ሃጌያያ፤ ሃማኝሺያባዻ። ¹⁵ ኢየሱስ ክርስቶስ ኣዬ ውዋካ ባሪዮ ውር እን ኣምኒዬ ማኚሺ ፓይላ፣ ባሪዮ ኣይባ ከእሺ፤ እሺዻ ኡፓ ከባሪዮ። ¹⁶ ዬ ሃእባጃያ ናሺማካ ባሪዮ እን ኣኔን ከኡዋው፤ ሃኣምኒያባ ከናሺማ ኔኒዻ። ባሪዮ ሃናሺማ፤ እን ኡፔንኬ ናሺማ ኡፓ ከባሪዮ፤ ባሪዮዻ ኣይባ ኣይባ ከእሺ። ¹⁷ ከኦካ ፔኑጝ ሃሙኒናባ እሺዬ። ከሹካ ኮምሼን ካኣንቴ ሾያሞጝ፣ ናሺማ ከሃይነት ኬና ኣኔን እያጝ ከኦካ ጫቃን ጉዋዩ ማቲባ ካሎን፤ ¹⁸ ከናሺማ ሪጊ ኣኔኬን፤ ዬ ናሺማ እን ኣይ ካሎኑጝ ቡሌ ፓቅባ ሪጊ፤ ሪጊ ሃኦኬና ኣይኬ ቅጣት ከጋጝ። ውር እን ሪግሼንዻ ናሲማ ኔኒ ማር ካሎኔን። ¹⁹ እሺ ሌምሼ ናሺያ ኡዋወ ኡዋዻ ካናሺ ጋጝባ። ²⁰ ውር ክየምጵንዻ ሺጝ ሃናሺባ ባሪዮዬ ሚኔያ ጪኔያጝ፣ እሺ ሃውርካ ሾሮ፤ እን ማር ጪኔ እን ኔኒ ጌዬ ናሺዬን ቻሊኬን ባሪዮ እን ማሬ ጌዬን ናሺዬኔ። ²¹ እሺ ጊታይ ናሺዬን ባሪዮጝ ፓይላ ካናሺዬ ባሪዮጝ ሁሉኩሼባ» ሜይሼያ ኡዋው ኤርጎ ኬና ሺጝ እያይ።