¹ Kamai ta teu wen wendei? Kama ta shoomu toom ka diyo shasshalau kulang kunnguno Yamma in tokko shaariro ya? ² A kaa tem, koo la-wiiu, Ai, kama fuwaa po muromu kama ti piree kan shasshalau. Ka yee birang kama ta sha toom ka diyoni ti taaroi? ³ Duma, ma ding mai peno kama ding yuwaa mu kama yulma we war taano kiriti Yeesho, we war ta muroni ye yuwaamu kama yulma maa? ⁴ Teerei, ti bi yaan yulmamu kama nanaamu kama gale kan shii, birang kaman yoomu dok kan shii ti ta muroni, longku kaa ye shokraa kiriti ti piree kan kumen te we shokranno Fowi, kaa te kama sheemu, kaman ya diyon fo. ⁵ Kaa ye kama yuwaamu dok kan shii ti ta peen muroni, kulli kama ta yoomu dok kan shii ti ta ilitni ti shakki me murooju. ⁶ Kama penaa ye ya fuwaa po nan kooro nyimmomu kama ye milam gale kan shii, longku in wak kumen shasshalau te ye ti ta diimu kama. Yuwaa kaa tei longku kamai ta tokko shaari diyo shook shasshalawum. ⁷ Kaa ye ma niyo maa murooni, shii weyaa diyo po kuuni ti piree kan kumen shasshalau. ⁸ Kaa ye kama fuwaa po muroomu ka shaayi kan kiriti, kama kunnga kama ta deemu kan shii birang. ⁹ Longku kama penaa ye shokraa kiriti ti shakki me murooju, birang a ta tokko shaari muranim, teerei ye muroi a kan dogi kumen ti kuunim. ¹⁰ Muro te ye yuwaai, murooni sho dok waani longku shii belaa kumen shasshalau, pene diyo ye ti ku yaanii, ta yaanii ti ta diyo gale kan Yamma. ¹¹ Kaa te birang, ma shar kuuma kaa me kumai ti bi kumen shasshalau, pene me kan dwei ti shakki diyo gale kan Yamma ti biino kiriti Yeesho. ¹² Longkuunote, mo ma kumu shasshalau in ya gub ti ta lo-shik ma ye ta muroroi, ye ta liima man yiu bi piree dalak nyimmo la niyon dingi. ¹³ Birang mo ma min ku gul-ku shik ma ka we ya shasshalawi ye ta yooro shari yuyyo sheki. Nang bara ma min kuuma ti Yamma ye nennaa me foraa shinui ti ta kira muro we war we kerang, birang ma min kuuma ti Yamma longku in yooju shari shuran diya dob. ¹⁴ Mo ma kumu shasshalau in ya gub ti kuumam, kaa ye a doo shoro ye ta ya kumen ti kuumam, bara kunnguno Yamma. ¹⁵ Wowen dumai? Teerei, nang mo kama yu shasshalau longku shoro a kan kumen ti kuumu kamam, bara kunnguno Yamma ya? Oonngoo! koo la-wiiu! ¹⁶ Mai peno maa, ye mam maa minaa kuuma longku man shiwoma me an murku ti mondok, teerei ye ma shiga ma shook ta kira mo wende ma ti murunku ti shii ya? Ma ta dum shiwo shook shasshalau, ye ti warin niyo kaara muro, koo birang me an murku ti Yamma, ye ti warin niyo diya dob. ¹⁷ Pene pammani mo yooro ti Yamma, longku kaa ye milam mai shook shasshalau, pene wende ma ti Ku murku ka poshaari ma ding ka peen shubet te ye yuwaa ma. ¹⁸ Piddaa ma ti ta shasshalau, birang man shiwo ma shook diya dob. ¹⁹ Ne ti yuuma paaro kaa ye la niyon ding ti yuun paaro, tenei longku kenni bang ma ti ta nyimmo lo-shik. Milam fokma turmaaro ka min Ku gul-ku gul ma ka we wau we doon, birang we shek ye tei ti tokko shaariro waani. Pene wende nang ma min kuuma ti wawo diya dob, teerei longku ya shuran yen shaana. ²⁰ Koddi ye mai shook shasshalau, a doo we taaka ma ka shuran diya dobum. ²¹ Ma weyaai ween kpang wen ti shik we te ye wende shinui yuwaaju we duulan shik mai? Ai, we bi ween shurme tei muro! ²² Pene wende piddaa ma ti ta shasshalau, birang man shiwo ma shookno Yamma. ween kpang ye ma ti we ti bi we tei shaano diya ma. Ye tei ta patto ma kerang po-ding. ²³ Longku we bi shasshalawi muro, pene kunnguno Yammai kerang po-ding ti piree kan kiriti Yeesho Fo-minamu kama.