¹ 1 ካዋይሼ ኡዋው ሃንታካ ባሪዮዬ ካሺዎጝ ናሺማ እን ሹኔ ጁዋንቲሼ እርሼ ኡዋው ኣይ እያን ታቺ/ ኡዋዻ ከእያይ ሃኣያ ሃንታ ኔኒ። ውርካ ፔኑጝ ማሬ ኡዋው እባጄኑጝ ሃናንዳካጝ ማሬ እሺዻ እባጄኑጝ። ² ውርካ ናሺዺ ናኒ ዮ፤ ኡዋው ጋን ሃኣያ ሃንታካ ባሪዮ፤ ከታካ ሌሜንዻ ካኣይቶጝ ካኒ ዹዋልሼንኬን። ከሹ እን ካዹዋልሺኔ እሹጝ ሃጌያባዬ፣ ካሙኒንቴ እሹጝ ሃእባጃያ። ³ እን ሻሜን ከእሺ ቃቦ ሹቃጝ ፓይላ፣ ከእያይ እሺ ኣዬ ጫንቃሉጝ ሻምባ እሺ ኤምኑዻ ጫንቃል። ⁴ ጊታይ ኣሽክዬን ሴሶጝ ፓይላ ሻምባ ኦኬ ጋራ፤ ሴሶዻ ሃኦኬ ጋራ። ⁵ እሺ ካቡል ሴሶዬ ከእያይ ዹዋልሺኖጝ የእባጃያ፤ ሴሶ ኣኔኬን ኦኔኒ። ⁶ ጊታይ ኣይኬ እሺዻ ኣሽኪኬን ሴሶ፤ ዬ እን ኣሽክዬን ሴሶጝ ካኒ ጌይኬን እሺ ወይ ካኒ እባጅኬን። ⁷ ሃንታ ዮ፤ ውር ክየምጵንዻ ካማር እየው ጊያምሺሼኔ ኣጅቴባ፣ እሺ ከእያይ ኣዬ ጫንቃሉጝ፣ ጊታይ ኣሽክዬን ኦኬ ጫንቃሉጝ ጋይ ጫንቃል። ⁸ እን ኣሽክዬን ሴሶጝ ሃኬ ዲያብሎስ። ናንዳካኦ ዲያብሎስ ካርሲኬ እባ ሌሜኔ ሃኬና ኣሽክዬን ሴሶ። ዹዋልሺኔ ውዋካ ባሪዮዻጝ ካላሊ ዋድማካ ዲያብሎሴ ጊያ። ⁹ ጊታይ ጅሼኬ ባሪዮጝ ፓይላ ኣሽኪኬን ሴሶ፤ ቢዛ ኔኒ ኡፓ ከእሺዬ፤ ናንዳካጝ ጅሼኬ ባሪዮዻጝ ቻሊኬን ሴሶ ኣሽክዬን። ¹⁰ ሃንታካ ባሪዮዬ ሃንታካ ዲያብሎሴ ካጌዬ ዋናዬ ካጊባጆጝ ሃኬ ይዕጝ፥ እን ማር ኦኬ ጫንቃል ሻሜን፣ እን ማር ጪኔዻ ናሺዬን ፓይላ ማርኬ ባሪዮዬን። {ናሺባ ጋጝ ¹¹ ከእን የዋይቴ ከሌሜኑጝ፣ ሜርሜር እን ሺጚ ካናሺቴ ጋጝ ሁሉኩሼ ኡዋባጝ ሃይዕጝ፤ ¹² ማቲ ከውርካ ውር ጋራኔ ከእያይ ኒሼ ጪኖጝ ኦይዲኬ ቃየን ማቲቴን፤ ኒሽ ናንዳካኦ? ናንዳካኦ ዋድማ ኔኒ ናንዳካጝ ኣዬ ጋራጝ፣ ዬ ዋድማካ ጪኔ ናንዳካጝ ኣዬ ሹቃዬ ጊያ። ¹³ ጪኒጌን ናኒ ዮ፤ ውርካ ፔኑጝ ሜኔያ እየውያጝ ኦይዲ ጎሺቴን። ¹⁴ ናንዳካጝ ሃናሺቴ ጪኒጌን ጉዋዩጝ ከኦካ ኣርሼን ሃቁዋልሺንቴ ሃምካ ዻቆግ ሃእባጃያ፤ እን ማር ናሺማ ኣኔን ፓይላ ኡፓ ከኣርሼን። ¹⁵ ውር ሚኔ ጪኖጝ ሃኬና ኒሺኔ ጆል ናፒሲካ ውር፤ ውር ኒሺኔ ጆል ናፒሲካ ውርዻ ቦን ጮል ማሬ ዻቆ ኣኔኑጝ የእባጃያ። ¹⁶ ኢየሱስ ክርስቶስ ናንዳካጝ ሳስክዬ ኣይኔ ዻቆ ኔኒ ናንዳካ ኡዋውጝ፣ ናሺማ ኣዬ ኦውጝ ሃእባጃባ ከይዕጝ፤ ኡዋዻ ካሳስክያ ኣይንቴ ዻቆ ጉዋዩ ናንዳካ ጪኒጌን ጉዋዩጝ ሁሉኩሼ ኡዋባ። ¹⁷ ውር ክየምጵንዻ ኣኔባ ሆድማሞዬ፣ ጪኔ ኔኒ ጋሊዬንባዬ ጌዬ ማራ ዻዹጝኔንያጝ፣ ናሺማካ ባሪዮ ኣኔን እያን ኦኔኒ? ¹⁸ ሃንታ ዮ፤ ሃኬ ኦኬ ኣሽክዬኔ ኣኩሉኬ ዬ ካማርኬ ክያጃዬ ከካትጵን ጋጝ ናሺዬን። ¹⁹ ከእን ኡዋው ሃኣይቴ ከኦካ ውርካ ኣኩሉካኑግ ሃእባጃባ ከይዕጝ፤ ሻን ጉዋዩዻ ሃቆብሻባ ከኦካ ሌሜን ኔኒ፣ ²⁰ ይንዻ ሻን ጉዋዩ ሃኬ ኦካ ኦግታይ ኮምሼ ኡዋው ፓይላ። ባሪዮ ከኦካ ሻን ጉዋዩ ሳጊ ሃታቺዬ እባጃ ኦኬ ፓይላ። ²¹ ውርካ ናሺዺ ናኒ ዮ፤ ሻን ጉዋዩ ሃኦኬ ማርሼ ኡዋው ኮምሼንያጝ ከኦካ ማሪካ ባሪዮ ሃኣንቴ ሾያሞ፤ ²² ናንዳካጝ ሃዻይቴ ኤርጓን ኔኒዬ ከኦካ ሌሜን ኔኒዻ ናንዳካግ ሃኣሽኪቴ ኦኬ ጊታኬና ዋዝንሲ እሹጝ ኦግታይ ሃይሁንቶጝ ፓይላ ሃቦዋባ ከኦኔኒ። ²³ ኤርጎ ኔኒዻ ከሮጝካ ውዋ ኔኒ ኢየሱስ ካኣምኒቴዬ ከእያይ እሺ ኤርግቴ ኡዋዻ ካናሺ ጋጝባዬ ጊያ። ²⁴ ጊታይ ዻዬ ኤርጎዻ ፓይላ ቆባ ከእሺ፤ እሺዻ ኡፓ ከእንግን። ከኡዋው ኡፌን ኔኒ ከይዕጝ ይንዻ ሃእባጃባ ከመንፈስ እን እሺ ኣዬ ኡዋው።