1
أكتب لملاك كنيسة أفسس:" هذه رسالة اللي ماسك السبعة النجوم بيمينه ويمشي بين مصابيح الذهب السبع :
2
أنا عارف أعمالك وتعبك وصبرك، واعرف إنك ما تتحملش الأشرار،وانك اختبرت اللي يقولوا انهم رُسل، واكتشفت انهم كذابين.
3
أنت صبور واتحملت الكثير من شان إسمي بدون ما تتعب.
4
لكن عتبي عليك بشيء واحد إنك تركت المحبة اللي كانت لك من البداية.
5
إتذكر أين كنت قبل ما تسقط، وتوب وارجع إعمل الأعمال اللي كُنت تعملها من قبل، و إذا ما تتوب، باجي لك واقلع مصباحك من مكانه!
6
لكن اللي يشفع لك إنك تكره أعمال النِيقولاويين اللي أكرهها أنا كمان.
7
اللي معه آذان ،يسمع إيش يقوله روح الله للمؤمنين! اللي ينتصر شأكلُه من ثمر شجرة الحياة اللي بجنة الله.
8
واكتب لملاك الكنيسة بسميرنا:هذه رسالة الأول والآخر، الذي كان مات ورجع حي:
9
أنا عارف انك تعاني من الضيق والفقر، رغم انك غني. واعرف اللي افتروا به عليك اللي يقولوا انهم يهود وهم مش يهود، لكن هم حزب الشيطان.
10
لا تخاف من العذاب اللي ينتظرك، إبليس بيسجن بعضكم بالسجن عشان يختبركم، وشتعانوا لمدة عشر ايام. خليك أمين حتى الموت ، وانا شلبسك تاج الحياة.
11
اللي معه آذان ،يسمع إيش يقوله روح الله للمؤمنين! اللي بينتصرما شحصلش شيء من الموت الثاني .
12
واكتب لملاك الكنيسة اللي برغامُس: هذي رسالة صاحب السيف الحد اللي له حدين:
13
أنا عارف المكان اللي تسكن فيبه،هناك موجود عرش الشيطان!لكن مكانك متمسك باسمي،وما نكرت إيمانك فيبي حتى بأيام أنتيباس اللي شهد لي بأمانة،وقُتِل عندكم مكان ما يسكن الشيطان.
14
لكن عتبي عليك شويه لإنو مكانه عندك بعض الناس يتبعوا تعاليم بلعام اللي علّم بالاق يستدرج بني إسرائيل يعملوا الذنوب يزنوا ويأكلوا من الذبائح المقدمة للأصنام،
15
ومكانه بعضكم يتّبِعوا مذهب النِقولاويين اللي أكره.
16
توب ، ولا شاجي لعندك بسرعة عشان أحارب هذوم الناس بسيف فمي. أو بلساني.
17
اللي معه آذان ،يسمع إيش يقوله روح الله للمؤمنين! اللي شنتصر بجيب له يأكل من المن المخفي ، واجيب له حصأة صغير بيضاء مكتوب عليها اسم جديد ماحد يعرفُه اللي يأخذه!
18
واكتب لملاك الكنيسة اللي في ثياتيرا: هذي رسالة ابن الله اللي عيونه مثل شعلة نار وارجلُه مثل النحاس الصافي:
19
أنا عارف أعمالك ،محبتك ،وايمانك، وتضحيتك، وصبرك، واعرف إنو اعمالك الأخيرة أحسن من الأولى.
20
لكن عتبي عليك إنك تتساهل مع هذي المرأة إيزابل،اللي تقول إنها نبية،وتضل عبادي وتعلمهم إنو يزنوا ويأكلوا من الذبائح المقدمة للأصنام .
21
وجبتو لها مُهلة عشان تتوب وتبطل الزنا، لكنه ما رضت تتوب.
22
عشان كذا بطرحها فوق فراش المرض، وابتلي اللي زنوا معها بمحنة شديد، إذا ما يتوبوش من أعمالهم.
23
و أقتل أولادها بالموت،وبتعرف كل الكنائس إنو أنا اللي أعرف أفكار الناس ومشاعرهم، و اجازي كل واحد منكم حسب عمله .
24
أما أنتم، الباقين اللي بثياتيرا، اللي رفضوا يقبلوا هذا المذهب، ولاتعلمتم اللي يسموه البعض أسرار الشيطان العميقة، أقولكم ما بحملكمش أي حمل ثقيل.
25
إتمسكوا بس باللي عندكم لما أجي.
26
اللي ينتصر، ويستمر يخدمنا للنهاية، بجيب له سلطة على كل الأمم ،
27
ويحكمهم بعصا من حديد، مثلما انا أخذتُ من أبي سلطة أحكمهم فيبه،ويتكسروا مثلما تتكسر أواني الفخار،
28
واجيب له نجم الصبح !
29
اللي معه آذان ،يسمع إيش يقوله روح الله للمؤمنين!