¹ Longkuuno te, a doo manni kelmo muro wende ti ku me ti ta diyo po moli kan kiriti Yeeshom. ² Longku ti piree kan kiriti Yeesho, belan fok biro shoom te ye ti min kerang, tei foraano ti ta belan fok biro shasshalau kan muro. ³ Longku wee shoroi ta dum yaanim longku kenni bang nyimmo lo-shik, teerei wee Yamma yuwaa. Yamma nang in shuru dok Laani ti ta peen lo-shik sheemu kama, yei she shasshalau longku in shiwoni we der domi longku shasshalau ti ta lo-shik. ⁴ Yamma yuwaa tenei longku shuran diya dob ding yeshoroi teka ya mo yu, shinui in we kemoro ti piree kan kama, kama ye a nyimmo lo-shik ye kama ti yam, nang bara she shoom. ⁵ Me an diya nyimmo lo-shik, shinui ti li nyimmojui ti ku we lo-shik, pene me an diya shoom ti li nyimmojui ti ku wee shoom leka. ⁶ Li nyimmo ti ku lo-shik, ti yeeru muro, pene li nyimmo ti ku shoom ti waru ka kerang kan kuttan shaari. ⁷ Mo ding liyaa nyimmoni ti ku we lo-shik, nang shii shiganii an geino Yamma, longku a ti min gbe ti shorono Yammam, birang a ta dumanim. ⁸ Me an diyo nyimmo lo-shik a doo koko ye shinui ta waa lo-shik kerangno Yammam. ⁹ Kaa ma, a diyo nyimmo lo-shik yema ti yam nang bara she shoom, ma shoomno yamma maa dii ti poshaari ma. Ding moi kan shoomno kiritim, shii a sheeno kiritim. ¹⁰ Ma kiriti maa dii ti taama, kaa ye lo-shik ma ti ku koko muro longku shasshalau, shoomno Yamma in ti kpirin ka ma longku Yamma in yiu ma kaa me an diyo dob. ¹¹ Birang ma shoomno Yamma, ye shokraa Yeesho ti shakki kuma maa dii ti poshaari ma, oo, shi mo shokraa Yeesho ti shakki kumai ta min kerang tilo-shik ma yei an muro ti piree kan shoomni ye diiti poshaari ma. ¹² Longkuuno te, ma molonno, kama kan wee yikka mu kama kaman ya, pene a peenno ye kama ta yuun diyo ye nyimmo lo-shik lekam. ¹³ Longku maa nyimmo diyo lo-shik ye ma ti ya, ma ta muttani. pene maa ka kumen shoom yema tukan nyimmo ya shasshalau, ma tadee ma kan dwei. ¹⁴ Longku me shoomno Yamma ti shuulo shinui, shinui shibono Yamma. ¹⁵ Longku shoomno Yamma ye mina ma a we wawom ye ma ta mee mai diyani kan shewom. Ongngoo, shoom tei we diyo shibono Yamma, birang ti piree kan shoom ye kama ti yoon Yamma, kaman ti tewi kama ya, "Abba! fowi!" ¹⁶ Shoomno Yamma po kuuni gale kan shoommu kama in ti pee bi ya kamai shibono Yamma. ¹⁷ Kaa ye kamai shibono Yamma, kama shigamu me an sha po aa te. Kaa te, kamai me sha po aa kpangno Yamma birang kan me an jeere sha po aa te gale kan kiriti. Ma kama maa shuwaa shilibi ka shaayi kan kiriti, ta shokromu kama ka shaayi kan shii. ¹⁸ Ne kunnga, taa shilibmu kama ye wendei, a fooro shokrani ye ta shuklomu kama ti toomum. ¹⁹ Kpiyan we ding ta dalak kping, ta dang Yamma ka we shuklo shiboni. ²⁰ Longku liyaa wee kpiina, tei in kaano fooro angngo poshaariro, tenei a ti bi nyimmo wee kpiinai po kuurom, nang bara longku ye Yamma leka kaa te. Yuwaa we tei kan lishaari, ²¹ ya kpiyan we po kuuro, tei ta tuulani ti ta wawo ye ti ommoro, tei birang ta we po kuuro te ye ta shokron, ye ta yaani ti shibono Yamma. ²² Kama penaa we foottu wende, kpiyan we ding, ti ku bina kaa ye paamun ti yaaron shilib maa ta pari. ²³ A ku jal wee kpiina te, te ku dokro ye ti ya binaim, ding kan kama. Kama ye kama fuwaa po we shoomno Yamma yei kunngu ye ka toom wee minnamu kama, kama ti ku ya bina ti ta kerangmu kama, kaman ti dang kwi ka dalak kping, longku Yamma in shiwanmun kama shiboni yen kulli, birang in formu kama ti ta lo-shikmu kama te. ²⁴ Longku ti ta lishaari te ye kauraa mu kama. pene ma kama ma fuwaa po we shik wee kama liyaan shaari ti kwi, nang tenei birang a lishaarim. Wo nongee ti lishaari ka wee fuwaa po weyanii? ²⁵ Pene ma kama maa ti lishaari ka wee tida kamai wam, neena kama ti dang kwi, kaman ti ker shaari. ²⁶ Kaa te ye shoom ti shaumu kama ti ta kenni bang. Kamai peno ye kama po fori fokum, pene shoom po kuuni, ti beng Yamma ti po shoomu kama kan bina-bina ye pa-paaro a ta dum shuklanim. ²⁷ Birang Yamma, mo shii an we shik poshaari niyo, penaa nyimmo shoom, longku shoom ti ku ya bengo ti po me shakkaa ti ku nyimmono Yamma. ²⁸ Kama penaa ti shakki we ding, Yamma ti yai ween kpang, longku me ti leu shii, teerei, me yeena shinui ti ku nyimmoni. ²⁹ Longku me Yamma fuwaa po shakko shinui yau, birang in wak shinui, mo shinui shar peen ado Laani, longku shiganila newe ti shakki ma molon gbe. ³⁰ Longku me Yamma fuwaa po shakkani, shin me yeyaa. Me yeyaa, teerei shinui me shigan me ta yooju mei ta we kelnyom ti toomni, teerei shinui me shokraa. ³¹ Oo,kamai ta teu wen ti ku paaro tei? Ma Yamma maa ti daumu kama gunmu kama, wo nong ye foraa in ye kenne kan kamai? ³² Yamma nang a beelo mu kama ka Laanim, pene in min shii longkuumu kama ding, Oo, shi Yamma ye fuwaa po min mu kama Laani a ta min mu kama dogi wei ka poshaari dok maa? ³³ Wo nong ta waru ka ya gun me Yamma shakkaai? Ai, Yamma po kuuni ti shiwon shinui in yooju mei kan kelnyom ti toomni. ³⁴ Wo nong ye fooraa min kelmo muro ti niyoi? Kiriti Yeesho mo muraa, nang ye in tewi, mo ye shokraa ti shakki kuma, mo birang deeni ti ku kira temmeno Yamma, teerei shii mo ti ku beng Yamma ti po shoomu kama. ³⁵ Wo nong, wende ta dum bwaaromu kama kan lewan ye kiriti ti ku yuumu kamai? Taa shilibi ya, kunne ya, kpiyam ya, kenni ya, shuwat nangii muro ya? ³⁶ Kaa ye ballan paaro Yamma teka ya, "Longkuuko ye min ta dang ku muro kpaaliyo ding, sharaamu kaa dinnyi ye ta waraa karani." ³⁷ Ai, ti ta we te ding, kama kooko mu ti foki in tewi ya kamai me an sha toom waani, tenei ti shikno la-moo ye leka mu kama. ³⁸ longku ne penaa koo muro koo kerang, koo me an shuranno Yamma nangii shaabuk, koo nyimmo ye wende, nangii ye ti toom, koo kumen peeni-peeni, ³⁹ koo joori ku-dang nangii kpurungtung ta jwal, koo manni wei dokro ti ta wee kpiina ding, shin ding foki dok, a fooro in bwaaro mu kama kan lewan ye Yamma ti yuumu kama ti piree kan kiriti Yeesho Fo-minamu kamam.