¹ ا َیُّوب کا جواب تب ا َیُّوب نے جَواب میں کہا کہ۔ ² تُم کب تک میری جان کو دُکھ دیتے رہو گے۔ اَور اپنی باتوں سے مُجھے ٹکُڑے ٹکُڑے کرتے رہو گے؟ ³ اَ بدس بار تُم نے مُجھے ملامت کی ہے۔ اَور تُمہیں شرم نہیں آتی کہ مُجھے ستاتے ہو۔ ⁴ مانا کہ واقعی میں نے غلطی کی ہے۔ تو میری غلطی میرے ہی ساتھ ہے۔ ⁵ پر اگر تُم درحقیقت میرے خلاف لڑائی کرتے ہو۔ اَور ملامت کر کے مُجھے اِلزام دیتے ہو۔ ⁶ تو جان لو کہ خُدا ہی نے میرے ساتھ ایسا سلُوک کِیا ہے۔ اَور اپنے جال سے مجُھے پھنسا لِیا ہے۔ ⁷ دیکھو مَیں ظُلم کے سبب سے فریاد کرتا ہُوں۔ پر میری سُنی نہیں جاتی۔ مَیں مدد کے لئے چلّاتا ہُوں۔ پر اِنصاف نہیں مِلتا۔ ⁸ اُس نے میرے رستے پر باڑ لگائی ہے۔ جس سے مَیں گُزر نہیں سکتا۔ اَور میری راہوں کو تارِیکی سے چُھپا دِیا ہے۔ ⁹ اُس نے میری عِزّت سے مُجھے محرُوم کر دِیا ہے۔ اَور میرے سر کا تاج اُتاردِیا ہے۔ ¹⁰ اُس نے مُجھے ہر طر ف سے برباد کر دِیا ہے۔ اَور مَیں جاتا رہا ہُوں۔ اَور درخت کی مانند اُس نے میری اُمّید کو اُکھاڑ دِیا ہے۔ ¹¹ اُس نے اپنا غضب مُجھ پر بھڑکایا ہے۔ اَور اُس نے مُجھے اپنے دُشمنوں میں شُمار کِیا ہے۔ ¹² اُس کی فوجوں نے اکٹھا ہو کر میرے مُقابلے میں اپنا رستہ نِکالا ہے۔ اَور میرے خَیمے کے چاروں طرف ڈیرا لگایا ہے۔ ¹³ اُس نے میرے بھائیوں کو مُجھ سے دُور کر دِیا ہے۔ اَور میرے جان پہچان مُجھ سے بیگانہ ہو گئے ہیں۔ ¹⁴ میرے رشتہ داروں اَور رفیقوں نے مُجھے چھوڑ دِیا ہے۔ اَور میرے گھر کے رہنے والے مُجھے بھُول گئے ہیں۔ ¹⁵ میری لونڈیاں مُجھے پردیسی سمجھتی ہیں اَور اُن کی آنکھوں میں مَیں بیگانہ ہو گیا ہُوں۔ ¹⁶ میں نے اپنے غُلام کو بُلایا تو اُس نے جَواب نہ دِیا۔ اَور مَیں نے اپنے مُنہ سے اُس کی مِنّت بھی کی۔ ¹⁷ میری بیوی میرے سانس سے نفرت کرتی ہے۔ اَور مَیں اپنی ماں کی اولاد کے نزدِیک حقارت کا باعث ٹھہرا ہوں۔ ¹⁸ یہاں تک کہ چھوٹے بچّے بھی میری حقارت کرتے ہیں۔ جب مَیں کھڑا ہوتا ہُوں تو وہ میرے خلاف بولتے ہیں۔ ¹⁹ میرے ہم راز مُجھ سے نفرت کرتے ہَیں۔ اَور جِنہیں مَیں نے پیار کِیا ہے۔ میرے خلاف ہو گئے ہیں۔ ²⁰ میری ہَڈّیاںمیری کھال سے لگ گئی ہیں۔ اَور مَیں بال بال بچ نِکلا ہُوں۔ ²¹ مُجھ پر رحم کرو۔اَے میرے دوستو! کم سے کم تُم ہی مُجھ پر رحم کرو۔کیونکہ خُدا کے ہاتھ نے مُجھے چُھؤا ہے۔ ²² تُم کیوں خُدا کی طرح مُجھے ستاتے ہو۔ اَور میرے گوشت سے سیر نہیں ہوتے؟۔ ²³ کاش! میری باتیں کتاب میں لِکھّی جاتیں۔ کاش! وہ پِیتل پر نقش کی جاتیں۔ ²⁴ کاش! کہ لوہے کے قلم سے اَور سیسے سے ہمیشہ کے لئے پتّھر پر کَندہ کی جاتیں۔ ²⁵ کیونکہ مَیں جانتا ہُوں۔ کہ میرا نجات دینے والا زِندہ ہے۔ اَور آخر کار وہ زمین پر کھڑا ہو گا۔ ²⁶ اگرچہ میری کھال میرے گوشت سے اُکھاڑی جائے پِھر بھی مَیں اِس جِسم میں ہو کر خُدا کو دیکھُوں گا۔ ²⁷ ہاں مَیں ہی اُسے دیکھُوں گا اَور میری ہی آنکھیں اُس پر نِگاہ کریں گی اَور نہ کہ غیر کی۔ میرے گُردے میرے اندر فنا ہو گئے ہیں۔ ²⁸ اَور اگر تُم کہتے ہو کہ ہم کیوں کر اُسے ستائیں اَور اُس کے خلاف بات کرنے کا موقع پائیں۔ ²⁹ تو تلوار سے خوف کھاؤ کیونکہ قہر بَدیوں کا اِنتقام لے گا۔ اَور تُم جان لو گے کہ عدالت ہے ۔