¹ الیہُو کی تیسری تقریر الیہو نے خطاب کر کے کہا کہ۔ ² کیا تُو اِس بات کو دُرست سمجھتا ہے جو تُو کہتا ہے۔ کہ مَیں خُدا سے زیادہ صادِق ہُوں۔ ³ جب تُو کہتا ہے کہ مُجھے اِس سے کیا نفع مِلے گا۔ اَور اگر مَیں گُناہ نہ کُروں تو مُجھے کیا فائدہ۔ ⁴ مَیں ہی تُجھے اَور تیرے ساتھ تیرے دوستوں کو اِن باتوں کا جَواب دُوں گا۔ ⁵ آسمان کی طرف نظر اُٹھا اَور دیکھ ۔ اَور بادلوں پر غور کر جو تُجھ سے بُہت اُونچے ہَیں۔ ⁶ اگر تُو گُناہ کرے تو خُدا کا کیا بگاڑ سکتا ہے۔ اَور اگر تُو زیادہ گُناہ کرتا جائے۔ تو اُس کا کیا کرے گا؟ ⁷ اَور اگر تُو نیکی کرتا ہے تو اُس پر کیا اِحسان کرتا ہے۔ اَور وہ تیرے ہاتھ سے کیا لیتا ہے؟۔ ⁸ تیری شرارت تیرے جیسے اِنسان ہی کو نُقصان پُہنچاتی ہے۔ اَور تیری صداقت سے آدم زاد ہی کو نفع ہوتا ہے۔ ⁹ مظلُوم لوگ ظُلم کی کثرت کے سبب سے چلّاتے ہَیں۔ اَور زبردستوں کے بازُوں کے خلاف فریاد کرتے ہیں۔ ¹⁰ اَور وہ نہیں کہتے کہ خُدا کہاں ہے جس نے ہمیں بنایا ہے اَور جو رات کے وقت رُوئیتیں عِنایت کرتا ہے۔ ¹¹ جو زمین کےحیوانوں سے زیادہ ہمیں تعلیم دیتا ہے۔ اَور ہَوا کے پرندوں کے ذریعے ہمیں حِکمَت سِکھاتا ہے۔ ¹² وہ چلّاتے ہَیں لیکن شریروں کے غرور کے سبب سے وہ جَواب نہیں دیتا۔ ¹³ یقیناً۔ خُدا جھوٹی فریاد نہیں سُنتا۔ اَور قادرِ مُطلِق اُس کی طرف دھیان نہیں دے گا۔ ¹⁴ خاص کر جب تُو کہتا ہے کہ مَیں اُسے دیکھ نہیں سکتا۔ مقدمہ اُس کے سامنے ہے اَور مَیں اُس کا منتظر ہُوں۔ ¹⁵ لیکن اَب چُونکہ اُس نے اپنے غضب سے سزا نہ دی۔ کیاوہ جُرم سے ناواقف ہے؟۔ ¹⁶ اِس لئے اَیُّوبؔ اپنا مُنہ بے فائدہ کھولتاہے۔ اَور نادانی سے بڑی باتیں کرتا ہے۔