¹ Ma molonno, wee ne leka ye yeka we ding kan for-fokno ti Yamma, Ishereilaawa in we marku. ² Ne jimraa ye ya shinui kan mwisshi wau Yamma, pene tenei a gale kan penani yen kullim. ³ Kaa ye shinui a peno do koko ye Yamma ti liin memme in shiwaju mei kan kelnyom, birang shinui in ti li shikju ka we limma do koko shiwaju mei kan kelnyom ti toomno Yamma, nang tenei in li shinui a min kuuju ti do koko ye Yamma ti li memme in shiwaju mei kan kelnyom. ⁴ Longku kiriti, shii mo wanna ka wittan fok shoro, longku ding mo an kumani, in yooni moi kan kelnyom ti toomno Yamma. ⁵ Muuja yuwaa balla ti ku we shiwa moi kan kelnyom ti bi yiu bi shoro. Ya, "Mo ding yikka bi shoro te, ta ya diyoi ti biiro." ⁶ Pene gee wee ballan paaro Yamma teka ti ku we diya moi kan kelnyom ti bi lishaari, "Moko tewo ti ta poshaariko ka, 'Ta ammo ku-dangii nong? (Ye in shaaru ka kiriti.) ⁷ "Yei ke ken tewi ka,Ta shaaru we sha laddi ta gun ku-bukii nong?" (Ye in shokro kiriti ti shakkikuma.) ⁸ Yen kulli ballan paaro ti tewii ya, "paaro Yamma nimmi kan ke, tei ti ta fokko, kan birang ti poshaariko," paaro tei shuran lishaari ye min ti ku kaawiroi. ⁹ Ke maa sheeraa ka fokko ka Yeeshoi Fo-mina, birang ken kumi ti poshaariko ka Yamma shokraa shii ti shakki me kuma, ta marko. ¹⁰ Longku ka poshaari ye ti kumi in we diya moi kan kelnyom ti toomno Yamma, birang ka ku fok ye ti yuun jimro ka we we marku. ¹¹ Kaa ye ballan paaro Yamma teka ya, "Mo ding kunnga kan shii a ta we duulan shikum." ¹² Longku a doo bwaaran ta Yawudaawa kan mei Yawudaawam. Fo-mina te dok, shii Fo-minano koo nong, shii mo ti min kpang gbe ti me ding ti war shikni ka kwiiju. ¹³ Kaa ye ballan paaro Yamma tekan ya, Mo ding yuwaa yee ka shommoni, ta we marku." ¹⁴ Pene ka yee shinui ta ya yee ti mondok ye shinui kum kan shiim mi? Ka yee shinui ta kumani kan mo shinui nau yaaraanim mi? Ka yee shinui ta yaaraani ye maa a doo mo ta yuun kaawim mi? ¹⁵ Ka yee birang me an kaawi ta ya kaawii ye shur shinuim mi? Kaa ye ballii ya, "Fooran me an waru ka kaawii ween kpang kping!" ¹⁶ Pene a Ishereilaawa ding ye kunnga kan shinnyi Yen Tomon tem. Kaa ye Isheya teka ya, "Gbaa Fo-mina, kunnga kan shuran mui nong?" ¹⁷ Longkuuno te, ti kumii ti bi yaaran shurani, birang ti yaaro shurannii ti bi kaawi ti kuuno kiriti. ¹⁸ Pene ne ti ku ya telyo, "Yen kulli ya shinui yaarom ya?" Ai, shinui yaaraa. Longku ballan paaro Yamma teka ya, "Ele shuranju fuwaa ta piri ding, pa-paaroju waraa kpakan po ku-buk." ¹⁹ Ne ta ya manni telyoi, " kulli ya Ishereilaawa a jemlom ya?" Ka toom Muuja lignaa ya Yamma teka ya, "Ne ta lii ma man mwissho mei bukum, ti bi buk yei kan shenum ne ta lii ma man ya den." ²⁰ Nang birang Isheya in ya bang poshaari ye in tewi ya Yamma teka ya, mei gassho biinom, shinui me weyaano. Gee me shinuiyu telyo ye shin po waan ne num." ²¹ Pene ti ku Ishereila, Yammabirang in tewi ya, "Ne wiilaa darang nen ti shou kirano ti memme mei ti murkum kan me an bang kumo."