¹ Yikka ti gbare-do koo nong in min gbe ti me an toom an gub, longku a doo manni kumen an toomum, bara kan kumanno Yamma . Birang kumen me an gub ding ye kama kan shinu, liyaa shinui Yamma. ² Longkuuno te, ding mo kuraani min gba ti me an toom an gub, kuraanii min gba ti wee Yamma liyaa. Me an yaani kaa tenei ta yeeru ti kuujui kelmo. ³ Longku me an gubii we shewo ti piree me ti yai wee dob-dob, nang bara me ti yai wee pirei. Ke leka ken bwaarra kan shewo kumen niyo mo an toom ya? Oo, nang yu wee dob-dob, shii po kuuni ta kum pirko, ⁴ longku shii shookno Yamma yei yei longku shuran po kuuko. Pene ma ke maa mo an ya shek, nang ke ta ya shewo , longku a waani ye mo an toom ye yiwii kan agarumnim. Shii shookno Yamma, birang ti piree kan shi, denno Yamma ti yooro longku in kelmon mo an shek. ⁵ Longkuuno te, yikka ti gbare-do man min gba ti me an toom an gub. A longku man yoppo denno Yamma waanim, pene longku nyimmoma in yooro a doo kelnyem. ⁶ Birang tenei ye liyaa ma man ti angngo kine buki, longku me an toom me an gubii me an shuranno Yamma, me ti shar koddiju ding longku shuran ya an toom. ⁷ Ma anngoo wee koo nong ta yiwin bii ma. Maa kine buk kuuma ye nenna man angngina, nang man angngina, maa kine buk she sharima, nang man angngina. Ma shi mo fooraa man shi shii, birang man min gba ti mo fooraa minin gba ti shii. ⁸ Mo ma yiu weeno mondokum. Nang bara we te ye yikka ma ti gbare-do man ya, teerei, shuk lewan ti shaayi. Longku maa mo ti leu mondok, shii kennga shoro te. ⁹ Pekro shurme, teerei, "ke ta ya shomakum, ke ta tuk niyom, ke ta ya jirim, ke ta ya dalakum," kan dogi pekroi ye ka we, shin ding weyaa kemoro ti ta paaro te ye teka ya, "Lewo koo nong kaa ye lekan kuuko." ¹⁰ Ma kee ti leu mondok, ke ta nau yuun shek ti shiim. Longkuuno te, lewani, tei kem shoro. ¹¹ Oo, ma yu tene longku ma penaa peen koddi ye kama ti tai. Koddi yuwaa ye ma ta illani ti do shaklo, longku koddi ye ta marma kuuma, kama yuuna nimmi wende kan koddi ye milam kama foraan fokmu kama. ¹² Bang yippa fuwaaro, ta piri nennga kpaaloro. Longkuuno te, shero kama wakyo shuran yei we ta dil, kaman shoppo shari geimu kama she aaro. ¹³ Shero kama yu diya yen kpang kaa ye nennaa diya me ti ta aaro, a gale kan sheyyo-sheyyo peeni-peeni kan kpisshanim, modaa nyimmo yuyya doon-doon kan sha tomon she kenni duulan shik, yei kaa nee kan mwisshi. ¹⁴ Kan ye in ya kaa teere, nang ma shar peen nyimmono Fo-mina Yeeshob kiriti, birang mo ma kumu kan nyimmo she lo-shik ye ta warin man piree po ya dalak-dalakrom.