¹ እን ኢየሱስ ኣዬ ክርስቶሱጝ ጊታካጝ ኣምኒ ፓይላ ጅሻ ከባሪዮ፤ ጊታይ ናሺ ሹኔዻ ፓይላ ናሺባ ውዋዻ ከእያይ። ² ሃናሺያ ባሪዮዬ ሃሙና ኤርጎ ኔኒዻያጝ ካናሺቴ ሃንታካ ባሪዮጝ ሃእባጃባ ከይዕጝ፤ ³ ባሪዮ ናሺዬን ሃኤርጓን ኔኒ ሹዋጵሼኔ። ኤርጓን ኔኒዻ ማር ቁዋቃዬን ⁴ ናንዳካኦ ጊታይ ጅሼኬ ባሪዮጝ ፓይላ ባሺባ ፔኑጝ። እንካ ባሺ ፔኑጝዻጝ ሃእምነት ጉዋዩ። ⁵ ኢየሱስ ኣዬ ውዋካ ባሪዮግ ከኦካ እን ኣምኒ እንቃ ኬናካ ባሺ ፔኑጝ ሃኒን ⁶ እን ኩንኬ ምጁዋዌ ከኒያቡጝ፣ ሃኢየሱስ ክርስቶስ። እሺ ኩንኬ ሙዋዌ ኒያቡዬ ዬ ካኒ ኩንኬን ከሙዋጵን። እንካ ማኚሺዻጝ ሃመንፈስ፤ መንፈስ ሃኣኩሉኬ። ⁷ ዬ ማኚ ጅያን ኣኔባ። ⁸ እንግንዻ ሃመንፈስ፣ ሃሙዋዌ ኒያቡዬ። ጅያናን ጊታይዻ ዋይሼን ጋጝባ። ⁹ ሃዋያያ ማኛሞካ ውርያጝ፣ ማኚ ኣዬንካ ባሪዮ ሳጊባ ከኦይን፤ ይንዻ ናንዳካ ውዋ ኔኒ ሃማኛሞካ ባሪዮ እን ጋይኖጝ። ¹⁰ ጊታይ ኣምኒ ከውዋካ ባሪዮጝ ፓይላ ከኦካ ሻን ኔኒ ኣኔ ማኛሞ፤ ውር ክየምጵንዻ ጊታይ ማር ባሪዮ ኣምኒዬን ፓይላ ባሪዮ ናንዳካ ውዋ ኔኒ ማኛሞ እን ኣይኖጝ ናንዳካጝ ማሬ ኣምኒዬኑጝ ሻማ እሺ ውርካ ሾሮ። ¹¹ ማኛሞ ኔኒዻ ሃይዕጝ፤ ባሪዮ ኣያ ኡዋው ዻቆካ ቦን ጮል፤ ዻቆ ይንዻ ኣኔን ከውዋ። ¹² እን ኣይኬ ውዋ ኔኑጝ ኣኔባ ዻቆ፤ እን ማርኬ ውዋካ ባሪዮ ኣዬኑጝ ኣኔኬን ዻቆ። {ቃቦ እንካ ቱንሱጝ} ^{15 13} እየው ጊታጝ ኣምኒዬን ከውዋካ ባሪዮጝ፣ የኣንቴ ዻቆካ ቦን ጮሉጝ ከእባጅቶጝ ሃቶኩሼ እየውባ፤ ¹⁴ ከኦካ ማሪካ ባሪዮ ዲያው ፓይኔን ሾያሞ እን ጉዋዩ ኣኖጝ ሃይዕጝ፤ ኦኬ ፓይላ ሃይሁናያ ከክያጃ ኔኒያጝ እሺ ዋይሼን ኡዋባ ¹⁶ ውር ክየምጵንዻ ጪኔ ኣሽክያ ሴሶ ኬናካ ማር ሃምካ ኣርሼን ሄክሼኔ ጌይያጝ ካይሁሺንቴባ፤ ባሪዮ ናንዳካ ጊታይ ኣሽኪ ሴሶ እንካ ማር ሃምካ ኣርሼን ሄክሼኑጝ ኣይባ ዻቆ፤ ሴሶ ኬናካ ሄክሼ ሃምካ ኣርሼንዻ ኣኔባ፤ ዬ ናንዳካ እን ሃሺጝኬን ካይሁሼንባ። ¹⁷ ኦኬ ጋራ ጊታይ ፓይላ ሃሴሶ፤ ሴሶ እንካ ማር ሃምካ ኣርሼን ሄክሺሼን ኣኔባ። ¹⁸ ጊታይ ጅሼኬ ባሪዮጝ ፓይላ ከእያይካ ማሬ ሴሶ ኣሽክዬኑጝ ኣይባዬ ከእያይ ውዋካ ባሪዮ ማንክዬ እንክግኑጝ፣ ኦኬ ጋራዻ ካማሬ እንግን ዱሜኑጝ ሃእባጃያ። ¹⁹ ከእያይ ኡዋው ሃኣይቴኬ ባሪዮጝ፣ ውርካ ፔኑጝ ፓይላ ከእያይ ኣኔኔ ኦኬ ጋራ ክያኑጝ ሃእባጃያ። ²⁰ ከእያይ ውዋካ ባሪዮ ኩኖጝ፣ ካእባጅቴ እሺ እን ኣይ ኣኩሉኩጝ ኣዬ ኡዋው ኦኬ ጶቅሲዬኑጝ ሃእባጃያ፤ ኡዋዻ ከውዋ እን ኔኒ ኣይ ኣኩሉኩጝ ሃኣንቴባ ከኢየሱስ ክርስቶስ። እሺ ሃኣምላክ እንካ ኣኩሉኬ ዻቆ እንካ ቦን ጮሌ። ²¹ ሃንታ ዮ፤ ማንኪባ እየው ኤታጋን ከኦካ ኦግታይ ኣይኬ ኦካ ባሪዮ ሹኑኩጝ።