¹ واكتب لملاك الكنيسة اللي في ساردِس: هذي رسالة من اللي له أرواح الله السبعة والنجوم السبعة :أنا عارف عملك .أنت حيّ بالإسم،لكن بالحقيقة ميت. ² إنتبه،وإستغل باقي عمرك قبل ما تموت، لإنو شفتو أعمالك موش صالح أمام الله. ³ إذكُر اللي تعلمتُه و كيف قبلتُه،وإعمل فيبُه، وتوب! وإذا ما تنتبه، بجيلك مثل السارق، ما تدري بأي ساعة أفاجئك! ⁴ لكن في عندك بساردِس ناس قليل ما نجسوش ثيابهم، هذوم شيمشوا معي لابسين ثياب بيض لإنهم مستحقين. ⁵ اللي بينتصر شلبس ثوب أبيض، وما شمسحش إسمه من كتاب الحياة، وشاعترف باِسمه قدام أبي وملائكته. ⁶ اللي معه آذان ،يسمع إيش يقوله روح الله للمؤمنين! ⁷ واكتب لملاك الكنيسة في فلادلفيا: هذي رسالة القدوس الحق ،اللي بيده مفتاح داود، اللي إذا فتح باب ما حد يقدر يُقفله، ولو قفّل باب ما حد يقدر يفتحه: ⁸ أنا عارف اعمالك، رغم إنو قوتك ضعيف، بس أطعت كلامي وما انكرت إسمي، عشان كذا فتحت لك باب ما حد يقدر يُقفله. ⁹ أما اللي هم من حزب الشيطان، اللي يقولوا انهم يهود وهم كذابين موش يهود، شخليهم يجيئوا يسجدوا عند أرجولك، ويعرفوا إننا أحبك. ¹⁰ ولإنك عملت بكلامي وصبرت، عشان كذا أنا شاحفظك ساعة الشِدة اللي باتجي على العالم كله وتختبر كل سكان الأرض. ¹¹ أنا جاي قريب،إتمسك باللي عندك، عشان ما حد يأخذ التاج حقك. ¹² اللي بينتصر شخلوه عمود في هيكل الله، ما يخرجش منه أبداً، وشاكتب علوه اسم إلهي واسم مدينة إلهي القدس الجديدة، اللي شتنزل من السماء من عند إلهي، وشاكتب عليه اسمي الجديد. ¹³ اللي معه آذان ،يسمع إيش يقوله روح الله للمؤمنين! ¹⁴ واكتب لملاك كنيسة لاودكية: هذي رسالة الأمين، الشاهد الأمين الصادق، أصل خليقة الله: ¹⁵ أنا أعرف بأعمالك، واعرف إنك موش بارد ولا حار،ليتك كنت بارد ولا حار! ¹⁶ لإنك فاتر،لا حار ولا بارد، شطرش بك من فمي ! ¹⁷ تقول: أنا غني، ومستغني ولا احتاج شيء، بس ما تعرفش إنك بائس وشقي وفقيرواعمي وعُريان. ¹⁸ نصيحتي لك إنك تشتري مني ذهب نقي، مُصفى بالنار،عشان تغتني صدق، وثياب بيضاء تلبسها عشان تستر عورتك الخزي، وكحول تكحل به عيونك عشان تشوف. ¹⁹ أنا ما أهزيء وأدِّب اللي أحبه، عشان كذا خليك حار وتوب ! ²⁰ أنا هنا واقف خارج بالباب و أدق،إذا احد سمع صوتي وفتح الباب، شادخل لبيته واتعشي معه أنا وهو. ²¹ اللي بينتصر بجلسه معي بعرشي، مثلما انا انتصرتو وجلستو مع أبي على عرشه؛ ²² اللي معه آذان ،يسمع إيش يقوله روح الله للمؤمنين!