¹ وبعدين شفتو باب مفتوح بالسماء،وسمعتو الصوت الأول اللي كلمنا من قبل كأنه بوق، سمعته يقول: " إطلع لهنا بوريك اللي لازم مايحصل بعد كذا." ² وبساعته نزل عليّا الروح ، وشفتو عرش بالسماء جالس فوقه واحد ³ يلمع مثل الماس والعقيق الأحمر.وحول العرش قوس قزح يلمع مثل الزمرد. ⁴ وشفتو حول العرش أربعة وعشرين عرش محيطين بالعرش جالسين فوقها أربعة وعشرين شيخ لابسين ثياب بيض، وفوق رؤوسهم تيجان من ذهب. ⁵ وكان يخرج من العرش برق ورعد وأصوات ، وقدام العرش سبعة شعلات نار والع، هي أرواح الله السبعة. ⁶ و كمان كان في قدام العرش يشبه بحر شفاف مثل الزجاج، وفي وسط العرش وجنبه اربعة حيوانات معها عيون كثير من قدام ومن وراء: ⁷ الحيوان الأول يشبه الأسد، والثاني يشبه العجل، والثالث معه وجه مثل وجه الإنسان، والرابع النسر الطائر. ⁸ وكل واحد من الحيوانات الأربعة معه ستة أجنحة، مليانه عيون من داخل ومن خارج. وتسبح ليل بنهار بدون ما توقف: " قدوس، قدوس ، قدوس، الرب الإله القادر على كل شيء ، الكائن واللي كان واللي شيجي ." ⁹ وكلما كانت هذي الحيوانات الأربعة تمجد وتكرم وتشكر اللي الجالس فوق العرش،الحي لأبد الآبدين ، ¹⁰ كانوا الشيوخ الاربعة والعشرين يركعوا للي جالس فوق العرش،ويسجدوا للي هو حي لأبد الآبدين ، ويطرحوا تيجانهم قدّام عرشه ويقولوا : ¹¹ " ياربنا وإلهنا أنت تستحق المجد والإجلال والقدرة ، لإنك خلقت كل شيء، وهي موجودة وخلقت بإرادتك !"