¹ Oo, ne kan telyo, duma Yamma kuraa memmeni ya? Ongngoo! koo la wiiu! Ne po kuuno, nei niyo Ishereila, po peenno Ibiraayim, birang niyo po peenno Bilyaaminu. ² Yamma a kura memmeni me shaka katoomum. Ma penaa yaan balla paaro Yamma wee teka ti kuuno Iliya, teerei ye shii Iliya waraa shikno Yamma ka kwiini ti ku Ishereila ya, ³ "Fo-mina, shinui tukyaa me an-pigra ding, birang shinui in vu-vubro digyan po kungro we. Ne dokno ne tuulaa, birang shinui in ti gassho biino ka we tukno." ⁴ Yamma lignaai ka yaa? Lignaan ya, "Ne lattaa niyo ti kuuno shik-dok sho naa-parilau meiti juunna in wau yamma te ye shommoi Baalum." ⁵ Kaa te, tenei in deero kaa te wende. Ka dogi diyan memme me Yamma shakkaa ti bi kunnguni. ⁶ Shakkani te ye Yamma yuwaai sheeraroi ti ku kunnguni, a ti bi shuran ye memmei yuwaam. Longku in maa kaa tem, kunngu a yooro kunngu yen kullim. ⁷ Oo, nangii ka yee? Ai, Ishereilaawa shinui kaana we wee shinui ta gasshani. Me la-wiiu ye shakkaan ti shakkijui shinui weyaa, pene dogi in yooju me an bang ku. ⁸ Kaa ye ballii ya, Yamma shigan shinui mei kan nyimmon kpangum kan mei ti penim. in minin ado ti shinui yei ti wem, kan kumo yei ti yaarram. Wende in shooro toom we foottu booi." ⁹ Birang Dauda in tewi ya, "Shero mo temroju yooro jiwa, wee tayeerin shuwat ti shinui. Shero mo li shinui in turo shooju in yeerin kelmo ti shinui. ¹⁰ Shero mo adooju yooro dil ye shinui ta kaano weyani, birang gbe bala mo derin tira ti kuujui fo ding." ¹¹ Bambirino ti ku ya telyo, ye Ishereila turaa shooju, shinui in shugna a ta illani ta shinuim ya? A kaa tem! koo la-wiiu! Longku shasshalauju, marku in fooro shik mei Yawudaawam, longku in li Ishereilaawa in mwissho shinui. ¹² Maa longku shasshalau ye shinui yuwaa ye wanna ka kpang ti me ti ku-buk, birang ma kaananju maa wanna ka kpang ti mei Yawudaawam, oo, kpang te ta yooroi ka yee ta koddi ye gbe Ishereilaawa meta waru shikno Yamma maa kenngai? ¹³ Wende, ne ti ya paaroi kaa ma ma mei Yawudaawam. Kaa ye nei an kaawino Yeesho ti mei Yawudaawam, ne ta ya la tabang-tabang ka shuraano te. ¹⁴ Yaani kaa te, neti ku for-fok nen dum li memmeno Ishereilawa in ya mwisshi, ye tenei maa ta liyani in marku peddi. ¹⁵ Ta koddi ye vinngan shinui, nang in au podang, in limma shakki ma Yamma kan ku-buk. Ta koddi ye ta yiwin shinui, a we kerang ti shakki me kumai ye we te ta warin maa? ¹⁶ Maa waka jele nan dok we-ta-kele ar nii weshiinan fo, ka we minani ti Yamma, waka we-ta-kelei ding. Birang maa waka shoorin biro ti Yamma, dogi ku fugha biroi waka ding. ¹⁷ Oo, mo doklo peddi ku fugha biroi jeituni peenno ye shuraai, nang in shar manni fugha biro jeitun peenno ye ti doong, birang in dawin diyoo ti shinui. Nang ma mei Yawudaawam, ma kaa fugha biro jeitun ye ti ta shwee, mai me mayaa ma kan jimi te, tenei Yawudaawa, mei ti piree kan shinui ye ma ti waan kpangno Yamma. ¹⁸ Longkuuno te, mo ma yu tabang-tabangum ti kwi ye maa ma yeka mennyi ku fugha ye doklaai. Mam maa ta ya tabang-tabang, nang man nyimmina ye ya a jimi ye sherii ti kuumam, nang bara ma sherii ti ku jimi. ¹⁹ Pene ke ta dum tewani ka, "Ai, pettaa fughai longku in we koko po maino kan jimi." ²⁰ Kaa tei kulli! pene longku kenni lishaari ye pettaa shinui in jimii, ke sheeko, ti bi lishaari ye ke kan koko ken sha toom ka diyani ti ku jimi. Longkuuno te, mo ko yu tabang-tabangum, kan ye ken ya kaa teere, yu shewo. ²¹ Longku ma Yamma maa wessho ku fugha me yei dab po jimim, ke sheeko a ta wessho kom. ²² Ti po te kama ta dum we dangan pi kunngu ye Yamma kan te, birang kan kpiiro. Shuklaa kpiironi ti me shuga, pene in shuklo kunnguni ti piree kan ke, teerei ye ke maa shuwaa toom ka diyani ti ta kunnguni. Ma ke maa shu-toom kaa tem, ke sheeko ta kaan ken tipo jimi. ²³ Ma Ishereila maa shu-toom ka kenni lishaarim, ta mai shinui kan po jimi, longku Yamma ta dum maan shinui po jimi. ²⁴ Ma mei Yawudaawam, ma kaa biro jeitun peen she dong ye ka bi ye keena, in wari dawin diyaa kan peen jeitun ye shuraa. Tenei ye yuwaa a ti bi koko dau diyaa birom. Oo, kaa ye shin Ishereilaawai shinui kan peen biro jeitun ye shuraai, ta yooro we maj-maj kping ti piree kan Yamma in men maan fuga te ye keyaa ti shik biro te ye shii dab peenju. ²⁵ Ma molonno, nei lewo man dinaa ka kenni pen lattan we tem, longku yoo ma shiwa ma me an shokro ku. Bang ku yuwaaro ti shik peddi Ishereila ye gbe mei Yawudaawam, ye shinui ta ri shikno Yamma in kemi. ²⁶ Kaa te, ta marku Ishereila ding. Kaa ye ballii ya,"Mo an-marku tawaru ti Shiiyona. Ta kai bi kenni yiu bi Yamma ding ti ta po peenno Yaakubu. ²⁷ Tenei kuman deewanku paarono kan shinui, ta koddi ye ne ta sharin shasshalauju." ²⁸ Yawudaawa shigaju mean geino Yamma longku kura shinnyi Yen Tomon ye shinui yuwaa, tene birangii longku po sha toom ma. Pene ka longku shakan ma ye yuwaa, shinui memme ye Yamma leka. Tenei longku kpang shii ma-shiiju. ²⁹ Longku bwaarino Yamma kan yeeni a wee Yamma ta paaro kwim. ³⁰ Milam mai mei Yawudaawam, mai me an bang kumo ti Yamma, pene wende ma weyaa kunnguno Yamma ti bi bang kumo Yawudaawa. ³¹ Kaa te Yawudaawa birang shinui shigaju me an bang kumo ti Yamma wende. Tenei birang longku shinui in we kunngu ti bi kunngu te ye Yamma shuklaa ma. ³² Longku Yamma shigan memme ding kaa me an diyo tamina muruk longku bang kumo. Yuwaa kaa tei longku in shuk kunngu ti koo nong. ³³ Kulli, joori gbe penanno Yamma birang kan she penanni a doo wiilanim. Kelmo-kelmoni yeka bang yippo guni. Wee ti ya yeka bang penani! ³⁴ Naka pen poshaarino Yammai nong? Naka shiwa an jeere deppo paaronii nong? ³⁵ Naka min we ti Yammai nong? Ye tayiwani gbare-do in maan piri ti shii? ³⁶ Longku shii mo kpiina we ding, birang we te ding yuunai ti piree kan shi, birang longkuuni. Shero mo shokrani yooro ti Yamma po-ding. Mo yooro kaa te.