¹ Longkuuno te, ma molonno, ti bi kunngono Yamma te, ne ti ku beng ma ma min kuuma we kurani ye kan dwei, ye shaana, birang kan we lewani ti Yamma. Tenei koko ye ma ta yuun shuuran ti Yamma yen kulli. ² Mo ma kumu nyimmo peen she ku-buk booi in shar nyimmo mam, pene ma kumu mo Yamma paaro ma kuuma, in paaroma ku poshaari ma kan nyimmoma. Kaa te ma ta dum penani ka wee nyimmono Yamma, teerei wee yen kpang, wee po lewani ti piree kan Yamma, birang kan wee ye kemani. ³ Ti bi kunngu te ye yuwaano, ne ti ku yaani ti koo nongma pekro na mo mondok shar kuuni kan gbai in kooro ti fok piree nennaa in yai. Kan ye kaa teere, koo nong mo jooro kpang ti ku ye shii ti geen kuuni,tenei, mo yiu gee kuuni dob-dob ye lewan lishaari ye Yamma minaan ti shii. ⁴ Kama kan ku gul gbe ti ta lo-shik dok, birang ku gul shurme ding kujal kan shuranju peeni-peeni. ⁵ Kaa te, kama me memme gbe, kama shigamu lo-shik dok ti taano kiriti, koo nong mu kama birangii ku gulno molli ta shii. ⁶ Longkuuno te, nennaa kaman ya shuran ka bwaari te ye peeni-peeni dob-dob ye lewan kunngu ye Yamma yuwaamu kama. Ma kunngumu kama maa ya pigra, nang mo kama yu pigra dob-dob lewan lishaarimu kama. ⁷ Ma kunngumu kama maa we ya shuran, shero mo kama yu shuran. Maa we shubet, kaman ya shubet. ⁸ Maa we min bang vurum ti shaayi, shero mo kama yoomu me an min bang vurum. Birang ma kunngumu kama maa we teklo muru do ma molon, nang mo kama yu kaa tei ka poshaari dok. Maa we ya an toom, nang mo kama min nyimmomu kama kping ka ya an toom. Maa we kunngo, nang mo kama yu kaa te ka twaalan poshaari. ⁹ Ma wessho lewanma mo yooro yen kulli. Ma kuraa wee piirei, pene ma yiu wee yen kpang ka bang kping. ¹⁰ Ma min kuuma ti shaayi peen she an moli. Birang ma li shik ma kping ka we min gba ti mondok ye yeka kuuma. ¹¹ Mo ma yooma me an daklanum, pene ma shar nyimmoma ti poshaari ma kping kan ya shuran ti Yamma. ¹² Ma yu diya twaalan shaari ti poshaari ma, ma kero shaari ti ta taa shilib ma, birang ma yiu poshaari ma ti ta for-fokma. ¹³ Ma yiu bwatto wee makan te kan memmeno Yamma me ti ku gasshani. Man ti yiu bino kira palau-palau. ¹⁴ Ma li kpang ti ku me ti kpiiroma. Ma liin kpang ti kuujui, mo ma shaamo shinuim. ¹⁵ Ma yu beere ka Shaayi kan me ti ya beere, man yakwii ka shaayi kan me ti ku ya kwii. ¹⁶ Ma diya bang kan shaayi. Mo ma shuklo diya shokro kum, pene ma shiwan kuuma me an jeere mei shar shinui ti po weenan dokum. Mo ma shar kuuma kaa ma yeka dogi memmei ka shenum. ¹⁷ Ma mondok maa yuwaa ma shek, mo ma maan ti shii ka shekum. Ma jooro longku man ya wee koo nong ta geyanii dob-dob. ¹⁸ Ma yu wee ma po yaani, ye maa ta dum yooro, man diina bang kan koo nong. ¹⁹ Mo ma yooma me an ya po janum, ma molonno, ma wessho ti Yamma in yuuma po jan sheema ti ta denni. Longku ballii ya, "Mo Fo-mina ya, ya po janii weeno, ne ta ya po jani." ²⁰ Ballan paaro Yamma birang teka ya, "Ma an geiko maa ta yaaro kpiyam, ken minin weshiina, Maa ti ku yaaro isshi fok, ken minin doo she. Yaani kaa te, ke ti galinii irip deet ti kuunii. ²¹ Mo ma wessho shek in yek bangmam, kan ye kaa teere, mayeko bang shek ti bi ya weene yen kpang.