مَشکِیل۔ ازا یتاؔن از راحی۔ ¹ ۔مَیں خُداوند کی رحمتوں کا گیت اَبد تک گاتا جاؤں گا۔ مَیں پُشت در پُشت اپنے مُنہ سے تیری وفابیان کرتا جاؤں گا۔ ² ۔کیونکہ تُو نے کہا ہَے کہ "رحمت اَبد تک قائم ہَے۔" تُو نے آسمان پر اپنی وفا کو مستحکم کِیا ہَے۔ ³ ۔"مَیں نے اپنے برگُزیدے کے ساتھ عہد باندھا ہَے۔ مَیں نے اپنے بندے داؔؤد سے قَسم کھائی ہَے۔ ⁴ ۔کہ مَیں تیری نسل کو ہمیشہ کے لئے مُستحکم کرُوں گا۔ اَور پُشت در پُشت تیرا تخت قائم رکھُّوں گا۔ "(سِلاہ) ⁵ ۔اَے خُداوند اَفلاک مُقدّسوں کی جماعت میں۔ تیرے مُعجزوں اَور تیری وفا کی تعریف کرتے ہَیں۔ ⁶ ۔کیونکہ فضاؤں میں کون خُداوند کے برابر ہَے۔ اَور خُداکے فرزندوں میں کون خُداوند کی مانند ہَے۔ ⁷ ۔خُدا مُقدْسوں کی مجِلس میں ہَولناک ہَے۔ اُن سب کی نِسبت جو اُس کے اِردگرِد ہَیں وہ عظیم و مُہِیب ہَے۔ ⁸ ۔اَے خُداوند لشکروں کے خُدا تیری مانند کون ہے۔ اَے خُداوند تُو قَوی ہے اَور تیری وفاداری تیرے گِرد و پیش ہَے۔ ⁹ ۔تُوسمُندر کی طُغیانی پر حُکم فرما ہَے۔ اُس کی موجوںکو تُو تھما دیتا ہَے۔ ¹⁰ ۔تُو نے رہؔب کو چھید کر چُور کر دِیا ہَے۔ اور اَپنے دستِ قادِر سے اپنے دشُمنوں کو پراگندہ کر دِیا ہَے۔ ¹¹ ۔اَفلاک تیرے ہی ہَیں اَور زمین بھی تیری ہی ہَے۔ تُو نے کُرہ ارض کی اُس کی معمُوری سمیت بُنیاد ڈالی ہَے۔ ¹² ۔تُو نے شِمال اَور جنُوب کو پیدا کِیا۔ تبؔور اَور حرمؔون تیرے نام کے سبب سے خُوشی مناتے ہَیں۔ ¹³ ۔تیرا بازُو زور آور ہَے۔ تیرا ہاتھ قَوی اَور تیرا دہنا ہاتھ بُلند ہَے۔ ¹⁴ ۔عدل اَور اِنصاف تیرے تخت کا قیام ہَیں۔ شفقت اَور سچّائی تیرے آگے آگے چلتی ہَیں۔ ¹⁵ ۔مُبارَک ہَے وہ اُمّت جو خُوشی کی للکار سے واقِف ہَے۔ اَے خُداوندوہ تیرے چہرے کے نُور میں چلتے پھِرتے ہَیں۔ ¹⁶ ۔وہ تیرے نام کے سبب سے دِن بھر خُوشی کرتے ہَیں۔ اَور وہ تیری صداقت سے سرفرازی پاتے ہَیں۔ ¹⁷ ۔کیونکہ تُو اُن کی قُوّت کا فخر ہَے۔ اَور تیرے کرم سے ہمار ا سِینگ بُلند ہوتا ہَے۔ ¹⁸ ۔کیونکہ خُداوند ہماری سِپر ہَے۔ اَور اِسرؔائیل کا قُدُّوس ہمارا بادشاہ ہَے۔ ¹⁹ ۔تُو نے ایک وقت رُؤیا میں اپنے برگُزیدوں سے کلام کِیا اَور کہا۔ "مَیں نے زور آور کو تاج بخشا ہَے۔ اَور اُمّت میں سے ایک برگُزیدے کو بُلند کِیا ہَے۔ ²⁰ ۔مَیں نے اپنے بندے داؔؤد کو پایا ہَے۔ مَیں نے اپنے پاک تیل سے اُسے مَسح کِیا ہَے۔ ²¹ ۔تاکہ میرا ہاتھ ہمیشہ اُس کے ساتھ رہے۔ اَور میرا بازُو اُسے مُستقِل کر دے۔ ²² ۔کوئی دُشمن اُسے دھوکا نہ دے گا۔ کو ئی خبِیث اُسے ضَرر نہ پہنچائے گا۔ ²³ ۔لیکن مَیں اُس کے رُوبرُو اُس کے مُخالفِوں کو ٹکُڑے ٹکُڑے کر دُوں گا۔ اَور اُس کے کِینہ وروں کو مارُوں گا۔ ²⁴ ۔میری وفاداری اَور میری رحمت اُس کے ساتھ ہو ں گی۔ اَور میرے نام کے سبب سے اُس کا سینگ بُلند ہو گا۔ ²⁵ ۔مَیں اُس کا ہاتھ سمُندر تک بڑھاؤں گا۔ اَور اُس کا دہنا ہاتھ دریاؤں تک۔ ²⁶ ۔وہ مُجھے پُکارے گا کہ تُو میرا باپ ہَے۔ میرا خُدا اَور میری نجات کی چٹان ہَے۔ ²⁷ ۔اَور مَیں اُسے پہلوٹھا بناؤں گا۔ زمین کے بادشاہوں میں سب سے اعلیٰ۔ ²⁸ ۔مَیں اُس کے لئے ہمیشہ اپنی رحمت قائم رکھُّوں گا۔ اَور میرا عہد اُس کے لئے اُستوار رہے گا۔ ²⁹ ۔مَیں اُس کی نسل دائمی بناؤں گا۔ اَور اُس کا تخت ایّام ِ آسمانی کی مانند۔ ³⁰ ۔اگر اُس کے فرزند میری شریعت کو ترک کریں۔ اَور میری رَضاؤں کے مُطابِق نہ چلیں۔ ³¹ ۔اگر وہ میرے قَوانیِن کو عدُول کریں۔ اَور میرے احکام پر عمل نہ کریں۔ ³² ۔تو مَیں اُن کے جُرم کی سزا چھڑی سے۔ اَور اُن کی تقصِیر کی سزا کوڑوں سے دُوں گا۔ ³³ ۔لیکن مَیں اپنی رحمت اُس سے قطع نہ کرُوں گا۔ اَور نہ اپنی وفاداری کو زائل ہونے دُوں گا۔ ³⁴ ۔مَیں اپنے عہد کو نہ توڑُوں گا۔ اَور نہ اپنے لبوں کا کہا بدلُوں گا۔ ³⁵ ۔مَیں نے ایک بار اپنی قُدّوسیت کی قَسم کھائی ہَے۔ کہ مَیں داؔؤد سے ہرگز جھوٹ نہ بولُوں گا۔ ³⁶ ۔اُس کی نسل اَبد تک قائم رہے گی۔ اَور اُس کا تخت میرے حضُور آفتاب کی مانند ہو گا۔ ³⁷ ۔اَور چاند کی طرح جو اَبد تک اُستوار۔ اَور فضا میں سچّا گُواہ ہَے۔ (سِلاہ) ³⁸ ۔لیکن تُو نے رَدّ کر دِیا ہَے اَور حقِیر جانا ہَے۔ اَور اپنے ممسُوح پر غضب ناک ہُؤا ہَے۔ ³⁹ ۔تُو نے اپنے بندے کا عہد بَرطرف کر دِیا ہَے۔ تُو نے اُس کاتاج خاک میں مِلا دِیا ہَے۔ ⁴⁰ ۔تُو نے اُس کی تمام فصِیلیں توڑ ڈالی ہَیں۔ تُو نے اُس کے قِلعوں کو وِیران کر دِیا ہَے۔ ⁴¹ ۔سب راہ گُزرنے والوں نے اُسے لُوٹ لِیا ہَے۔ وہ اپنے ہمسایوں کے نزدِیک باعِث نفرت ٹھہرا ہَے۔ ⁴² ۔تُو نے اُس کے مُخالفِوں کا دہنا ہاتھ بُلند کِیا ہَے۔ تُو نے اُس کے تمام دُشمنوں کو مسرُور کِیا ہَے۔ ⁴³ ۔تُو نے اُس کی تلوار کی دھار کو موڑ دِیا ہَے۔ اَور جنگ میں اُس کی مدد نہیں کی۔ ⁴⁴ ۔تُو نے اُس کے جمال کو اُڑا دِیا ہَے۔ اَور اُس کے تخت کو خاک پر دھکیل دِیا ہَے۔ ⁴⁵ ۔تُو نے اُس کی جوانی کے دِنوں کو کم کر دِیا ہَے۔ تُو نے اُسےرُسوائی سے ڈھانپ دِیا ہَے۔ (سِلاہ) ⁴⁶ ۔اَے خُداوند کب تک۔ کیا تُو اَبد تک چھُپا رہے گا؟ کیا تیرا غضب آگ کی طرح بھڑکتا رہے گا؟ ⁴⁷ ۔یاد رکھّ کہ میری زِندگی کیا ہی کم ہَے۔ اَور کہ تُو نے بنی آدم کو کِس قدر نازک بنایا ہَے۔ ⁴⁸ ۔وہ کون سا اِنسان زِندہ ہَے جو مَوت نہ چکھے گا۔ یا جو پاتال کے قابُو سے اپنی رُوح کو بچا لئے گا؟(سِلاہ) ⁴⁹ ۔اَے خُداوند تیری وہ پہلی رحمتیں کہاں ہَیں۔ جِن کی بابت تُو نے داؔؤد سے اپنی وفا کی قَسم کھائی ہَے؟ ⁵⁰ ۔اَے خُداوند اپنے بندوں کی خجالت کو یاد کر۔ مَیں قوموں کی اُن تمام دُشمنیوں کو اپنے سینے میں اُٹھائے ہُوئے ہُوں۔ ⁵¹ ۔جِن سے اَے خُداوند تیرے مُخالِف ملامت کرتے ہَیں۔ جِن سے وہ تیرے ممسُوح کے قدموں کو ملامت کرتے ہَیں۔ ⁵² ۔خُداوند اَبد تک مُبارَک ہو! آمیِن ثُم آمِین