¹ ውርካ ናሺዺ ናኒ ዮ፤ ሃቶኩሼ እየው ይጝ ከማር ሴሶ ኣሽክዬኔ ጊያ፤ ኣይባዬ ውር ክየምጵንዻ ኣሽክያ ሴሶያጝ፣ ከታካ ሹኔ ሃኣንቴ ውር ኬናካ ቶይ ኡዋው፤ እሺዻ ሃኢየሱስ ክርስቶስ ጫንቃል እዕጝ። ² እሺዻ ሃእንካ ቶይ ሴሶ ጉዋዩጝ፤ ይንዻ ሃኬ ሴሶካ ውርካ ፔን ፓይላ ዬ ማር ጉዋዩጵኔን። ³ ሃሹዋጵሺሻያ ክያጃ ኔኒያጝ እሺ እባጄን ጉዋዩ ከይጝ ሃኣያባ ጊታኬና ኣይ ኣኩሉክ። ⁴ እጝ ሺጚ ሃእባጅያ እሺዬ ዬ እን ማር ክያጃ ኔኒ ሹዋጵሼኑጝ ሃውርካ ሾሮ፤ ኦኬ ኣኩሉክዻ ኣኔኬን ኦኔኒ። ⁵ ኣይባዬ ውር ክየምጵንዻ ዻዬያ ክያጃ ኔኒያጝ፣ ከኣኩሉክ ናሺማካ ባሪዮ ከእሺ ማቲባ ካሎን። ከእሺ ኣዬን ጉዋዩ ካእባጅቶግ ሃኬ ይዕጝ፤ ⁶ ውር ክየምጵንዻ ካጝ ሺጚ ሃኡፒባ ከእሹጝ፣ ከእያይ ኢየሱስ ዋኬጆሎጝ ካዋካጃሎጝ ሁሉኩሼ እሺባ። ⁷ ውርካ ናሺዺ ናኒ ዮ፤ እንካ ቶኩሼ እየው፣ ሃኤርጎ ጌቾ እንካ ሌሜን የኣንቶጝ ዬ ኤርጎ ሃሊዬን፤ ኤርጎ እን ኡፌንዻ ሃክያጃካ ባሪዮ እን የዋይቶጝ። ⁸ ከታ እንቃ እንካ ቶኩሼ እየው ኦድሙጉ እን ናንዳካጝ ኣኒኔ ሳጊዬኔ ኦሜሌል እን ናንዳካጝ ኣኒኔ ላሉጜኑጝ፣ ከኦኔኒዻ፣ ከኦጉዩዻ ሃኤርጎ ሃሊ እን ኣይ ኣኩሉኩጝ። ⁹ እን ሺጚ ሃኣኔን ኦሜሌል ክያኑጝ፣ ዬ እን ሚኔ ጪኖጝ ካንዻ ኣኔን ኦድሙጉ ክያኒ። ¹⁰ እን ናሺዬን ጪኖጝ ኡፓ ኦሜሌል ክያኒ፤ ኦኔኒዻ ኣኔኬን ኦይንካ ካቲንሲ እሹጝ። ¹¹ ኣይባዬ እን ሚኔ ጪኖጝ ኣኔን ኦድሙጉ ክያኒ፤ ጃሌጆልባ ኦድሙጉ ክያኒዻ፤ ኦድሙጉ እንዻ ናንዳካጝ ጅጜ እሹጝ ካካሜ ኦንዻ እባጅኬን ¹² ሃንታና ዮ፤ ሴሶ ጉዩ ሺዕሺዬ እየው ናንዳካ ሮጝ ኔኒዬ፣ ሃቶኩሼ እየውባ። ¹³ ሹቡጋን ዮ፤ ከሌሜን እን ኣኖጝ የእባጃያ እሺዬ፣ ሃቶኩሼ እየውባ። ጊታይ ኣይ ኬኬሪ ዮ፤ የባሺያያ ኦኬ ጋራ እኔ፣ ሃቶኩሼ እየውባ። ሃንታን ዮ፤ የእባጃያ ሹኔዬ፣ ሃቶኩሼ እየውባ። ¹⁴ ሹቡጋን ዮ፤ ከሌሜን እን ኣኖጝ የእባጃያ እሺዬ፣ ሃቶኩሼ እየውባ። ጊታይ ኣይ ኬኬሪ ዮ፤ ናንዳካጝ የኣይቴ ቁዋቃጝ፣ ክያጃካ ባሪዮ ናንዳካጝ ካኣኒኔ ኦጉዩጝ፣ ናንዳካጝ የባሺቴ ኦኬ ጋራዻጝ፣ ሃቶኩሼ እየውባ። {ኦይዲ ፔኑጝ ናሺቴን} ¹⁵ ኦይዲ ፔኑጝ ወይ ኦግታይ ኣኔን ፔኑጝ ክያኑጝ ኣይኒን ኦዻጝ ኦይዲ ናሺቴን፤ ውር ክየምጵንዻ ናሺያ ፔኑጝያጝ፣ ናሺማካ ሹኔ ኣኔኬን ኦኔኒ፤ ¹⁶ ናንዳካኦ ኦግታይ ኣኔን ፔኑጝ ክያኑጝ ፓይላ፥ ኣርግማካ ኣሩጝ፣ ሹቃትካ ካርቡዬ ቃያቃ ቆቤኔ ሃኬ ፔን ዬ ማር ጊታኬ ፓዬን ከሃምካ ሹኔዬን። ¹⁷ ፔኑጜ ኣርግማ ኔኒዬ ሳጊባ፤ ዬ እን ኣሽክዬን ክያጃካ ባሪዮጝ ኡፓ ቦን ጮል። {ከኦካ ውር ጊታይ ኖኪዬን ክርስቶስ ኣጅሼን} ¹⁸ ሃንታን ዮ፤ ይን ሃዋዳ እንካ ቱንሱጝ፤ ከእያይ የዋይቴዻጝ ውር ጊታይ ኖኪዬን ክርስቶሱጝ ፓዬንባ፤ ኣይኒን ጋኑጝ ውር ጁዋኑ ጊታይ ኖኪዬን ክርስቶሱጝ ፓዬና፣ ኣዬ ዋዳ እንካ ቱንሱጝ ካእባጅቶጝ ሃኬ ይዕጝ። ¹⁹ ቱላ ከኦካ ጫቃን ጉዋዩ፤ ካኣይባዬ ካኒ ጋይኬን ከኦካ ውራን ጉዋዩዬን፤ ዋንቲ ጋያ ከኦካ ውር ጉዋዩያጝ ዋቲ ቁዋቅትሼ ቆባ ከኡዋው። ኣይባዬ ማሬ ውር ጉዋዩ ኣኔኑጝ ካጊባጆጝ ጌያ ከኦግዋዩ ዋና። ²⁰ ዬ እየው ከእሺ ከእን ኣይ ቅዱሱጝ፣ የኣንቴ ዋቃትዬ፤ እየው ፓይላ የእባጃያ እን ኣይ ኣኩሉኩጝ። ²¹ ኣን ሃቶኩሼ እየውጝ ማር ናንዳካጝ የማርቴ እን ኣይ ኣኩሉክ እባጄኔን፤ ኣይባዬ ናንዳካጝ የእባጅቴ እን ኣይ ኣኩሉኬ ከኦካ እን ኣይ ኣኩሉክዻ ናንዳካጝ ሾሮ ማሬ ቱሌኔ ጊያ። ²² ከእን ሺጚ ማር ክርስቶሴኔ ቡዲ እንቃ ሃኒን ኣይ ውርካ ሾሮጝ? ይንዻ እን ቡድዬን ሹኔዬ ውዋጝ ሃኬና ኖኪዬን ክርስቶስ። ²³ ጊታይ ቡድዬን ውዋጝ ፓይላ ሹኔ ኣኔኬን ከእንግን፤ ጊታይ ኣምኒኬ ውዋጝ ፓይላ ሹኔ ኣኔባ ከእንግን። ²⁴ እን የዋይቴ ከሌሜኑጝ ካኣንቴባ ኦጉዩ፤ እን የዋይቴኬ ሌሜኑጝ ኣኔያ ኦጉዩያጝ፣ እየውዻ ከቆባባ ከውዋዌ ከሹኔዬ። ²⁵ ይንዻ ቃቦ ሹቃ እን እሺ ኣዬ ኡዋውጝ ሃዻቆ እንካ ቦን ጮሉጝ። ²⁶ ናንዳካ ውር ጊታይ ጊያምሺሼን እየውጝ ሃቶኩሼያ እንግን ይዕጝ። ²⁷ ዬ እየው ዋቃቲ እን የቦቴኬ ኦኔኑጝ ኣኔባ ኦጉዩዬ፤ ዎሺሽኬን እን ውር ክየምጵንዻ ካእርርሲዬ እየውጝ፤ ኣይባዬ እን ኣይ ኣኩሉክ ዬ ማር ሾሮ ኣዬኑጝ ዋቃቲ ኔኒ ካእርርሲዬ እየው ናንዳካ ኦኬ ፓይላጝ፣ እንዻ ሃኣኩሉክ ዬ ማሬ ሾሮ ኣዬኑጝ፣ ከእያይ እርርሲዬ እየውዻ ቆቢባ ከእሺ። {ሃንታካ ባሪዮ} ²⁸ ኣኪ ሃንታ ዮ፤ እሺ ጌይርናያጝ ካኣንቴ ሾያሞጝ፣ ከሹካጝ ኩኔዻ ካማር ኦካ ሜሪ ኔኒ ቦኩንዺዬኔ ቆቢባ ከእሺ። ²⁹ እሺ ኣዬ ጫንቃሉጝ የእባጃያጝ፣ ጊታይ ኣሽክዬን ኦኬ ጫንቃሉጝ ፓይላ ጅሼኬ እሹጝ የእባጃያ።