¹ ۔اَے خُدا انتقام لینے والے خُدا۔ اَے خُداوند ۔ اَے خُداانتقام لینے والے خُدا۔ جلَوہ گر ہو۔ ² ۔اَے مُنصِفِ جہان۔ اُٹھ۔ مغرُوروں کو مُناسِب بدلہ دے۔ ³ ۔شریر کب تک اَے خُداوند ۔ شریر کب تک فخر کرتے رہیں گے۔ ⁴ ۔کب تک وہ سب بَدکردار۔ بکواس اَور لاف زَنی اَور تکبُّر کرتے رہیں گے۔ ⁵ ۔اَے خُداوند وہ تیری اُمّت کو پیس ڈالتے ہَیں۔ اَور تیری مِیرَاث کو دُکھ دیتے ہَیں۔ ⁶ ۔وہ بیوہ اَور پردیسی کو قتل کرتے۔ اَور یتِیم کومارڈالتے ہَیں۔ ⁷ ۔اَور کہتے ہَیں کہ خُداوند نہیں دیکھتا۔ یَعقُوب کا خُدا خیال نہیں کرتا۔ ⁸ ۔اَے اُمّت کے جاہلو سمجھ لو۔ اَور اَے بے عقلو تُمہیں کب عقل آئے گی؟ ⁹ ۔جس نے کان دِیا کیا وہ خُود نہیں سُنتا؟ یا جس نے آنکھ بنائی کیا وہ خوُد نہیں دیکھتا؟ ¹⁰ ۔کیا اقوام کا مُودّب تادِیب نہیں کرے گا؟ اَور اِنسان کا مُعلِّم علِم نہیں رکھتا؟ ¹¹ ۔ خُداوند اِنسان کے خیالات کو جانتا ہَے۔ کہ وہ باطِل ہَیں۔ ¹² ۔اَے خُداوند مُبارَک ہَے وہ آدمی جِسے تُو تادِیب کرتا۔ اَور اپنی شریعت کی تعلیم دیتا ہَے۔ ¹³ ۔تاکہ تُو اُسے بُرے دِنوں میں آرام بخشے۔ جب کہ شریر کے لئے گڑھا کھودا جاتا ہَے۔ ¹⁴ ۔کیونکہ خُداوند اپنی اُمّت کو ترک نہیں کرے گا۔ اَور اپنی مِیرَاث کو نہیں چھوڑے گا۔ ¹⁵ ۔کیونکہ عدل صداقت کی طرف رجُوع کرے گا۔ اَور سب راست دِل اُس کے پیچھے ہو لیں گے۔ ¹⁶ ۔شریروں کے مُقابلے میں میرے لئے کون اُٹھے گا؟ بَدکرداروں کے خلاف میرے لئے کون کھڑا ہو گا؟ ¹⁷ ۔اگر خُداوند نے میری مدد نہ کی ہوتی۔ تو قریب تھا کہ میری جان جائے خاموشی میں چلی جاتی۔ ¹⁸ ۔جب مَیں سمجھتا ہُوں کہ میرا پاؤں پھِسل چلا ہَے۔ تواَے خُداوند تیری رحمت مُجھے سنبھال لیتی ہَے۔ ¹⁹ ۔جب میرے دل میں فِکروں کی کثرت ہوتی ہَے۔ تو تیری تسلّی میری جان کو شاد کرتی ہَے۔ ²⁰ ۔کیا شریروں کی مَسند سے تُجھے کُچھ واسطہ ہَے۔ جو قانوُن کی اوٹ میں بَدی گھڑتی ہے؟ ²¹ ۔وہ صادِق کی جان پر حملہ کرتے ہیں۔ اَور بے گُناہ پر قتل کا فتویٰ دیتے ہَیں۔ ²² ۔یقیناً خُداوند میری جائے پناہ ہَے۔ اَور میرا خُدا میری اُمّید کی چٹان ہَے۔ ²³ ۔وہ اُن کی بَد کاری اُنہی پر لائے گا۔ اَور اُنہی کی شرارت کے ذریعے سے اُنہیں فنا کر دے گا۔ خُداوند ہمار اخُدا اُنہیں کاٹ ڈالے گا۔