¹ Oo, ma molonno, kaa ye kama dingii me an pen shoro, ma ta pen wee ne ta tewani. Shoro ti ya kumen ti Ku niyo ta koddi ye niyoi maa kan dooni waani. ² Dangan piri, maa paamun ye kan diyaa, shoro kpakaa tei ti mannaro ma shwijii maa kan dooni. Pene ma mannaro maa murooni, tei weyaa po kuuro ti kira shoro ye kpakkaa tei kan mannaro. ³ Longkuuno te, tei maa diga manni niyoi dokro, ye ma mannaro maa kan dooni, tatewani ya tei an shomak. Pene ma shwijii maa murooni, tei yuwaaro po kuuro kaa ye shoro dau diyaa tekan. Ma tei maa digaro manni niyoi birang, tei an shomakum. ⁴ Longkuuno te, ma molonno, tenei temo ti kuuma. Murono kirirtiti ku biro sheewe liyaa man yooma kuma ta shoro, longku man ya ween kpang ti Yamma ti ta diya ma. ⁵ Kaa ye koddi ye kama ti ku diya nyimmo lo-shik, shoroi in ti shuulo piire dalak mu kama. Dalak mu kama teere, tei in yiu ya shuran ti ta diimu kama, shuranmu kama ding in pattomu kama muro. ⁶ Pene wende duma kama weyaa pokuumu kama ti ta shoro, longku kama muraamu ti ta wee kpkakaa mu kama. Longkuuno te wende kama ti ku wau Yamma ti ta diyo yen fo ti ta shoomni. Kooro wawo ye kama yuwaa ti balilan shoro kookaro. ⁷ Kamai ta tei wen wendei? shoroi shasshalau ya? Kulli, a kaa tem! kulli a doo ye ne po penon shasshalawum, in maa ti bi shorom. Ka shoro ye teka ya, "Moko yu dalak weeno mondokum," ai ne daa peno wee ti tewi yaa dalakum. ⁸ Pene longku kumen te, nang shasshalau in we koko po shuulo peen dalak ti ta aano. Longku maa gale kan shorom, shasshalau kaa kuma. ⁹ Milam ne kan dwei, nei peno shorom, pene bara ye ne penaa kumen, nang shasshalau inilloro kan dwei, nang nen murono. ¹⁰ Kumen te ye nunngan shii wanna ka kerang, birang in yeerino muro. ¹¹ Shasshalau weena koddiro, birang ti bi kumen in dokkono, birang in tukno. ¹² Longkuuno te, shoroi po kuuroi we po shor shiki, kumeni birangii we po shor shiki, dob-dob, yen kpang birang. ¹³ Teerei, ta tewani ya shoro te, ye tei yen kpang, tei yeenano, muro ya? A kaa tem! Koo la-wiiu! Yeenano we tei shasshalau in yeeruno muro, longku in pen dangan pi shasshalau. Teerei, ti piree kan kumen te shasshalau in peru kudam ka kpakan po piirero. ¹⁴ Min penaa shoroi we shoom. Nei mo an nyimmo lo-shik, shook waani ti kira shasshalau. ¹⁵ Nei peno wee ne ti yam. Longku wee ne leka nen yai, ne ti yai tem, birang wee ne kuraai, teerei wee ne ti ya. ¹⁶ Ma wee ne ti ya teerei maa wee nei lewo nen yam, ne kunnga nang shoroi ween kpang. ¹⁷ A ne po kuuno ye ti ya we tem, nang bara shasshalau te ye dii ta aano. ¹⁸ Ne penaa a doo ween kpang ye dii ta aanom, yei nyimmono she lo-shik. Longku ne kan nyimmo ya ween kpang, pene yaani kaa tei in yek piri ti kuuno. ¹⁹ Ne ti ya ween kpang ye ne leka yaanim, nang ne ti yai bara shek ye nei lewo nen yam. ²⁰ Wende ma nei ti yai wee nei lewo nen yam, tenei shuklaa a ne ye ti ya we tem, pene bara shasshalau ye dii ta aano ye ti ya. ²¹ Nang nen we, kulli, shigaro kpakan foki ye ma nei leka nen ya ween kpang, nang nen we shik shek nimmi kan ne. ²² Longku ti ta aano, ti poshaarino shorono Yamma ti twaalono shaarino, ²³ pene ti ku gul-ku gulno ne ti we kpakan fok dokro ye tei ti ya gei kan kpakan fok ye nyimmono sharaa. We te dakano ta tei ti kpakan fok shasshalau te ye tei dii ti ta ku gul-ku gulno. ²⁴ Dogii sheeno! Ne shiga we kunngo! Ta kauro nei nong ti ta lo-shik te ye ta warin nen kaara muroi? ²⁵ Ne pammaa Yamma longku shii kauraano ti piree kan Yeesho kiriti fo-minamu kama! Longkuuno te, ne po kuuno ne ti wawii showroom Yamma ka nyimmono, pene ka nyimmono she lo-shik, ne ti wawii shoro shasshalau.