¹ حکمت کی تعریف یقیناً چاندی کی کان ہوتی ہے اَور سونے کے لئے جگہ ہوتی ہے۔ جہاں وہ صاف کِیا جاتا ہے۔ ² لوہا زمین میں سے نِکالا جاتا اَور پیتل پتّھر میں سے گلّایا جاتا ہے۔ ³ اِنسان تارِیکی کی تہہ تک پُہنچتا ہے اَ ور اندھیرے اَور مَوت کی اِنتہا تک پتّھروں کی تلاش کرتاہے۔ ⁴ آبادی سے دُور وہ سُرنگ لگاتا ہے۔ آنے جانے والوں کے پاؤں سے بے خبر اَور لوگوں سے دُور وہ لٹکتے اَور جُھولتے ہَیں۔ ⁵ جس زمین سے خُوراک پیدا ہوتی ہے وہ اپنے اندر گویاآگ سے انقلاب ہوتا رہتا ہے۔ ⁶ اُس کے پتّھروں میں نیلم ہے۔ اَور اُس میں سونے کے ذَرّے پائے جاتے ہَیں۔ ⁷ اُس راہ کو کوئی شِکاری پرندہ نہیں جانتا اَور باز کی آنکھ نے اُسے نہیں دیکھا ہے۔ ⁸ درِندوں نے اُس پر قدم نہیں رکھا اَور شیر اُس پر نہیں چلا۔ ⁹ وہ اپنے ہاتھ چقماق کی چٹان کی طرف پھیلاتا ہے اَور پہاڑوں کو اُن کی جڑوں سے اُلٹ دیتا ہے۔ ¹⁰ وہ چٹانوں میں سے دریا کاٹتا ہے۔ اَور اُس کی آنکھ ہر ایک قیمتی چیز دیکھتی ہے۔ ¹¹ وہ ندیوں کو بہنے سے روکتا ہے۔ اَور پوشیدہ چیزیں روشنی میں لاتا ہے۔ ¹² مگر حِکمَت ۔ کہاں پائی جاتی ہے۔ اَور عقل کا مقام کہاں ہے۔ ¹³ اِنسان اُس کی قدر نہیں جانتا۔ اَور وہ زِندوں کی سَرزمین میں موجُود نہیں۔ ¹⁴ گہراؤ کہتا ہے کہ خالص سونے کے زیور مُجھ میں نہیں۔ اَور سمُندر کہتا ہے کہ وہ میرے پاس نہیں۔ ¹⁵ نہ وہ خالص سونے سے خریدی جا سکتی ہے۔ اَور اُس کی قیمت کے لئے چاندی تولی نہیں جاتی۔ ¹⁶ نہ اوفیر کا سونا اُس کا مول ہو سکتا ہے۔ نہ قیمتی سلیمانی پتّھرسے اَور نہ نیلم سے۔ ¹⁷ سونا یا قیمتی بلور اُس کےبرابر نہیں۔نہ سونے کے ظُروف اُس کے بدلے دیئے جا سکتے ہَیں۔ ¹⁸ مُونگے اَور بِلّور کا اُس کے ساتھ ذِکر نہ کِیا جائے گا۔ بلکہ حِکمَت مُرجان سے بڑھ کر ہے۔ ¹⁹ کُوش کا یاقُوت اُس کا ہم قدر نہیں۔ نہ خالِص سونا اُس کے برابر ہے۔ ²⁰ پس حِکمَت کہاں سے آتی ہے اَور عقل کی جگہ کون سی ہے؟۔ ²¹ یقیناً وہ تمام زِندوں کی آنکھوں سے پوشیدہ ہے اَور آسمان کے پرندوں سے چھُپی ہُوئی ہے۔ ²² ہلاکت اَور مَوت کہتی ہیں۔ کہ ہم نے اپنے کانوں سے اُس کی شہرت سُن لی ہے۔ ²³ خُدا اُس کی راہ کو دیکھتا ہے۔ اور اُس کے مکان سے واقِف ہے۔ ²⁴ کیونکہ وہ زمین کی اِنتہا تک نظر کرتا ہے اَور آسمان کے نیچے کی سب چیزوں کو دیکھتا ہے۔ ²⁵ جس وقت اُس نے ہُوا اَور پانی کو پیمانے سے ناپا۔ ²⁶ جس وقت اُس نے بارش کےلئے قانوُن بنایا اَور بجلی کی کڑک کے لئے راہ ٹھہرائی۔ ²⁷ اُس وقت اُس نے اُسے دیکھا اَور بیان کِیا اَور قائم کِیا اَور اُس کی تحِقیق کی۔ ²⁸ اَور اُس نے اِنسان سے کہا کہ دیکھ ۔ خُدا کا خوف ہی حِکمَت ہے۔ اَور بَدی سے کنارہ کرنا ہی عقل ہے۔