¹ Ma yiu niyo ye tida lishaarinii yu bangum, pene mo ma gee shii kan kelye ye ma fokma kan sheeni maa dokum. ² Lishaari no mondok ta kumin ti shii mo addo wee ding shii leka, pene niyo ye shii bang ti ta li shaarinim, nang shii ti shoonii bara we ta doongni. ³ Niyo ye ti shai ding peen wee shii leka mo wessho bek moi ti sha peen weshiina dingummi. Birang moi ti sha peen weshiina dingummi, mo wessho li kelnyo ti kuuni mo ti sha peen weshiina dingii, longku Yamma fuwaa po yiu shii . ⁴ Kei nong ye ke ta li kelnyo ti ku shookno mondoki? Koo shooki yuwaa shuran yen kpang, koo yeka, ai, dogii sheeno Fo-minani. Gee nang ta sha toom, longku Fo-mina ta dum li shii in sha toom. ⁵ Mon dok ti gee manni darangi yeka peddi darangi. Ta geyanno mondok darang ding ku jal dob-dob. Koo nong mo wa kpang sheeni ti poshaarini. ⁶ Ding mo ti gee manni darangi yeka kpang ti ku peddi darangi ti ya kaa tei ti shakki min gba ti Fo-mina. Ding mo ti sha peen weshiina ding ti ya kaa tei ti minii gba ti Fo-mina, longku ti pammina ti Yamma ka longku weshiina. Ding moi ti sha peen weshiina dingum shi sheeni ti ya kaa tei ti ta min gba ti Fo-mina, longku shi sheeni ti pammina ti Yamma. ⁷ Ti shakki mu kama, a longku po kuuni ye mondok diinum. Birang a longkuuni ye ti murim. ⁸ Ma kama maa dii, kama dii ka longkuuno Fo-mina, birang maa muro ye kama ta yaani, kama ta muranii ka longkuuno Fo-mina, longkuuno te, koo kama kan dwei, koo kam muraamu, kamai weeno Fo-mina. ⁹ Longku kiriti muraa birang in illani kan dwei longku in yooni Fo-mina me shinui kumai kan me kan dwei. ¹⁰ Ke sheeko, longku wen ken ti gee molko kan kelnyei? Ke sheeko birang, longku wen ken ti bek molkoi? Kama ding, kama ta sherani ti toomno Yamma yeshii mo an shiiromu kam . ¹¹ Longku ballii ya, "Ne pammaa we ka kerangno, tei tewanno Fo-mina, po vurum ding ta tuumani ti toomno. Dak ding ta kpaalo piri ya nei Yamma." ¹² Oo, koo nong ti shakkimu kama ta sheero pi peen diya ye shii yuwaa ti Yamma. ¹³ Longkuuno te, kama daifo peen nyimmo te ye kama ti geen kelnye shaayi. Kan ye kaa teere, nang mo koo shar ti poshaarini ya shi ta shiwani we shuwat yei we li ya shasshalau ti mollim. ¹⁴ Ne penaa, ne birang kan penani ding ti taano Fo-mina Yeesho na a doo manni weshiinai ye tei kan doonum foki dok. Pene ma mondok maa sharaa ya manni wei kan doon, oo, ti piree kan shii wei kan doon. ¹⁵ Ma kei ti daklo poshaarino molko longku weshiina ye ke ti sha, nang a nyimmon lewan ye ke ti shukim. Mo weshiina ye ke ti sha yooro koko ye po daklon ka molko ye kiriti muraa ka longkuuniim. ¹⁶ Mo ween dob-dob ti piree kan ke yooro we piirei kan ti peddii. ¹⁷ Longku gubno Yamma a ti yai paaro shaani kan sheyanim, bara paaro diya kunngu, kuttan shaari, kan pe poshaari ti ta shoomno Yamma. ¹⁸ Birang ding mo ti wawi ti kiriti ti do koko te, shii mo ti twaalo shaarino Yamma, mo memme kunnga kan shii birang. ¹⁹ Longkuino te, shero mo kama dum ya po bangmu kama longku kaman ya wee ta waru ka diya bang kan pee shik shaayi. ²⁰ Mo ma buuro shuranno Yammam ka longku sha weshiinam. Kulli peen weshiina ding a doo yeen doon ti taim, pene a ween kpangum ye peen weshiina ye maa ti sha in shiworo we shuwat ti mondok. ²¹ Yeka kpang mo ko addo lom, koo ken she doo inaabi, koo ken ya dogi wei ding ye maa ta li molko in shugna. ²² Shero mo wee ti poshaariko ti ku peen we te mo yooro ti shakkiko kan Yamma. Mo kan kpang ti kuunii mo poshaarini a minin kelnyo ti shiim, ti ku wee shi po kuuni sharaa yaa dob-dob. ²³ Pene niyo ye kan bel poshaari ti ku wee ti sha, ti tollu ti kuunii kelmono Yamma ye maa shuwaa, longku nyimmo te ye ti yai a shereni ti ku lishaarim. Birang ding wee a shero ti ku lishaarim, teerei shasshalau.