¹ Ne ti tewii yen kulli ti taano kiriti, ne ti yai shabam. Ti ta nyimmo poshaarino ne kan kumani ti bi jimro shoomno Yamma ti ku we te. ² Ne kan daklan ta aa kping, kan turmo ti poshaarino kpaaliya ding. ³ Daa ne po kuuno ye shaamaano, birang in bwaarono kan kiriti longku marku ma molonno, teerei memme po peenno. ⁴ Shurme tei Ishereilaawa. Shinui me Yamma shigan shinui shiboni, in shuklon shik shokranni, in deewon ku ti shinui, in minin shubetno Muuja, in shukin koko wawo yen kpang, in minin peddi 5 Liyan gunju ti ma shii-ma shii te me penaa shinui kping. Kiriti birang, ti bi diyo lo-shikni, shii kan po-peenni. Shero mo Yamma, ye ti ya gub ti ku we ding, mo yiu kum piri fo ding. Mo yooro kaa te. ⁶ A ye ya nyimmono Yamma ti ku memmeni in yooro waanim. Longku a me ding liyaan gunjui Ishereila memmeno Yammam. ⁷ Birang a me ding ti ta po peenno Ibiraayimii shibono Yammam. Ti fo shoono teerei, Yamma in tewi ti Ibiraayim ya, "Ishaakoi niyo ye ti piree kan shi ye ta sha toom ka yoon shommoko." ⁸ Teerei, shiba ye ti patto shinui ti ta lo-shik, shinui a shibano Yammam, nang bara shiba ye ti we ka keman deewanku, shinui me ti ye yaa shiban kulli. ⁹ Longkuuno te, gee wee deewankui teka, "Ma koddi maa kennga ne ta meeru, nang Sharaatu ta patto la." ¹⁰ Ka manni temoi birang, shibano Rebeeka kan foju dok, tenei fomu kama ta Ishaako. ¹¹ - ¹² Pene ye in tang waraa patto shiba romiji, Yamma teka ti Rebeeka ya pee, "Mongbai ta wau mon tobi." Tenei yuwaaro tidang shinui in tang waraa ya manni weiyen kpang, yei yen kpangum. Yamma teka kaa we tei longku in deero ya, mo ta shakani ta shak shii ti bi limmono Yamma pene a longku shurannim. ¹³ Kaa ye ballii ya, "Ne leka Yaakubu, nang nen kuraa Ishuwa," ¹⁴ Oo, kamai ta teu wen? Yammai yu dob-dobum ya? Ongngoo! koo la-wiiu! ¹⁵ Kaa ye Yamma teka ti Muuja, "Ti mo ne ta shukin kpang, ne ta shukin kpang ti shii. Ti mo ne ta shukin kunngu, ne ta shukin kunngu ti shii," ¹⁶ Tenei a sheroi ti ku leu niyo yei dung doonim, nang bara kunnguno Yamma waani. ¹⁷ Kaa ye yaan ballano Yamma teka ti pirauna ya, "Ne liyaako ken shiwa gub longku nen shuklo kumenno ti piree kan ke, birang in kpaalo pi shommono ti ku-buk ding." ¹⁸ Kaa te Yamma ti shuk kunnguni ti mo shii leka in shukin kunngoni, birang ti issho poshaarino mondok ye shii leka in issho poshaarinii. ¹⁹ Ti shakki ma ka mo ta dum teuno ya, "Oo, maa kaa we te, longku wen ye Yamma ti geemu kan kelnye we foottu wendei? Wo nong tadum kura kumani ka nyimmono Yammai?" ²⁰ Pene kei nong, ai, la niyon ding, ye ke ta ya jiram kan Yammai? wee mondok diga ta dum tewani ti mo diganii ya, "Longku wen ke digano kaa tei ya?" ²¹ Ai, mo an dig diye dokbo kan kumen ya shuran ka dokbo ye shii lekan. Shii tadum yashuran ka shiddan doo dokbo dok in digin manni diyei, longku shuran yen kpang, peddi birang a longku shuran yen kpangum. ²² Shuranno Yamma kaa te. Ta dum shuk denni, birang ta dum shuk kumenni ti kudam. Pene ti shakki ker shaari kping kan kurmani kan me nennaa denni, me Yamma fuwaa po limma shikni ka we toddani. ²³ Kaa te, ta kumani in shuk gbe shokranni time shii shuklaan kunngoni ti shinui, me shii limmaa shinui ka toom yau, longku shinui in we shokranni. ²⁴ Tenei kama, kama me Yamma yeyaa, a ti shakki Yawudaawa waanim, pene kama mei ti shakki Yawudaawam. ²⁵ Kaa ye teka tita Alauno Hojaya ya, "shin mei memmenom ne ta tewani na shinui 'memmeno'. Birang memme buk ye nei lewo teim ne ta tewon ti tei na 'Lee ne leka'." ²⁶ Birang, ti dob-dob piree ti tewon ti shinui ya, 'Mai memmenom' ti po teerei ta tewani ya shinui, 'shibano Yamma mo kan dwei.' ²⁷ Ti ku Ishereila, an-pigra Isheya shokraa eleni ya, "kaa ye gbe Ishereila kaa ar shwiyak fok paali, me shigaju digi ti shakkijui, teerei bara shinui me ta kaurani. ²⁸ Longku Fo-mina ta kelmo ku-buk ding, a gale kan daklo koddim." ²⁹ Kaa ye Isheya yuwa an-pigra milam ya, Modaa longku Fo-mina mo an kumen ding ye wesshaa mu kama po paamun, kama daa yuwaamu kaa we shoodom daa shigan mun kama kaa Gomoora." ³⁰ Oo, ka yee dumai? Ai, mei Yawudaawam, a li shi shikju ka we diya dobno Yammam, shinui weyaa. Diya dob ye shinui weyaai, peenno ye ti wei ka lishaari. ³¹ Pene Ishereilaawa me liyaa shikju ka we gassho diya dobno Yamma ti jooro shoro, shinui a wam. ³² Longku wen kaa tei? longku a ti do koko lishaari ye shinui gasshaanum, nang bara ti li shik kuuju. Nang shinui in tura shooju ka "shiila te ye ti li tura sho." ³³ Kaa ye ballii ya, "Gee ne liyaa shiila ti Shiiyona, shiila ye ti li tura sho. Ta li memme gbe in shugna ta shinui. Pene maa mo kunnga kan shii a ta we duulan shigum."